Pramāṇa · Search · About · API

Atharvaveda 10.8

Atharvaveda 10.8

Language
Sanskrit

10.8.1

10.8
yo bhūtaṃ ca bhavyaṃ ca sarvaṃ yaścādhitiṣṭhati .
svaryasya ca kevalaṃ tasmai jyeṣṭhāya brahmaṇe namaḥ ..1..

10.8.2

skambheneme viṣṭabhite dyauśca bhūmiśca tiṣṭhataḥ .
skambha idaṃ sarvamātmanvadyatprāṇan nimiṣacca yat..2..

10.8.3

tisro ha prajā atyāyamāyan nyanyā arkamabhito'viśanta .
bṛhan ha tasthau rajaso vimāno harito hariṇīrā viveśa ..3..

10.8.4

dvādaśa pradhayaścakramekaṃ trīṇi nabhyāni ka u tacciketa .
tatrāhatāstrīṇi śatāni śaṅkavaḥ ṣaṣṭiśca khīlā avicācalā ye ..4..

10.8.5

idaṃ savitarvi jānīhi ṣaḍyamā eka ekajaḥ .
tasmin hāpitvamicchante ya eṣāmeka ekajaḥ ..5..

10.8.6

āviḥ san nihitaṃ guhā jaran nāma mahatpadam .
tatredaṃ sarvamārpitamejatprāṇatpratiṣṭhitam ..6..

10.8.7

ekacakraṃ vartata ekanemi sahasrākṣaraṃ pra puro ni paścā .
ardhena viśvaṃ bhuvanaṃ jajāna yadasyārdhaṃ kva tadbabhūva ..7..

10.8.8

pañcavāhī vahatyagrameṣāṃ praṣṭayo yuktā anusaṃvahanti .
ayātamasya dadṛśe na yātaṃ paraṃ nedīyo'varaṃ davīyaḥ ..8..

10.8.9

tiryagbilaścamasa ūrdhvabudhnastasmin yaśo nihitaṃ viśvarūpam .
tadāsata ṛṣayaḥ sapta sākaṃ ye asya gopā mahato babhūvuḥ ..9..

10.8.10

yā purastādyujyate yā ca paścādyā viśvato yujyate yā ca sarvataḥ .
yayā yajñaḥ prāṅtāyate tāṃ tvā pṛcchāmi katamā sarcām ..10..

10.8.11

yadejati patati yacca tiṣṭhati prāṇadaprāṇan nimiṣacca yadbhuvat.
taddādhāra pṛthivīṃ viśvarūpaṃ tatsaṃbhūya bhavatyekameva ..11..

10.8.12

anantaṃ vitataṃ purutrānantamantavaccā samante .
te nākapālaścarati vicinvan vidvān bhūtamuta bhavyamasya ..12..

10.8.13

prajāpatiścarati garbhe antaradṛśyamāno bahudhā vi jāyate .
ardhena viśvaṃ bhuvanaṃ jajāna yadasyārdhaṃ katamaḥ sa ketuḥ ..13..

10.8.14

ūrdhvaṃ bharantamudakaṃ kumbhenevodahāryam .
paśyanti sarve cakṣuṣā na sarve manasā viduḥ ..14..

10.8.15

dūre pūrṇena vasati dūra ūnena hīyate .
mahadyakṣaṃ bhuvanasya madhye tasmai baliṃ rāṣṭrabhṛto bharanti ..15..

10.8.16

yataḥ sūryaḥ udetyastaṃ yatra ca gacchati .
tadeva manye'haṃ jyeṣṭhaṃ tadu nātyeti kiṃ cana ..16..

10.8.17

ye arvāṅmadhya uta vā purāṇaṃ vedaṃ vidvāṃsamabhito vadanti .
ādityameva te pari vadanti sarve agniṃ dvitīyaṃ trivṛtaṃ ca haṃsam ..17..

10.8.18

sahasrāhṇyaṃ viyatāvasya pakṣau harerhaṃsasya patataḥ svargam .
sa devāntsarvān urasyupadadya saṃpaśyan yāti bhuvanāni viśvā ..18..

10.8.19

satyenordhvastapati brahmaṇārvāṅvi paśyati .
prāṇena tiryaṅprāṇati yasmin jyeṣṭhamadhi śritam ..19..

10.8.20

yo vai te vidyādaraṇī yābhyāṃ nirmathyate vasu .
sa vidvān jyeṣṭhaṃ manyeta sa vidyādbrāhmaṇaṃ mahat..20..

10.8.21

apādagre samabhavatso agre svarābharat.
catuṣpādbhūtvā bhogyaḥ sarvamādatta bhojanam ..21..

