Pramāṇa · Search · About · API

Atharvaveda 14: kāṇḍaṃ 14

Atharvaveda 14

Language
Sanskrit

Contents

kāṇḍaṃ 14

14.1

sūktam 1
sūktam 2

14.1.1

satyenottabhitā bhūmiḥ sūryeṇottabhitā dyauḥ .
ṛtenādityāstiṣṭhanti divi somo adhi śritaḥ ..1..

14.1.2

somenādityā balinaḥ somena pṛthivī mahī .
atho nakṣatrāṇāmeṣāmupasthe soma āhitaḥ ..2..

14.1.3

somaṃ manyate papivān yatsaṃpiṃṣantyoṣadhim .
somaṃ yaṃ brahmāṇo vidurna tasyāśnāti pārthivaḥ ..3..

14.1.4

yattvā soma prapibanti tata ā pyāyase punaḥ .
vāyuḥ somasya rakṣitā samānāṃ māsa ākṛtiḥ ..4..

14.1.5

ācchadvidhānairgupito bārhataiḥ soma rakṣitaḥ .
grāvṇāmicchṛṇvan tiṣṭhasi na te aśnāti pārthivaḥ ..5..

14.1.6

cittirā upabarhaṇaṃ cakṣurā abhyañjanam .
dyaurbhūmiḥ kośa āsīdyadayātsūryā patim ..6..

14.1.7

raibhyāsīdanudeyī nārāśaṃsī nyocanī .
sūryāyā bhadramidvāso gāthayaiti pariṣkṛtā ..7..

14.1.8

stomā āsan pratidhayaḥ kurīraṃ chanda opaśaḥ .
sūryāyā aśvinā varāgnirāsītpurogavaḥ ..8..

14.1.9

somo vadhūyurabhavadaśvināstāmubhā varā .
sūryāṃ yatpatye śaṃsantīṃ manasā savitādadāt..9..

14.1.10

mano asyā ana āsīddyaurāsīduta cchadiḥ .
śukrāvanaḍvāhāvāstāṃ yadayātsūryā patim ..10..

14.1.11

ṛksāmābhyāmabhihitau gāvau te sāmanāvaitām .
śrotre te cakre āstāṃ divi panthāścarācaraḥ ..11..

14.1.12

śucī te cakre yātyā vyāno akṣa āhataḥ .
ano manasmayaṃ sūryārohatprayatī patim ..12..

14.1.13

sūryāyā vahatuḥ prāgātsavitā yamavāsṛjat.
maghāsu hanyante gāvaḥ phalgunīṣu vyuhyate ..13..

14.1.14

yadaśvinā pṛcchamānāvayātaṃ tricakreṇa vahatuṃ sūryāyāḥ .
kvaikaṃ cakraṃ vāmāsītkva deṣṭrāya tasthathuḥ ..14..

14.1.15

yadayātaṃ śubhaspatī vareyaṃ sūryāmupa .
viśve devā anu tadvāmajānan putraḥ pitaramavṛṇīta pūṣā ..15..

14.1.16

dve te cakre sūrye brahmāṇa ṛtuthā viduḥ .
athaikaṃ cakraṃ yadguhā tadaddhātaya idviduḥ ..16..

14.1.17

aryamaṇaṃ yajāmahe subandhuṃ pativedanam .
urvārukamiva bandhanātpreto muñcāmi nāmutaḥ ..17..

14.1.18

preto muñcāmi nāmutaḥ subaddhāmamutaskaram .
yatheyamindra mīḍhvaḥ suputrā subhagāsati ..18..

14.1.19

pra tvā muñcāmi varuṇasya pāśādyena tvābadhnātsavitā suśevāḥ .
ṛtasya yonau sukṛtasya loke syonaṃ te astu sahasaṃbhalāyai ..19..

14.1.20

bhagastveto nayatu hastagṛhyāśvinā tvā pra vahatāṃ rathena .
gṛhān gaccha gṛhapatnī yathāso vaśinī tvaṃ vidathamā vadāsi ..20..

14.1.21

iha priyaṃ prajāyai te samṛdhyatāmasmin gṛhe gārhapatyāya jāgṛhi .
enā patyā tanvaṃ saṃ spṛśasvātha jirvirvidathamā vadāsi ..21..

14.1.22

ihaiva staṃ mā vi yauṣṭaṃ viśvamāyurvyaśnutam .
krīḍantau putrairnaptṛbhirmodamānau svastakau ..22..

