Angirasi 387

Aṅgirasī 387

Language: Sanskrit

387.89 — 1 part

387.1

ya̱māya̱ soma̍ḥ pavate ya̱māya̍ kriyate ha̱viḥ
ya̱maṃ ha̍ ya̱jño ga̍cchatya̱gnidū̍to̱ ara̍ṃkṛtaḥ

387.2-2

ya̱māya̱ madhu̍mattamaṃ ju̱hotā̱ pra ca̍ tiṣṭhata
i̱daṃ nama̱ ṛṣi̍bhyaḥ pūrva̱jebhya̱ḥ pūrve̍bhyaḥ pathikṛdbhya̍ḥ

387.3

ya̱māya̍ ghṛ̱tava̱tpayo̱ rājñe̍ ha̱virju̍hotana
sa no̍ jī̱veṣvā ya̍ma̱ddīrghamāyu̱ḥ pra jī̱vase̍

387.4

maina̍magne̱ vi da̍ho̱ mābhi śū̍śuco̱ māsya̱ tvaca̍ṃ cikṣipo̱ mā śarī̍ram
śṛ̱taṃ ya̱dā kara̍si jātavedo̱thaina̍ṃ pra hi̍ṇutātpi̱tṛbhya̍ḥ

387.5

ya̱dā śṛ̱taṃ kṛ̱ṇavo̍ jātavedo̱thame̍na̱ṃ pari̍ dattātūṣi̱tṛbhya̍ḥ
ya̱dā gacchā̱tyasu̍nītime̱tāmatha̍ de̱vānā̍ṃ vaśa̱nīrbhavā̍ti

387.6

tri̱ka̱druke̍bhiḥ pavate̱ ṣaḍu̱rvīreka̍midvṛ̱hat
tri̱ṣṭubgā̍ya̱trī chandā̍ṃsi̱ sarvā̱ tā yama ārpi̍tā

387.7

sūrya̱ṃ cakṣu̍ṣā gaccha̱ vāta̍mā̱tmanā̱ diva̍ṃ ca gaccha pṛthi̱vīṃ ca̱ dharma̍bhiḥ
a̱po vā̍ gaccha̱ yadi̱ tatra̍ te hi̱tamoṣa̍dhīṣu̱ prati̍ tiṣṭhā̱ śarī̍raiḥ

387.8

a̱jo bhā̱gastapa̍sa̱staṃ ta̍pasva̱ taṃ te̍ śo̱cista̍patu̱ taṃ te̍ a̱rciḥ
yāste̍ śi̱vāsta̱nvo̍ jātaveda̱stābhi̍rvahai̱naṃ su̱kṛtā̍mu lo̱kam

387.9

yāste̍ śo̱cayo̍ ra̱ṃhayo̍ jātavedo̱ yābhi̍rā̱pṛṇāsi̱ diva̍ma̱ntari̍kṣam
a̱jaṃ yanta̱manu̱ tāḥ samṛ̍ṇvatā̱mathe̍tarābhiḥ śi̱vata̍mābhiḥ śṛ̱taṃ kṛ̍dhi

387.10

ava̍ sṛja̱ puna̍ragne pi̱tṛbhyo̱ yasta̱ āhu̍ta̱śvara̍ti sva̱dhāvā̍n
āyu̱rvasā̍na̱ upa̍ yātu̱ śeṣa̱ḥ saṃ ga̍cchatāṃ ta̱nvā̍ su̱varcā̍ḥ

387.11

(7)
ati̍ dra̱va śvānau̍ sārameyau ca̍tura̱kṣau śa̱valau̍ sādhunā̍ pa̱thā
adhā̍ pi̱tṝnsu̍vi̱datrā̱m̐ apī̍hi ya̱mena̱ ye sa̍dha̱māda̱ṃ mada̍nti

387.12

yau te̱ śvānau̍ yama rakṣi̱tārau̍ catura̱kṣau pa̍thi̱rakṣī̍ nṛ̱cakṣa̍sā
tābhyā̍ṃ rāja̱npari̍ dhehyenaṃ sva̱stya̍smā anamī̱vaṃ ca̍ dhehi

387.13

u̱rū̱ṇa̱sāva̍su̱tṛpā̍vudumba̱lau ya̱masya̍ dū̱tau ca̍rato̱ janā̱m̐ anu̍
tāva̱smabhya̍ṃ dṛ̱śaye̱ sūryā̍ya̱ puna̍rdā̱tāmasu̍ma̱dyeha bha̱dram

387.14

soma̱ eke̍bhyaḥ pavate ghṛ̱tameka̱ upā̍sate
yebhyo̱ madhu̍ pra̱dhāva̍ti̱ tāṃści̍de̱vāpi̍ gacchatāt

387.15

ye ci̱tpūrva̱ ṛta̍sātā ṛta̱jātā ṛ̱tāvṛdha̍ḥ
ṛṣī̍ntapa̍svato yama tapojām̐ api̍ gacchatāt

387.16

tapa̍sā̱ ye anā̍dhṛṣyā̱stapa̍sā̱ ye sva̱ryayu̍ḥ
tapo̱ ye ca̍kri̱re ma̱hastāṃści̍de̱vāpi̍ gacchatāt

387.17

ye yudhya̍nte pra̱dhane̍ṣu śūrā̍so̱ ye ta̍nū̱tyaja̍ḥ
ye vā̍ sa̱hasra̍dakṣiṇā̱stāṃści̍de̱vāpi̍ gacchatāt

