Arshika 115

Ārṣika 115

8
a̱ganma̍ ma̱hā nama̍sā̱ yavi̍ṣṭha̱ṃ yo dī̱dāya̍ sa̱middha̱ḥ sve du̍ro̱ṇe
ci̱trabhā̍nu̱ roda̍sī a̱ṃtaru̱rvī svāhu̍taṃ vi̱śvata̍ḥ pra̱tyaṃca̍m

sa ma̱hnā viśvā̍ du̱ritā̍ni sā̱hvāna̱gni ṣṭave̱ dama̱ ā jā̱tave̍dāḥ
sa no̍ rakṣiṣaddu̱ritā̍dava̱dyāda̱smāngṛ̍ṇata u̱ta no̍ ma̱ghona̍ḥ

tvaṃ va̍ruṇa u̱ta mi̱tro a̍gne̱ tvāṃ va̍rdhaṃti ma̱tibhi̱rvasi̍ṣṭhāḥ
tve vasu̍ suṣa̱ṇanā̍ni saṃtu yū̱yaṃ pā̍ta sva̱stibhi̱ḥ sadā̍ naḥ

9
ma̱hnām̐ indro̍ ya̱ oja̍sā pa̱rjanyo̍ vṛ̱ṣṭimā̍m̐ iva | stomai̍rva̱tsasya̍ vāvṛdhe

ka̱ṇvā̱ iṃdra̱ṃ yadakra̍ta̱ stomai̍rya̱jñasya̱ sādhana̍m | jā̱mi bru̍vata̱ āyu̍dhā

pra̱jāmṛ̱tasya̍ piprata̱ḥ pra yadbhara̍ṃta̱ vahna̍yaḥ | viprā̍ ṛ̱tasya̍ vā̱hasā̍

10
pa̱vamā̍nasya jighnato̱ hare̍śca̱ṃdrā a̍sṛkṣata | jī̱rā a̍ji̱raśo̍ciṣaḥ

pa̱vamā̍no rathī̱tama̍ḥ śu̱bhrebhi̍ḥ śu̱bhraśa̍stamaḥ | hari̍śca̱ṃdro ma̱rudga̍ṇaḥ

pa̱vamā̍na vyaśnuhi ra̱śmibhi̍rvājasātamaḥ | dadha̍tsto̱tre su̱vīrya̍m

11
parīto̱ ṣiśca̍tā su̱taḥ somò̍ ya u̍tta̱maḥ ha̱viḥ
da̱dhanvā̍m̐ yo naryo̍ a̱psvām̐ra̍ṃtarā su̱ṣāva̱ soma̱madri̍bhiḥ

nūna̍ṃ punā̱no ' vi̍bhi̱ḥ pari̍ sravādabdha̱ḥ sura̱bhita̍raḥ
su̱te ci̍dā̱ptu madā̍mo̱ aṃdha̍sā śrī̱ṇaṃto̱ gobhi̱rutta̍ram

pari̍ svānaśca̱kṣase̍ de̱vamāda̍naḥ kratu̱riṃḍu̍rvicakṣa̱ṇaḥ

12
asā̍vi̱ somo̍ a̱ruṣo̱ vṛṣā̱ harī̱ rāje̍va da̱smo a̱bhi gā acikradat
pu̱nā̱no vāra̱matye̍ṣya̱vyaya̍ḥ śye̱no na yoni̍ṃ ghṛ̱tava̍ṃtamāsa̱dat

parjanya̍ḥ pi̱tā ma̱hiṣasya̍ parṇi̱no nābhā̍ pṛthi̱vyā giri̍ṣu̱ kṣaya̍ṃ dadhe
svasā̍ra̱ āpo̍ a̱bhi gā udā̍sa̱raṃtsaṃ grāva̍bhirvasate vī̱te adhva̍re

ka̱virvedha̍syā paryai̍ṣi ma̱hina̱matyo̱ na mṛ̱ṣṭo a̱bhi vāja̍marṣasi
a̱pasedha̍ṃ du̱ritā so̍ma no mṛ̱ḍa ghṛ̱tā vasā̍na̱ḥ pari̍ yāsi nirṇi̍jam

13
ā̱ya̍ṃta i̱va sūrya̍m̐ vi̱śvediṃdra̍sya bhakṣata
vasū̍ni jā̱to ja̍ni̱mānyo̍jasā̱ prati̍ bhāgaṃ na dīdhimaḥ

a̱la̱rṣirā̍tiṃ vasu̱dāmu̍pa stuhi bha̱drā iṃdra̍sya rā̱taya̍ḥ
yo a̍sya̱ kāma̍ṃ vi̱dhato̱ na roṣa̍ti̱ mano̍ dā̱nāya̍ co̱daya̍n

14
ya̍ta iṃḏra bha̍yāmahe̱ tato̍ no̱ abha̍yaṃ kṛṣi
ma̱ghava̍ñcha̱gdhi tava̱ tanna̍ ū̱taye̱ vi dviṣo̱ vi mṛdho̍ jahi

tvam̐ hi rā̍dhasaspate̱ rādha̍so ma̱haḥ kṣaya̍syāsi vi̱dhartā̍
taṃ tvā vayaṃ ma̍gha̱vanni̍ṃdra girvaṇaḥ su̱tāva̍ṃto havāmahe ||2

Linked texts (5)