14.1.23

pūrvāparaṃ carato māyayaitau śiśū krīḍantau pari yāto'rṇavam .
viśvānyo bhuvanā vicaṣṭa ṛtūṃranyo vidadhajjāyase navaḥ ..23..

14.1.24

navonavo bhavasi jāyamāno'hnāṃ keturuṣasāmeṣyagram .
bhāgaṃ devebhyo vi dadhāsyāyan pra candramastirase dīrghamāyuḥ ..24..

14.1.25

parā dehi śāmulyaṃ brahmabhyo vi bhajā vasu .
kṛtyaiṣā padvatī bhūtvā jāyā viśate patim ..25..

14.1.26

nīlalohitaṃ bhavati kṛtyāsaktirvyajyate .
edhante asyā jñātayaḥ patirbandheṣu badhyate ..26..

14.1.27

aślīlā tanūrbhavati ruśatī pāpayāmuyā .
patiryadvadhvo vāsasaḥ svamaṅgamabhyūrṇute ..27..

14.1.28

āśasanaṃ viśasanamatho adhivikartanam .
sūryāyāḥ paśya rūpāṇi tāni brahmota śumbhati ..28..

14.1.29

tṛṣṭametatkaṭukamapāṣṭhavadviṣavan naitadattave .
sūryāṃ yo brahmā veda sa idvādhūyamarhati ..29..

14.1.30

sa ittatsyonaṃ harati brahmā vāsaḥ sumaṅgalam .
prāyaścittiṃ yo adhyeti yena jāyā na riṣyati ..30..

14.1.31

yuvaṃ bhagaṃ saṃ bharataṃ samṛddhamṛtaṃ vadantāvṛtodyeṣu .
brahmaṇaspate patimasyai rocaya cāru saṃbhalo vadatu vācametām ..31..

14.1.32

ihedasātha na paro gamāthemaṃ gāvaḥ prajayā vardhayātha .
śubhaṃ yatīrusriyāḥ somavarcaso viśve devāḥ krann iha vo manāṃsi ..32..

14.1.33

imaṃ gāvaḥ prajayā saṃ viśāthāyaṃ devānāṃ na mināti bhāgam .
asmai vaḥ pūṣā marutaśca sarve asmai vo dhātā savitā suvāti ..33..

14.1.34

anṛkṣarā ṛjavaḥ santu panthāno yebhiḥ sakhāyo yanti no vareyam .
saṃ bhagena samaryamṇā saṃ dhātā sṛjatu varcasā ..34..

14.1.35

yacca varco akṣeṣu surāyāṃ ca yadāhitam .
yadgoṣvaśvinā varcastenemāṃ varcasāvatam ..35..

14.1.36

yena mahānaghnyā jaghanamaśvinā yena vā surā .
yenākṣā abhyaṣicyanta tenemāṃ varcasāvatam ..36..

14.1.37

yo anidhmo dīdayadapsvantaryaṃ viprāsa īḍate adhvareṣu .
apāṃ napān madhumatīrapo dā yābhirindro vāvṛdhe vīryāvān ..37..

14.1.38

idamahaṃ ruśantaṃ grābhaṃ tanūdūṣimapohāmi .
yo bhadro rocanastamudacāmi ..38..

14.1.39

āsyai brāhmaṇāḥ snapanīrharantvavīraghnīrudajantvāpaḥ .
aryamṇo agniṃ paryetu pūṣan pratīkṣante śvaśuro devaraśca ..39..

14.1.40

śaṃ te hiraṇyaṃ śamu santvāpaḥ śaṃ methirbhavatu śaṃ yugasya tardma .
śaṃ ta āpaḥ śatapavitrā bhavantu śamu patyā tanvaṃ saṃ spṛśasva ..40..

14.1.41

khe rathasya khe'nasaḥ khe yugasya śatakrato .
apālāmindra triṣpūtvākṛṇoḥ sūryatvacam ..41..

14.1.42

āśāsānā saumanasaṃ prajāṃ saubhāgyaṃ rayim .
patyuranuvratā bhūtvā saṃ nahyasvāmṛtāya kam ..42..

14.1.43

yathā sindhurnadīnāṃ sāmrājyaṃ suṣuve vṛṣā .
evā tvaṃ samrājñyedhi patyurastaṃ paretya ..43..