387.18

sa̱hasra̍ṇīthāḥ ka̱vayò̱ ye go̍pā̱yanti̱ sūrya̍m
ṛṣī̍ntapa̍svato yama tapojām̐ api̍ gacchatāt

387.19

syo̱nāsmai̍ bhava pṛthivyanṛkṣa̱rā ni̱veśa̍nī
yacchā̍smai̱ śarma̍ sa̱prathā̍ḥ

387.20

a̱sa̱ṃbā̱dhe pṛ̍thivyā u̱rau lo̱ke ni dhī̍yasva
sva̱dhā yāśca̍kṛ̱ṣe jī̱vantāste̍ santu madhu̱ścuta̍ḥ

387.21

(8)
hvayā̍mi te̱ mana̍sā̱ mana̍ i̱hemā̱ngāhā̱m̐ upa̍ jujuṣā̱ṇa ehi̍
saṃ ga̍cchasva pi̱tṛbhi̱ḥ saṃ ya̱mena̍ syo̱nāstyā vā̱tā upa̍ vāntu śa̱gmāḥ

387.22

u̱ttvā va̍hantu ma̱ruta̍ udvā̱hā u̍da̱pruta̍ḥ
a̱jena̍ṃ kṛ̱ṇvanta̍ḥ śī̱taṃ vṛ̱ṣeṇo̍kṣantu vā̱liti̍

387.23

uda̍hvamāyu̱rāyu̍ṣe kṛ̱tve dakṣā̍ya jī̱vasai̍ | svānā̍cchatu te̱ mano̱ adhā̍ pi̱tṝm̐rupa̍ dra̱va

387.24

mā te̱ mano̱ māso̱rmāṅgā̍nā̱ṃ mā rasa̍sya te | mā te̍ hāsta ta̱nva1̱̍: kiṃ ca̱neha

387.25

mā tvā̍ vṛ̱kṣaḥ saṃ bā̍dhiṣṭa̱ mā de̱vī pṛ̍thi̱vī ma̱hī | lo̱kaṃ pi̱tṛṣu̍ vittvaidha̍sva ya̱marā̍jasu

387.26

yatte̱ aṅgama̍tihita̱ṃ parā̍cai̱rapāna̍ḥ prā̱ṇo ya u̍ vā te̱ parai̍taḥ
tattai̱ saṃga̍tya pi̱tara̍ḥ sanī̍ḍā ghrā̱sāddghāsa̍ṃ puna̱rā ve̍śayantu

387.27

ape̱maṃ jī̱vā a̍rudhangṛ̱hebhya̱staṃ nirva̍hata̱ pari̱ grāmā̍ditaḥ
mṛ̱tyuryama̱syāsī̍ddūtaḥ pracetā̱ asū̍npi̱tṛbhyo̱ gama̱yāṃ ca̍kāra

387.28

ye dasya̍vaḥ pi̱tṛṣu̱ pravi̍ṣṭā jñātimukhā̱ ahrutādu̱ścara̍nti
pa̱rā̱puro̍ ni̱puro̱ ye bhara̍ntyagni̱ṣṭāntsmā̱t pra dhama̍ti ya̱jñāt

387.29

saṃ vi̍śantvi̱ha pi̱tara̍ḥ svā na̍ḥ syo̱naṃ kṛ̍ṇvantaṃḥ prati̱ranta̱ āyu̍ḥ
tebhya̍ḥ śakema ha̱viṣā̱ nakṣa̍māṇā jyo̱gjīva̍ntaḥ śa̱rada̍ḥ pu̱rūcī̍ḥ

387.30

yāṃ te̍ dhe̱nuṃ ni̍pu̱ṇāmi̍ yamu̍ te kṣī̱ra o̍da̱nam
tena̍ jana̍syāso bha̱rtā yotrā̱sṛda̱jīvana̍ḥ

387.31

(6)
aśvā̍vatī̱ṃ pra tara̍ yā su̱śevā̱rkāka̍ṃ vā prata̱raṃ navī̍yaḥ
yastvā̍ ju̱hān va̱dhyaḥ so a̍stu̱ mā so a̱nyadvi̍dat bhāga̱dheya̍m

387.32

ya̱maḥ paro̍va̱ro viva̍svāṃnta̱taḥ para̱ṃ nāti̍ paśyāmi̱ kiṃ ca̱na
ya̱me a̍dhva̱ro adhi̍ me nivi̍ṣṭo bhuvo̱ viva̍svā̱ṃnvāta̍tāna

387.33

apā̍gūhanna̱mṛtā̱ṃ martye̍bhyaḥ kṛ̱tvā sava̍rṇāmadadhu̱rviva̍svate
u̱tāśvinā̍vabhara̱dyattadāsī̱daja̍hādu dvā mi̍thu̱nā sara̍ṇyūḥ

387.34

ye nikhā̍tā̱ ye paro̍ptā̱ ye da̱gdhā ye coddhi̍tāḥ
sarvā̍ṃstāna̱gna ā vaha̍ pi̱tṝnha̱viṣe̱ atta̍ve

387.35

ye a̍gnida̱gdhā ye ana̍gnidagdhā̱ madhyai̍ di̱vaḥ sva̱dhayā̍ mā̱daya̍nte
tvaṃ tā̍nvettha̱ yadi̍ te jātavedaḥ sva̱dhayā̍ ya̱jñaṃ svadhi̍tiṃ juṣantām

387.36

śaṃ ta̍pa̱ māti̍ tapo̱ agne̱ mā ta̱nva̍ṃ1 ta̱pa̍ḥ
vane̍ṣu śu̱ṣmau a̍stu te pṛthi̱vyāma̍stu yacchara̍ḥ

