Angirasi 59

Aṅgirasī 59

i̱haiva dhru̱vāṃ ni mi̍nomi̱ śālā̱ṃ kṣeme̍ tiṣṭhāti ghṛ̱tamu̱kṣamā̍ṇā
tāṃ tvā̍ śāle sarva̍vīrāḥ su̱vīrā̱ ari̍ṣṭavīrā̱ upa̱ saṃ ca̍rema

i̱haiva dhruvā prati̍ tiṣṭha śāle'śvā̍vatī goma̍tī sū̱nṛtā̍vatī
ūrja̍svatī ghṛ̱tava̍tī̱ parya̍syatyucchrayasva ma̱hate̱ saubha̍gāya

dha̱ruṇya̍si śāle bṛha̱ccha̍ndāḥ pū̱rtidhā̍nyā
ā tvā̍ va̱tso ga̍ṃmedā ku̍mā̱ra ā dhe̱nava̍: sāya̱māspanda̍mānāḥ

i̱māṃ śālā̍m̐ savi̱tā vā̱yurindro̱ bṛha̱spati̱rni mi̍notu prajānan
u̱kṣantū̍dmā ma̱ruto̍ ghṛ̱tena̱ bhago̍ no̱ rājā̱ ni kṛ̱ṣiṃ ta̍notu

māna̍sya patni śara̱ṇā syo̱nā de̱vī de̱vebhi̱rnirmi̍tā̱syagre̍
tṛṇa̱ṃ vasā̍nā suma̱nā asa̍stva̱mathā̱smabhya̍ṃ sahavī̍raṃ ra̱yiṃ dā̍:

ṛ̱tena̱ sthūṇā̱madhi̍ roha̱ vaṃśo̱gro vi̱rāja̱nnapa̍ vṛṅkṣva śatrūn
mā te̍ riṣannupasa̱ttāro̍ gṛ̱hāṇā̍m̐ śāle śa̱taṃ jī̍vema śa̱rada̱: sarva̍vīrāḥ

emāṃ ku̍mā̱rastaru̍ṇa̱ ā va̱tso ja̍ga̍tā sa̱ha
emāṃ pari̍srutaḥ ku̱mbha ā da̱dhnaḥ ka̱laśai̍raguḥ

pūrṇaṃ nāri̱ pra bhara̍ ku̱mbhame̱taṃ ghṛ̱tasya̱ dhārā̍ma̱mṛte̍na sa̱ṃbhṛtām
i̱māṃ pā̱tṝnamṛte̍nā̱ sama̍ṅgdhīṣṭāpū̱rtama̱bhi ra̍kṣātye̱nām

i̱mā āpa̱: pra bha̍rāmyaya̱kṣmā ya̍kṣma̱nāśa̍nīḥ
gṛ̱hānupa̱ pra sī̍dāmya̱mṛte̍na sa̱hāgninā̍

Linked texts (3)