10.8.22

bhogyo bhavadatho annamadadbahu .
yo devamuttarāvantamupāsātai sanātanam ..22..

10.8.23

sanātanamenamāhurutādya syātpunarṇavaḥ .
ahorātre pra jāyete anyo anyasya rūpayoḥ ..23..

10.8.24

śataṃ sahasramayutaṃ nyarbudamasaṃkhyeyaṃ svamasmin niviṣṭam .
tadasya ghnantyabhipaśyata eva tasmāddevo rocateṣa etat..24..

10.8.25

bālādekamaṇīyaskamutaikaṃ neva dṛśyate .
tataḥ pariṣvajīyasī devatā sā mama priyā ..25..

10.8.26

iyaṃ kalyāṇyajarā martyasyāmṛtā gṛhe .
yasmai kṛtā śaye sa yaścakāra jajāra saḥ ..26..

10.8.27

tvaṃ strī tvaṃ pumān asi tvaṃ kumāra uta vā kumārī..
tvaṃ jīrṇo daṇḍena vañcasi tvaṃ jāto bhavasi viśvatomukhaḥ ..27..

10.8.28

utaiṣāṃ pitota vā putra eṣāmutaiṣāṃ jyeṣṭha uta vā kaniṣṭhaḥ .
eko ha devo manasi praviṣṭaḥ prathamo jātaḥ sa u garbhe antaḥ ..28..

10.8.29

pūrṇātpūrṇamudacati pūrṇaṃ pūrṇena sicyate .
uto tadadya vidyāma yatastatpariṣicyate ..29..

10.8.30

eṣā sanatnī sanameva jātaiṣā purāṇī pari sarvaṃ babhūva .
mahī devyuṣaso vibhātī saikenaikena miṣatā vi caṣṭe ..30..

10.8.31

avirvai nāma devatartenāste parīvṛtā .
tasyā rūpeṇeme vṛkṣā haritā haritasrajaḥ ..31..

10.8.32

anti santaṃ na jahātyanti santaṃ na paśyati .
devasya paśya kāvyaṃ na mamāra na jīryati ..32..

10.8.33

apūrveṇeṣitā vācastā vadanti yathāyatham .
vadantīryatra gacchanti tadāhurbrāhmaṇaṃ mahat..33..

10.8.34

yatra devāśca manuṣyāścārā nābhāviva śritāḥ .
apāṃ tvā puṣpaṃ pṛchāmi yatra tan māyayā hitam ..34..

10.8.35

yebhirvāta iṣitaḥ pravāti ye dadante pañca diśaḥ sadhrīcīḥ .
ya āhutimatyamanyanta devā apāṃ netāraḥ katame ta āsan ..35..

10.8.36

imāmeṣāṃ pṛthivīṃ vasta eko'ntarikṣaṃ paryeko babhūva .
divameṣāṃ dadate yo vidhartā viśvā āśāḥ prati rakṣantyeke ..36..

10.8.37

yo vidyātsūtraṃ vitataṃ yasminn otāḥ prajā imāḥ .
sūtraṃ sūtrasya yo vidyādsa vidyādbrāhmaṇaṃ mahat..37..

10.8.38

vedāhaṃ sūtraṃ vitataṃ yasminn otāḥ prajā imāḥ .
sūtraṃ sūtrasyāhaṃ vedātho yadbrāhmaṇaṃ mahad..38..

10.8.39

yadantarā dyāvāpṛthivī agniraitpradahan viśvadāvyaḥ .
yatrātiṣṭhann ekapatnīḥ parastātkvevāsīn mātariśvā tadānīm ..39..

10.8.40

apsvāsīn mātariśvā praviṣṭaḥ praviṣṭā devāḥ salilānyāsan..
bṛhan ha tasthau rajaso vimānaḥ pavamāno harita ā viveśa ..40..

10.8.41

uttareṇeva gayatrīmamṛte'dhi vi cakrame .
sāmnā ye sāma saṃvidurajastaddadṛśe kva ..41..

10.8.42

niveśanaḥ saṃgamano vasūnāṃ deva iva savitā satyadharmā .
indro na tasthau samare dhanānām ..42..

10.8.43

puṇḍarīkaṃ navadvāraṃ tribhirguṇebhirāvṛtam .
tasmin yadyakṣamātmanvattadvai brahmavido viduḥ ..43..

10.8.44

akāmo dhīro amṛtaḥ svayaṃbhū rasena tṛpto na kutaścanonaḥ .
tameva vidvān na bibhāya mṛtyorātmānaṃ dhīramajaraṃ yuvānam ..44..

Linked texts (5)