387.37

dadā̍myasmā ava̱sāna̍me̱tadya eṣa āga̱nmama̍ ceda̱bhūdi̱ha
ya̱maści̱ktvānpra̱tyetadā̍ha̱ mamai̍ṣa rā̱ya upa̍ tiṣṭhatāmi̱ha

387.38

i̱māṃ mātrā̍ṃ mimīmahe yathā̱para̱ṃ na māsā̍tai | śa̱te śa̱ratsu̍ no pu̱rā

387.39

premāṃ mātrā̍ṃ mimīmahe yathā̱para̱ṃ na māsā̍tai | śa̱te śa̱ratsu̍ no pu̱rā

387.40

a̱pemāṃ mātrā̍ṃ mimīmahe yathā̱para̱ṃ na māsā̍tai | śa̱te śa̱ratsu̍ no pu̱rā

387.41

(10)
vrīhuṃmāṃ mātrāṃ mimīmahe yathāparaṃ na māsātai | śate śaratsu no purā

387.42

nirimāṃ mātrāṃ mimīmahe yathāparaṃ na māsātai | śate śaratsu no purā

387.43

uddimāṃ mātrāṃ mimīmahe yathāparaṃ na māsātai | śate śaratsu no purā

387.44

samimāṃ mātrāṃ mimīmahe yathāparaṃ na māsātai | śate śaratsu no purā

387.45

amāsi mātrāṃ kharigāmāyuṣmānbhūyāsam | yathāparaṃ na māsātai śate śaratsu no purā

387.46

prāṇo apāno vyāna āyuścakṣurdṛśaye sūryāya | arparipereṇa pathā yamarājñaḥ pitṝngaccha

387.47

ye agnavaḥ śaśamānāḥ pareyurhitvā dveṣāṃsyanapatyavantaḥ
te dyāmṛdityāvidanta lokaṃ nākasya pṛṣṭhe adhi dīdhyānāḥ

387.48

udunvatī dyauravamā pīlumatīti madhyamā
tṛtīyā ha pradyauriti yasyāṃ pitara āsate

387.49

ye naḥ pituḥ pitaro ye pitāmahā ya āviviśururva 1ntarikṣam
ya ākṣiyanti pṛthivīmuta dyāṃ tebhyaḥ pitṛbhyo namasā vidhema

387.50

idamahnā 'u nāparaṃ divi paśyasi sūryam | mātā putraṃ yathā sicābhye2naṃ bhūma ūrṇuhi

387.51

idamahnā 'u nāparaṃ jarasyanyaditoparam | jāyā patimiva vāsasāmye2naṃ bhūma ūrṇuhi

387.52

abhi tvaurṇomi pṛthivyā māturastreṇa bhadrayā
jīveṣu bhadraṃ tanmayi svadhā pitṛṣu sā tvayi

387.53

agnīṣomā pathikṛtā syonaṃ devebhyo ratnaṃ dadhathurvi lokam
upa preṣyantaṃ pūṣaṇaṃ yo vahnātyajoyānaiḥ pṛthibhistatraṃ gacchatam

387.54

pūṣā tvetaścyāvayatu pra vidvānanaṣṭapaśurbhuvanasya gopāḥ
sa tvaitebhyaḥ pari dadatpitṛbhyobhirdevebhyaḥ suvidvātriyebhyaḥ

387.55

āyurviśvāyuḥ pari pātu tvā pūṣā tvā pātu prapathe purastāt
yatrāsate sukṛto yatra ta īyustatre tvā devaḥ savitā dadhātu

387.56

imau yunajmi te vahnī asunītāya voḍhave
tābhyāṃ yamasya sādanaṃ samitīścāva gacchatāt

387.57

etatvā vāsaḥ prathamaṃ nyāgannapaitadūha yadihābibhaḥ purā
iṣṭāpūrtamanusaṃkrāma vidvānyatra te dattaṃ bahudhā vibandhuṣu

387.58

agnervarma pari gobhirvyayasva saṃ prorṇuṣva medasā pīvasā ca
netvā dhṛṣṇurharasā jahṛṣāṇo dadhṛgvidhakṣanparyaṅkhayāte

387.59

daṇḍa̱ṃ hastā̍dā̱dadā̍no̱ ga̱tāso̱̍ḥ saha̱ śrotre̍ṇa̱ varca̍sā̱ bale̍na
atrai̱va tvami̱ha va̱yaṃ su̱vīrā̱ viśvā̱ mṛdho̍ a̱bhimā̍tīrjayema

387.60

dhanu̱rhastā̍dā̱dadā̍no mū̱tasya̍ saha̱ kṣa̱treṇa̱ varca̍sā̱ bale̍na
sa̱māgra̍bhāya̱ vasu̱ bhūri̍ pu̱ṣṭama̱rvāṅ tvame̱hyupa̍ jī̱valo̱kam

387.1-2

i̱yaṃ nārī̍ patilo̱kaṃ vṛ̍ṇā̱nā ni pa̍dyata̱ upa̍ tvā̱ martya̱ preta̍m
dharma̍ṃ purā̱ṇama̍nupā̱laya̍ntī̱ tasyai̍ pra̱jāṃ dravi̍ṇaṃ ce̱ha dhe̍hi

387.2-3

udī̍rṣva nārya̱bhi jī̍valo̱kaṃ ga̱tāsu̍me̱tamupa̍ śeṣa̱ ehi̍
ha̱sta̱grā̱bhasya̍ didhi̱ṣostave̱daṃ patyu̍rjani̱tvama̱bhi saṃ ba̍bhūtha