14.1.44

samrājñyedhi śvaśureṣu samrājñyuta devṛṣu .
nanānduḥ samrājñyedhi samrājñyuta śvaśrvāḥ ..44..

14.1.45

yā akṛntann avayan yāśca tatnire yā devīrantāmabhito'dadanta .
tāstvā jarase saṃ vyayantvāyuṣmatīdaṃ pari dhatsva vāsaḥ ..45..

14.1.46

jīvaṃ rudanti vi nayantyadhvaraṃ dīrghāmanu prasitiṃ dīdhyurnaraḥ .
vāmaṃ pitṛbhyo ya idaṃ samīrire mayaḥ patibhyo janaye pariṣvaje ..46..

14.1.47

syonaṃ dhruvaṃ prajāyai dhārayāmi te'śmānaṃ devyāḥ pṛthivyā upasthe .
tamā tiṣṭhānumādyā suvarcā dīrghaṃ ta āyuḥ savitā kṛṇotu ..47..

14.1.48

yenāgnirasyā bhūmyā hastaṃ jagrāha dakṣiṇam .
tena gṛhṇāmi te hastaṃ mā vyathiṣṭhā mayā saha prajayā ca dhanena ca ..48..

14.1.49

devaste savitā hastaṃ gṛhṇātu somo rājā suprajasaṃ kṛṇotu .
agniḥ subhagāṃ jatavedāḥ patye patnīṃ jaradaṣṭiṃ kṛṇotu ..49..

14.1.50

gṛhṇāmi te saubhagatvāya hastaṃ mayā patyā jaradaṣṭiryathāsaḥ .
bhago aryamā savitā puraṃdhirmahyaṃ tvādurgārhapatyāya devāḥ ..50..

14.1.51

bhagaste hastamagrahītsavitā hastamagrahīt.
patnī tvamasi dharmaṇāhaṃ gṛhapatistava ..51..

14.1.52

mameyamastu poṣyā mahyaṃ tvādādbṛhaspatiḥ .
mayā patyā prajāvati saṃ jīva śaradaḥ śatam ..52..

14.1.53

tvaṣṭā vāso vyadadhācchubhe kaṃ bṛhaspateḥ praśiṣā kavīnām .
tenemāṃ nārīṃ savitā bhagaśca sūryāmiva pari dhattāṃ prajayā ..53..

14.1.54

indrāgnī dyāvāpṛthivī mātariśvā mitrāvaruṇā bhago aśvinobhā .
bṛhaspatirmaruto brahma soma imāṃ nāriṃ prajayā vardhayantu ..54..

14.1.55

bṛhaspatiḥ prathamaḥ sūryāyāḥ śīrṣe keśām̐ akalpayat.
tenemāmaśvinā nārīṃ patye saṃ śobhayāmasi ..55..

14.1.56

idaṃ tadrūpaṃ yadavasta yoṣā jāyāṃ jijñāse manasā carantīm .
tāmanvartiṣye sakhibhirnavagvaiḥ ka imān vidvān vi cacarta pāśān ..56..

14.1.57

ahaṃ vi ṣyāmi mayi rūpamasyā vedaditpaśyan manasaḥ kulāyam .
na steyamadmi manasodamucye svayaṃ śrathnāno varuṇasya pāśān ..57..

14.1.58

pra tvā muñcāmi varuṇasya pāśādyena tvābadhnātsavitā suśevāḥ .
uruṃ lokaṃ sugamatra panthāṃ kṛṇomi tubhyaṃ sahapatnyai vadhu ..58..

14.1.59

udyacchadhvamapa rakṣo hanāthemaṃ nārīṃ sukṛte dadhāta .
dhātā vipaścitpatimasyai viveda bhago rājā pura etu prajānan ..59..

14.1.60

bhagastatakṣa caturaḥ pādān bhagastatakṣa catvāryuṣpalāni .
tvaṣṭā pipeśa madhyato'nu vardhrāntsā no astu sumaṅgalī ..60..

14.1.61

sukiṃśukaṃ vahatuṃ viśvarūpaṃ hiraṇyavarṇaṃ suvṛtaṃ sucakram .
ā roha sūrye amṛtasya lokaṃ syonaṃ patibhyo vahatuṃ kṛṇu tvam ..61..

14.1.62

abhrātṛghnīṃ varuṇāpaśughnīṃ bṛhaspate .
indrāpatighnīṃ putriṇīmāsmabhyaṃ savitarvaha ..62..