387.3-3

apa̍śyaṃ yu̱va̱tiṃ nī̱yamā̍nāṃ jī̱vāṃ mṛ̱tebhya̍: pari̱ṇīya̍mānām
a̱ndhena̱ yattamosā̱ prāvṛ̍tāsī̱tprākto a̱pācī̱mana̍yaṃ tade̍nām

387.4-2

pra̱jāna̱tya̍hye jīvalo̱kaṃ de̱vānā̱ṃ panthā̍manu̱saṃcara̍ntī
a̱yaṃ te̍ go̱patti̱staṃ ju̍ṣasva sva̱rgaṃ lo̱kamadhi̍ rohayainam

387.5-2

upa̱ dyāmupa̍ ve̱tasamava̍ttaro na̱dīnā̍m | a̱gne pitta̍ma̱pāma̍si

387.6-2

yaṃ tvama̍gne sa̱mada̍ha̱stamu̱ nirvā̍paya̱ puna̍:
kyāmbūrvatra̍ rohatu śāṇḍadū̱rvā vya̍lka̱śā

387.7-2

i̱daṃ ta̱ eka̍ṃ pa̱ra ū̱ ta̱ eka̍ṃ tṛ̱tīye̍na̱ jyoti̍ṣā̱ saṃ vi̍śasva
sa̱ṃveśa̍ne ta̱nvā̍3̱ cāru̍redhi pri̱yo de̱vānā̍ṃ pa̱ra̱me sa̱dhasthe̍

387.8-2

utti̍ṣṭha̱ prehi̱ pra dra̍vauka̍: kṛṇuṣva sa̱lile̍ sa̱dhasthe̍
tatra̱ tvaṃ pi̱tṛbhi̍: saṃvidāna̱: saṃ some̍na maṭsya̱ saṃ sva̱dhābhi̍:

387.9-2

pra cya̍vasva ta̱nva̍ṃ saṃ bhara̍sva mā te̱ gātrā̍ vi hā̍yi̱ mo śarī̍ram
mano̍ nivi̱ṣṭamanu̱saṃvi̍śasva̱ yatra̱ bhūme̍rju̱ṣase̱ tatra̍ gaccha

387.10-2

varca̍sā̱ māṃ pi̱tara̍: somyā̱so a̱ñjantu̍ de̱vā madhu̍nā ghṛ̱tena̍
cakṣu̍ṣe mā pra̱tara̍ṃ tāraya̍nto ja̱rase̍ mā ja̱rada̍ṣṭiṃ vardhantu

387.11-2

(13)
varco̍ mā̱ sama̍naktvi̱maṃ me̍ vi̱ṣṇurnya̍ñcāsana
ra̱yiṃ me̱ viśve̍ ni ya̍cchantu de̱vāḥ syo̱nā māpa̍: parva̍taiḥ punantu

387.12-2

mi̱trāvaru̍ṇā̱ pari̍ māma̍dhātāmādi̱tyā mā̱ svarva̍to vardhayantu
varco̍ ma̱ indro̱ nya̍naktu̱ hasta̍yorja̱rada̍ṣṭiṃ mā savi̱tā kṛ̍ṇotu

387.13-2

yo ma̱māra̍ pratha̱mo martyā̍nā̱ṃ yaḥ pre̱yāya̍ pratha̱mo lo̱kame̱tam
vai̱va̱sva̱taṃ sa̱ṃgama̍na̱ṃ janā̍nāṃ ya̱maṃ rājā̍naṃ ha̱viṣā̍ saparyata

387.14-2

parā̍ yāta pitara̱ ā ca̍ yātā̱yaṃ vo̍ ya̱jño madhu̍nā̱ sama̍ktaḥ
da̱tto a̱smabhya̱ṃ dravi̍ṇe̱ha bha̱draṃ ra̱yiṃ ca̍ naḥ sarva̍vīraṃ dadhāta

387.15-2

kaṇva̍: ka̱kṣīvā̱ṃpuru̍mīḍho aga̱stya̍: śyā̱vāśva̍: sobha̍rya̱rcana̍ānāḥ
viśvā̍mi̱tro'yaṃ ja̱mada̍gni̱ratri̍ravantu naḥ ka̱śyapo̍ vāma̱deva̍:

387.16-2

viśvā̍mitra̱ jama̍dagne̱ vasi̍ṣṭha̱ bhara̍dvāja̱ gota̍ma vāmadeva
śa̱rdirno̱ atri̍raga̱bhīnna̍maubhiḥ su̱saṃśā̍saḥ pi̱taro̍ mṛḍatāṃ naḥ

387.17-2

kṛ̱sye mṛ̱jānā̱ ati̍ yanti̱ ripramāyu̍rdadhā̍nāḥ pra̱tara̱ṃ navī̍yaḥ
ā̱pyāya̍mānāḥ pra̱jayā̱ dhane̱nārtha̍ṃ syāma su̱rabha̍yo gṛ̱heṣu̍

387.18-2

a̱ñjate̱ vya̍ñjate̱ sama̍ñjate kratu̍ṃ rihanti̱ madhu̍nā̱bhya̍ñjate
sindho̍ru̱cchāse̍ pra̱taya̍ntamu̱kṣaṇa̱ṃ hira̍ṇyapāvāḥ pa̱śumā̍su gṛ̱bhṇate

387.19-2

yadahro mudraṃ pitaraḥ somyaṃ ca teno̍ sacadhvaṃ svaya̍śaso̱ hi bhūta
te a̍rvāṇaḥ kavaya̱ ā śṛ̍ṇota suvidutrā vi̱dathe̍ hūyamā̍nāḥ

387.20-2

ye atra̍yo aṅgiraso̱ nava̍gvā iṣṭāva̍nto rātiṣāco̱ dadhā̍nāḥ
dakṣi̍ṇāvantaḥ sukṛto̱ ya u̱ syāsmā̱sminba̱rhiṣi̍ mādayadhvam

387.21-2

(14)
adhā̍ yathā̍ naḥ pi̱tara̱ḥ parā̍saḥ pratnāsau agna ṛtamā̍śaśānāḥ
śucī̱dyandīdhye̍ta uktha̱śāsa̱ḥ kṣāmā̍ bhi̱ndanto̍ aruṇīrapa̍ vran

387.22-2

suka̱rmāṇaḥ suraco̍ de̱vayanto̱ ayo̱ na de̱vā jani̍mā̱ dhama̍ntaḥ
śuca̍nto a̱gniṃ va̍vṛdhanta indra̍mu̱rvī ga̱vyāṃ pa̍ri̱ṣada̱ṃ no akran

387.23-2

ā yūtheva̍ kṣumati̱ paśvo̍ a̱khyadve̱vānā̱ṃ jani̱māntyugraḥ
marttā̍saścidurvaśīrakṛpranvṛ̱dhe ci̱darya̱ upa̍rasyāyoḥ

387.24-2

akarma̍ te svapa̍so abhūma ṛ̱tama̍vasannuṣaso̍ vibhātīḥ
viśva̍ṃ tadbhadraṃ yadava̍nti de̱vā bṛ̱hadva̍dema vi̱dathe̍ su̱vīrā̍ḥ

387.25-2

indro̍ mā ma̱rutvānprācyā̍ di̱śaḥ pā̍tu bāhucyutāṃ pṛthi̱vī dyāmi̍vo̱pari̍
lo̱ka̱kṛta̍ḥ pathi̱kṛto̍ yajāmahe̱ ye de̱vānā̍ṃ hutabhā̍gā i̱ha stha

387.26-2

dhā̱tā mā̍ nirṛtyā̱ dakṣi̍ṇāyā di̱śaḥ pā̍tu bāhucyutāṃ pṛthi̱vī dyāmi̍vo̱pari̍
lo̱ka̱kṛta̍ḥ pathi̱kṛto̍ yajāmahe̱ ye de̱vānā̍ṃ hutabhā̍gā i̱ha stha

387.27-2

adi̍tirmādi̱tyaiḥ pra̱tīcyā̍ di̱śaḥ pā̍tu bāhucyutāṃ pṛthi̱vī dyāmi̍vo̱pari̍
lo̱ka̱kṛta̍ḥ pathi̱kṛto̍ yajāmahe̱ ye de̱vānā̍ṃ hutabhā̍gā i̱ha stha

387.28-2

somoṃ mā vi̱śvairdevairudī̍cyā di̱śaḥ pā̍tu bāhucyutāṃ pṛthi̱vī dyāmi̍vo̱pari̍
lo̱ka̱kṛta̍ḥ pathi̱kṛto̍ yajāmahe̱ ye de̱vānā̍ṃ hutabhā̍gā i̱ha stha

387.29-2

dha̱rtā ha̍ tvā dha̱ruṇo̍ dhārayātā ū̱rdhvaṃ bhānuṃ saṃvi̱tā dyāmi̍vo̱pari̍
lo̱ka̱kṛta̍ḥ pathi̱kṛto̍ yajāmahe̱ ye de̱vānā̍ṃ hutabhā̍gā i̱ha stha

387.30-2

prācyāṃ tvā di̱śi purā saṃvṛ̱taḥ sva̱dhāyā̱mā da̍dhāmi bāhucyutāṃ pṛthi̱vī dyāmi̍vo̱pari̍
lo̱ka̱kṛta̍ḥ pathi̱kṛto̍ yajāmahe̱ ye de̱vānā̍ṃ hutabhā̍gā i̱ha stha

387.31-2

(15)
dakṣi̍ṇāyāṃ tvā di̱śi purā saṃvṛ̱taḥ sva̱dhāyā̱mā da̍dhāmi bāhucyutāṃ pṛthi̱vī dyāmi̍vo̱pari̍
lo̱ka̱kṛta̍ḥ pathi̱kṛto̍ yajāmahe̱ ye de̱vānā̍ṃ hutabhā̍gā i̱ha stha

387.32-2

pra̱tīcyāṃ tvā di̱śi purā saṃvṛ̱taḥ sva̱dhāyā̱mā da̍dhāmi bāhucyutāṃ pṛthi̱vī dyāmi̍vo̱pari̍
lo̱ka̱kṛta̍ḥ pathi̱kṛto̍ yajāmahe̱ ye de̱vānā̍ṃ hutabhā̍gā i̱ha stha

387.33-2

udīcyāṃ tvā diśi purā saṃvṛtaḥ svadhāyāmā dadhāmi bāhucyutā pṛthivī dyāmivopari
lokakṛtaḥ pathikṛtau yajāmahe ye devānām̐ hutabhāgā iha stha

387.34-2

dhruvāyāṃ tvā diśi purā saṃvṛtaḥ svadhāyāmā dadhāmi bāhucyutā pṛthivī dyāmivopari
lokakṛtaḥ pathikṛtau yajāmahe ye devānām̐ hutabhāgā iha stha