14.1.63

mā hiṃsiṣṭaṃ kumāryaṃ sthūṇe devakṛte pathi .
śālāyā devyā dvāraṃ syonaṃ kṛṇmo vadhūpatham ..63..

14.1.64

brahmāparaṃ yujyatāṃ brahma pūrvaṃ brahmāntato madhyato brahma sarvataḥ .
anāvyādhāṃ devapurāṃ prapadya śivā syonā patiloke vi rāja ..64..

14.1.64_1

14.1.10-12

14.1.64_2

rathopari paurāṇikasaṃdarbhāḥ

14.1.64_3

rathopari ṭippaṇī

14.1.64_4

rathopari śodhalekhaḥ

14.1.64_5

14.1.12

14.1.64_6

vyānopari ṭippaṇī

sūktaṃ 14.2

14.2.1

14.2
(vivāha prakaraṇam)
tubhyamagre paryavahantsūryāṃ vahatunā saha .
sa naḥ patibhyo jāyāṃ dā agne prajayā saha ..1..

14.2.2

punaḥ patnīmagniradādāyuṣā saha varcasā .
dīrghāyurasyā yaḥ patirjīvāti śaradaḥ śatam ..2..

14.2.3

somasya jāyā prathamaṃ gandharvaste'paraḥ patiḥ .
tṛtīyo agniṣṭe patisturīyaste manuṣyajāḥ ..3..

14.2.4

somo dadadgandharvāya gandharvo dadadagnaye .
rayiṃ ca putrāṃścādādagnirmahyamatho imām ..4..

14.2.5

ā vāmagantsumatirvājinīvasū nyaśvinā hṛtsu kāmā araṃsata .
abhūtaṃ gopā mithunā śubhaspatī priyā aryamṇo duryāmaśīmahi ..5..

14.2.6

sā mandasānā manasā śivena rayiṃ dhehi sarvavīraṃ vacasyam .
sugaṃ tīrthaṃ suprapāṇaṃ śubhaspatī sthāṇuṃ pathiṣṭhāmapa durmatiṃ hatam ..6..

14.2.7

yā oṣadhayo yā nadyo yāni kṣetrāṇi yā vanā .
tāstvā vadhu prajāvatīṃ patye rakṣantu rakṣasaḥ ..7..

14.2.8

emaṃ panthāmarukṣāma sugaṃ svastivāhanam .
yasmin vīro na riṣyatyanyeṣāṃ vindate vasu ..8..

14.2.9

idaṃ su me naraḥ śṛṇuta yayāśiṣā daṃpatī vāmamaśnutaḥ .
ye gandharvā apsarasaśca devīreṣu vānaspatyeṣu ye'dhi tasthuḥ .
syonāste asyai vadhvai bhavantu mā hiṃsiṣurvahatumuhyamānam ..9..

14.2.10

ye vadhvaścandraṃ vahatuṃ yakṣmā yanti janāmanu .
punastān yajñiyā devā nayantu yata āgatāḥ ..10..

14.2.11

mā vidan paripanthino ya āsīdanti daṃpatī .
sugena durgamatītāmapa drāntvarātayaḥ ..11..

14.2.12

saṃ kāśayāmi vahatuṃ brahmaṇā gṛhairaghoreṇa cakṣuṣā mitriyeṇa .
paryāṇaddhaṃ viśvarūpaṃ yadasti syonaṃ patibhyaḥ savitā tatkṛṇotu ..12..

14.2.13

śivā nārīyamastamāgann imaṃ dhātā lokamasyai dideśa .
tāmaryamā bhago aśvinobhā prajāpatiḥ prajayā vardhayantu ..13..

14.2.14

ātmanvatyurvarā nārīyamāgan tasyāṃ naro vapata bījamasyām .
sā vaḥ prajāṃ janayadvakṣaṇābhyo bibhratī dugdhamṛṣabhasya retaḥ ..14..

14.2.15

prati tiṣṭha virāḍasi viṣṇuriveha sarasvati .
sinīvāli pra jāyatāṃ bhagasya sumatāvasat..15..

14.2.16

udva ūrmiḥ śamyā hantvāpo yoktrāṇi muñcata .
māduṣkṛtau vyenasāvaghnyāvaśunamāratām ..16..

14.2.17

aghoracakṣurapatighnī syonā śagmā suśevā suyamā gṛhebhyaḥ .
vīrasūrdevṛkāmā saṃ tvayaidhiṣīmahi sumasyamānā ..17..