387.35-2

ūrdhvāyāṃ tvā diśi purā saṃvṛtaḥ svadhāyāmā dadhāmi bāhucyutā pṛthivī dyāmivopari
lokakṛtaḥ pathikṛtau yajāmahe ye devānām̐ hutabhāgā iha stha

387.38-2

itaścaivāmutaścāvatāṃ yame iva yata̍māne̱ yadaitam
pra vāṃ bharanmānuṣā devayanto ā sīdatāṃ svamu lokaṃ vidāne

387.39-2

svāsasthe bhavatamindave no yuje vāṃ brahma pūrvyaṃ namobhiḥ
vi śloka̍ eti pa̱thye̍va sūriḥ śṛṇvantu viśve̍ amṛtāsa etat

387.40-2

trīṇi padāni rupo anvarohaccatuṣpadīmanvaitadvratena̍
a̱kṣare̍ṇa̱ prati̍ mimīte a̱rkamṛ̱tasya̱ nābhāvadhi saṃ punāti

387.41-2

(16)
de̱vebhya̱ḥ karma̍vṛṇīta mṛ̱tyuṃ pra̱jāyai̱ kimamṛtaṃ nāvṛ̍ṇīta
bṛhaspatirya̱jñamatanuta̱ ṛṣi̍ḥ priyāṃ ya̱mastanva1̱mā rireca

387.42-2

tvama̍gna̱ īḍi̱to jā̱tave̍do̱vāḍvyāni̍ surabhīṇi̍ kṛ̱tvā
prādā̍ḥ pi̱tṛbhya̍ḥ sva̱dhayā̱ te a̍kṣannaddhi tvaṃ de̍va̱ praya̍tā ha̱vīṃṣi̍

387.43-2

āsīnā̍so aruṇīnā̍mupa̱sthe ra̱yiṃ dha̍tta dā̱śuṣe̱ martyā̍ya
putrebhya̍ḥ pitara̱stasya̱ vasva̱ḥ pra ya̍cchata ta i̱hojaṃ dadhāta

387.44-2

a̱gniṣvā̱ttāḥ pi̍tara̱ eha ga̍cchata̱ sada̍ḥsadaḥ sadata supraṇītayaḥ
attā ha̱vīṃṣi̱ praya̍tāni ba̱rhiṣi̍ ra̱yiṃ ca̍ na̱ḥ sarva̍vīraṃ dadhāta

387.45-2

upa̍hūtā na̱ḥ pitara̍ḥ somyā̱sau ba̱rhiṣye̍ṣu ni̱dhiṣu̍ pri̱yeṣu̍
ta ā ga̍mantu̱ ta i̱ha śru̍vantvadhi̍ bruvantu̱ te'vi̱ntvasmān

387.46-2

ye na̍ḥ pi̱tuḥ pi̱taro̱ ye pi̍tāma̱hā anū̍jahire somapī̱thaṃ vasi̍ṣṭhāḥ
tebhi̍rya̱maḥ sa̍ṃrarāṇo ha̱vīṃpyu̱śannu̱śadbhi̍ḥ prati̱kāma̍mattu

387.47-2

ye tā̍tṛ̱purde̍va̱trā jeha̍mānā hotrā̱vida̍ḥ stoma̍taṣṭāso a̱rkaiḥ
āgne̍ yāhi su̱hasra̍ṃ deva̱vandai̍ḥ sa̱tyaiḥ ka̱vibhi̍rṛṣibhirgharma̱sadbhi̍ḥ

387.48-2

ye sa̱tyāso̍ havi̱rdo ha̍vi̱ṣpā indre̍ṇa de̱vaiḥ sa̱radha̍ṃ tu̱reṇa̍
āgne̍ yāhi su̱vidra̍trebhira̱rvāṅparai̱ḥ pūrvai̍ṛṣi̍bhirgha̱rmasa̍dbhiḥ

387.49-2

upa̍ sarpa mā̱tara̱ṃ bhūmi̍me̱tāmuruvyaca̍saṃ pṛthi̱vīṃ su̱śevā̍m
ūrṇa̍mradāḥ pṛthi̱vī dakṣi̍ṇāva̱ta e̱ṣā tvā̍ pātu pra̱pathe̍ pura̱stāt

387.50-2

ucchva̍ñcasva pṛthivi̱ mā ni bā̍dhathāḥ sūpāya̱nāsmai̍ bhava sūpasarpa̱ṇā
mā̱tā putra̱ṃ yathā̍ si̱cābhye̍naṃ bhūma ūrṇuhi

387.51-2

(27)
u̱cchvañca̍mānā pṛthi̱vī su ti̍ṣṭhatu sa̱hasra̱ṃ mit upa̍ hi śraya̍ntām
te gṛ̱hāso̍ ghṛ̱taścuta̍ḥ syo̱nā viśvāhā̍smai śara̱ṇāḥ sa̍ntvatra̍

387.52-2

utte̍ stabhnāmi pṛthi̱vīṃ tvatparī̱maṃ loga̍ṃ ni̱dadha̱nmo a̱haṃ ri̍ṣam
e̱tāṃ sthūṇā̍ṃ pi̱taro̍ dhārayanti̱ te tatra̍ ya̱maḥ sāda̍nā te kṛṇotu

387.53-2

i̱mama̍gne ca̱masa̱ṃ mā vi ji̍hvaraḥ pri̱yo de̱vānā̍muta so̱myānā̍m
a̱yaṃ yaśca̱maso̍ de̱vapā̍na̱stasmi̍nde̱vā a̱mṛtā̍ mādayantām

387.54-2

atha̍rvā pū̱rṇaṃ ca̱masaṃ yamindrā̍yāvi̱bharvāja̍nī̱vite
tasmi̍nkṛṇoti su̱kṛta̍sya bha̱kṣaṃ tasmi̍nnindu̍ḥ pavate vi̱śvadānī̍m

387.55-2

yattai̍ kṛ̱ṣṇaḥ śa̍ku̱na ā̱tutoda̍ pi̱pīla̍ḥ sa̱rpa u̱ta vā̱ śvāpa̍daḥ
a̱gniṣṭadvi̱śvāda̍ga̱daṃ kṛ̍ṇotu sorma̍śca̱ yo brā̍hma̱ṇām̐ ā̍vi̱veśa̍

387.56-2

paya̍svatī̱roṣa̍dhayaḥ paya̍svanmā̱maka̱ṃ paya̍ḥ
a̱pāṃ paya̍so̱ yatpaya̱stena̍ mā sa̱ha śu̍mbhatu

387.57-2

i̱mā nārī̍ravidha̱vāḥ su̱patnī̱rāñja̍nena sa̱rpiṣā̱ saṃ spṛ̍śantām
a̱na̱śravo̍ anamī̱vāḥ su̱ratnā̱ ā ro̍hantu̱ jana̍yo̱ yoni̱magne̍

387.58-2

saṃ ga̍cchasva pi̱tṛbhi̱ḥ saṃ ya̱mene̍ṣṭāpū̱rtena̍ pa Host per: para̱me vyo̍man
hi̱tvāva̍dyaṃ puna̱rasta̱mehi̱ saṃ ga̍cchatāṃ ta̱nvā̍ su̱varcā̍ḥ

387.59-2

ye na̍ḥ pi̱tuḥ pi̱taro̱ ye pi̍tāma̱hā ya ā̍vivi̱śuru̱rva1̍ntari̍kṣam
tebhya̍ḥ sva̱rāḍasu̍nītirno a̱dya yathā̍va̱śaṃ ta̱nva̍ḥ kalpayāti

387.60-2

śaṃ te̍ nīhā̱ro bha̍vatu̱ śaṃ te̍ pṛ̱ṣvāva̍ śīyatām
śīti̍ke̱ śītikā̍vati̱ hlādi̍ke hlādikāvati
ma̱ṇḍūkya1̍psvāśaṃ bhu̍va i̱maṃ sva1̍gniṃ śa̍maya

387.61

(28)
vi̱vasvā̍nno̱ abha̍yaṃ kṛṇotu̱ yaḥ su̱trāmā̍ jī̱radā̍nuḥ su̱dānu̍ḥ
i̱heme vī̱rā ba̱havo̍ bhavantu̱ goma̱daśva̍vanmayya̍stu̱ puṣṭam

387.62

vi̱vasvā̍nno̱ amṛ̍tatve da̍dhātu̱ parai̍tu mṛ̱tyura̱mṛta̍ṃ na̱ aitu̍
i̱mānra̍kṣatu̱ puru̍ṣānā ja̍ri̱mṇo mo ṣve̍ṣā̱masavo̍ ya̱maṃ gu̍ḥ

387.63

yo du̱dhe a̱ntari̍kṣe na ma̱hnā pi̱tṝṇā̍ṃ ka̱viḥ prama̍tirmatī̱nām
tama̍rcata vi̱śvāmi̍trā ha̱virbhiḥ sa no̍ ya̱maḥ pra̱tara̍ṃ jī̱vase̍ dhāt

387.64

ā ro̍hata di̱vamu̍tta̱māmuṣa̍yo̱ mā bi̍bhīta̱na
soma̍pāḥ soma̍pāyina i̱daṃ va̍ḥ kriyate ha̱viraga̍nma̱ jyoti̍rutta̱mam

387.65

pra ke̱tunā̍ bṛ̱hatā̍ bhā̱tya̱gnirā roda̍sī vṛṣa̱bho ro̍ravīti
di̱vaścidantā̍dupa̱māmu̱dāna̍ḍu̱pasthe̍ ma̱hiṣo̍ va̍vṛdhe

387.66

nāke̍ supa̱rṇamupa̱ yatpata̍ntaṃ hṛ̱dā vena̍nto a̱bhyaca̍kṣata tvā
hira̍ṇyapakṣaṃ varu̍ṇasya dū̱taṃ ya̱masya̱ yonau̍ śaku̱naṃ bhu̍ra̱ṇyum

387.67

indra̍ kratu̱ṃ na ā bha̍ra pi̱tā pu̱trebhyo̱ yathā̍
śikṣā̍ ṇo a̱sminpu̍ruhūta̱ yāma̍ni jī̱vā jyoti̍raśīmahi

387.68

a̱pupāpi̍hitānku̱mbhānyāṃstai̍ de̱vā adhā̍rayan
te tai santu sva̱dhāva̍nto̱ madhu̍manto ghṛ̱taścuta̍ḥ

387.69

yāstai̍ dhā̱nā anu̍kirāmi ti̱lamiśrā̍ḥ sva̱dhāva̍tīḥ
tāstai̍ santu vi̱bhvīḥ pra̱bhvīstāstai̍ ya̱mo rājā̍nu manyatām

387.70

puna̍rdehi vanaspate̱ ya e̱ṣa nihi̍ta̱stvayi̍
yathā̍ ya̱masya̱ sāda̍na̱ āsā̍tai vi̱dathā̍ vada̍n