14.2.18

adevṛghnyapatighnīhaidhi śivā paśubhyaḥ suyamā suvarcāḥ .
prajāvatī vīrasūrdevṛkāmā syonemamagniṃ gārhapatyaṃ saparya ..18..

14.2.19

uttiṣṭhetaḥ kimicchantīdamāgā ahaṃ tveḍe abhibhūḥ svādgṛhāt.
śūnyaiṣī nirṛte yājaganthottiṣṭhārāte pra pata meha raṃsthāḥ ..19..

14.2.20

yadā gārhapatyamasaparyaitpūrvamagniṃ vadhūriyam .
adhā sarasvatyai nāri pitṛbhyaśca namaskuru ..20..

14.2.21

śarma varmaitadā harāsyai nāryā upastire .
sinīvāli pra jāyatāṃ bhagasya sumatāvasat..21..

14.2.22

yaṃ balbajaṃ nyasyatha carma copastṛṇīthana .
tadā rohatu suprajā yā kanyā vindate patim ..22..

14.2.23

upa stṛṇīhi balbajamadhi carmaṇi rohite .
tatropaviśya suprajā imamagniṃ saparyatu ..23..

14.2.24

ā roha carmopa sīdāgnimeṣa devo hanti rakṣāṃsi sarvā .
iha prajāṃ janaya patye asmai sujyaiṣṭhyo bhavatputrasta eṣaḥ ..24..

14.2.25

vi tiṣṭhantāṃ māturasyā upasthān nānārūpāḥ paśavo jāyamānāḥ .
sumaṅgalyupa sīdemamagniṃ saṃpatnī prati bhūṣeha devān ..25..

14.2.26

sumaṅgalī prataraṇī gṛhāṇāṃ suśevā patye śvaśurāya śaṃbhūḥ .
syonā śvaśrvai pra gṛhān viśemān ..26..

14.2.27

syonā bhava śvaśurebhyaḥ syonā patye gṛhebhyaḥ .
syonāsyai sarvasyai viśe syonā puṣṭāyaiṣāṃ bhava ..27..

14.2.28

sumaṅgalīriyaṃ vadhūrimāṃ sameta paśyata .
saubhāgyamasyai dattvā daurbhāgyairviparetana ..28..

14.2.29

yā durhārdo yuvatayo yāśceha jaratīrapi .
varco nvasyai saṃ dattāthāstaṃ viparetana ..29..

14.2.30

rukmaprastaraṇaṃ vahyaṃ viśvā rūpāṇi bibhratam .
ārohatsūryā sāvitrī bṛhate saubhagāya kam ..30..

14.2.31

ā roha talpaṃ sumanasyamāneha prajāṃ janaya patye asmai .
indrāṇīva subudhā budhyamānā jyotiragrā uṣasaḥ prati jāgarāsi ..31..

14.2.32

devā agre nyapadyanta patnīḥ samaspṛśanta tanvastanūbhiḥ .
sūryeva nāri viśvarūpā mahitvā prajāvatī patyā saṃ bhaveha ..32..

14.2.33

uttiṣṭheto viśvāvaso namaseḍāmahe tvā .
jāmimiccha pitṛṣadaṃ nyaktāṃ sa te bhāgo januṣā tasya viddhi ..33..

14.2.34

apsarasaḥ sadhamādaṃ madanti havirdhānamantarā sūryaṃ ca .
tāste janitramabhi tāḥ parehi namaste gandharvartunā kṛṇomi ..34..

14.2.35

namo gandharvasya namase namo bhāmāya cakṣuṣe ca kṛṇmaḥ .
viśvāvaso brahmaṇā te namo'bhi jāyā apsarasaḥ parehi ..35..

14.2.36

rāyā vayaṃ sumanasaḥ syāmodito gandharvamāvīvṛtāma .
agantsa devaḥ paramaṃ sadhasthamaganma yatra pratiranta āyuḥ ..36..

14.2.37

saṃ pitarāvṛtviye sṛjethāṃ mātā pitā ca retaso bhavāthaḥ .
marya iva yoṣāmadhi rohayaināṃ prajāṃ kṛṇvāthāmiha puṣyataṃ rayim ..37..

14.2.38

tāṃ pūṣaṃ chivatamāmerayasva yasyāṃ bījaṃ manuṣyā vapanti .
yā na ūrū uśatī viśrayāti yasyāmuśantaḥ praharema śepaḥ ..38..