387.71

ā ra̍bhasva jātavedasteja̍stvaddharo̍ astu te
śarī̍ramasya̱ saṃ da̍hāthainaṃ dhehi sukṛtā̍mu lo̱ke

387.72

ye te̱ pūrve̍ parā̍gatā̱ apa̍re pi̱tara̍śca̱ ye
tebhyo̍ ghṛ̱tasya̍ kulyāai̱tu śa̱tadhā̍rā vyu̱ndatī̍

387.73

e̱tadā ro̍ha vaya̍ unmṛjā̱naḥ svā i̱ha bṛ̱hadu̍ dīda̱yante̍
a̱bhi prehi̍ madhdya̱to māpa̍ hāsthāḥ pi̱tṝṇāṃ lo̱kaṃ pra̍tha̱mo yo atra̍

387.1-3

ā ro̍hata̱ jani̍trīṃ jātave̱dasa̍ḥ pitṛyāṇai̱ḥ saṃ va̱ ā ro̍hayāmi
a̱rvāṅgha̱vyeṣi̍to havya̱vāha̱ ījā̍naṃ yu̱ktāḥ su̱kṛtā̍m̐ dhatta lo̱ke

387.2-4

de̱vā ya̱jñamṛ̱tava̍ḥ kalpayanti ha̱viḥ pu̍ro̱ḍāśa̍m̐ sruco̍ ya̱jñāyu̍dhāni
tebhi̍ryāhi pa̱thibhi̍rdeva̱yānai̱ryairī̍jā̱nāḥ sva̍rgaṃ yanti̍ lo̱kam

387.3-4

ṛ̱tasya̱ panthā̱manu̍ paśya sā̱dhvaṅgira̍saḥ su̱kṛto̱ yena̱ yanti̍
tebhi̍ryāhi pa̱thibhi̍ḥ sva̱rgaṃ yatrā̍di̱tyā madhu̍ bha̱kṣaya̍nti tṛ̱tīye̱ nāke̱ adhi̍ vi̱ śraya̍sva

387.4-4

traya̍ḥ supa̱rṇā u̍para̱sya mā̱yū nāka̍sya pṛ̱ṣṭhe adhi̍ vi̱ṣṭapi̍ śri̱tāḥ
sva̱rgā lo̱kā a̱mṛte̍na vi̱ṣṭhā iṣa̱mūrja̱ṃ yaja̍mānāya duhām

387.5-3

ju̱hūdardhāra̱ dyāmu̍pa̱bhṛda̱ntari̍kṣaṃ dhru̱vā dā̍dhāra pṛthi̱vīṃ pra̍ti̱ṣṭhām
pra̱tīmām̐ lo̱kā ghṛ̱tapṛ̍ṣṭhāḥ sva̱rgāḥ kāmai̍kāma̱ṃ yaja̍mānāya duhām

387.6-3

dhru̱va ā ro̍ha pṛthi̱vīṃ vi̱śvabhau̍jasama̱ntari̍kṣama̱pabhṛ̱dā kra̍masva
juhu̱ dyāṃ ga̍ccha̱ yaja̍mānena sā̱kaṃ sruve̍ṇa va̱tsena̱ diśa̍: prapī̍nāḥ sarvā̍ dhukṣvāha̍ṇīyamānaḥ

387.7-3

tī̱rthaistara̍nti pra̱vato̍ ma̱hīri̍ti ya̱jñakṛta̍: su̱kṛto̱ yena̱ yanti̍
atrā̍dadhu̱ryaja̍mānāya lo̱kaṃ diśo̍ bhū̱tāni̱ yadaka̍lpayanta

387.8-3

aṅgi̍rasāmaya̱naṃ pū̱rvo a̱gnirāni̍tyānāmaya̱naṃ gārha̍patyo da̱kṣiṇā̍nāmaya̱naṃ dakṣi̍ṇā̱gniḥ
ma̱himāna̍ma̱gnervihi̍tasya̱ brahma̍ṇā̱ sama̍ṅgaiḥ sarva̱ upa̍ yāhi śu̱gmaḥ

387.9-3

pū̱rvo a̱gniṣṭvā̍ tapatu̱ śaṃ pu̱rastā̱cchaṃ pa̱ścātta̍patu gārha̍patyaḥ
da̱kṣi̱ṇā̱gniṣṭe̍ tapatu̱ śarma̱ varmotta̍rato̱ madhya̍to̱ antari̍kṣāddiśodiśo a̱gne pari̍ pāhi gho̱rāt

yū̱yama̍gne śaṃta̍mābhista̱nūbhi̍rījā̱nama̱bhi lo̱kaṃ sva̍rgam
aśvā̍ bhū̱tvā pṛ̍ṣṭi̱vāho̍ vahātha̱ yatra̍ de̱vaiḥ sa̍ṃdha̱māda̱ṃ mada̍nti ||10||(20)
śarma̍gne pa̱ścāttvaṃ śaṃ pu̱rastā̱cchamu̍tta̱rācchama̍dha̱rātta̍painam
eka̍stre̱dhā vihi̍to jātaveda̱ḥ samya̍genaṃ dhehi sukṛtā̍ma̱ lo̱ke

Linked texts (6)

Atharvaveda — Sanskrit
Śaunakasaṃhitā — Sanskrit
Vedārthaprakāśa (Mādhavācārya alias Sāyaṇācārya) — Mādhavācārya alias Sāyaṇācārya, Sanskrit
Upaniṣatsaṃgraha — Sanskrit
Paippalādasaṃhitā — Sanskrit
Śrautakośa — Sanskrit

Angirasi 387

Contents