14.2.39

ā rohorumupa dhatsva hastaṃ pari ṣvajasva jāyāṃ sumanasyamānaḥ .
prajāṃ kṛṇvāthāmiha modamānau dīrghaṃ vāmāyuḥ savitā kṛṇotu ..39..

14.2.40

ā vāṃ prajāṃ janayatu prajāpatirahorātrābhyāṃ samanaktvaryamā .
adurmaṅgalī patilokamā viśemaṃ śaṃ no bhava dvipade śaṃ catuṣpade ..40..

14.2.41

devairdattaṃ manunā sākametadvādhūyaṃ vāso vadhvaśca vastram .
yo brahmaṇe cikituṣe dadāti sa idrakṣāṃsi talpāni hanti ..41..

14.2.42

yaṃ me datto brahmabhāgaṃ vadhūyorvādhūyaṃ vāso vadhvaśca vastram .
yuvaṃ brahmaṇe'numanyamānau bṛhaspate sākamindraśca dattam ..42..

14.2.43

syonādyoneradhi badhyamānau hasāmudau mahasā modamānau .
sugū suputrau sugṛhau tarātho jīvāvuṣaso vibhātīḥ ..43..

14.2.44

navaṃ vasānaḥ surabhiḥ suvāsā udāgāṃ jīva uṣaso vibhātīḥ .
āṇḍātpatatrīvāmukṣi viśvasmādenasaspari ..44..

14.2.45

śumbhanī dyāvāpṛthivī antisumne mahivrate .
āpaḥ sapta susruvurdevīstā no muñcantvaṃhasaḥ ..45..

14.2.46

sūryāyai devebhyo mitrāya varuṇāya ca .
ye bhūtasya pracetasastebhya idamakaraṃ namaḥ ..46..

14.2.47

ya ṛte cidabhiśriṣaḥ purā jatrubhya ātṛdaḥ .
saṃdhātā saṃdhiṃ maghavā purūvasurniṣkartā vihrutaṃ punaḥ ..47..

14.2.48

apāsmattama ucchatu nīlaṃ piśaṅgamuta lohitaṃ yat.
nirdahanī yā pṛṣātakyasmin tāṃ sthāṇāvadhyā sajāmi ..48..

14.2.49

yāvatīḥ kṛtyā upavāsane yāvanto rājño varuṇasya pāśāḥ .
vyṛddhayo yā asamṛddhayo yā asmin tā sthāṇāvadhi sādayāmi ..49..

14.2.50

yā me priyatamā tanūḥ sā me bibhāya vāsasaḥ .
tasyāgre tvaṃ vanaspate nīviṃ kṛṇuṣva mā vayaṃ riṣāma ..50..

14.2.51

ye antā yāvatīḥ sico ya otavo ye ca tantavaḥ .
vāso yatpatnībhirutaṃ tan na syonamupa spṛśāt..51..

14.2.52

uśatīḥ kanyalā imāḥ pitṛlokātpatiṃ yatīḥ .
ava dīkṣāmasṛkṣata svāhā ..52..

14.2.53

bṛhaspatināvasṛṣṭāṃ viśve devā adhārayan .
varco goṣu praviṣṭaṃ yattenemāṃ saṃ sṛjāmasi ..53..

14.2.54

bṛhaspatināvasṛṣṭāṃ viśve devā adhārayan .
tejo goṣu praviṣṭaṃ yattenemāṃ saṃ sṛjāmasi ..54..

14.2.55

bṛhaspatināvasṛṣṭāṃ viśve devā adhārayan .
bhajo goṣu praviṣṭo yastenemāṃ saṃ sṛjāmasi ..55..

14.2.56

bṛhaspatināvasṛṣṭāṃ viśve devā adhārayan .
yaśo goṣu praviṣṭaṃ yattenemāṃ saṃ sṛjāmasi ..56..

14.2.57

bṛhaspatināvasṛṣṭāṃ viśve devā adhārayan .
payo goṣu praviṣṭaṃ yattenemāṃ saṃ sṛjāmasi ..57..

14.2.58

bṛhaspatināvasṛṣṭāṃ viśve devā adhārayan .
raso goṣu praviṣṭo yastenemāṃ saṃ sṛjāmasi ..58..

14.2.59

yadīme keśino janā gṛhe te samanartiṣū rodena kṛṇvanto'gham .
agniṣṭvā tasmādenasaḥ savitā ca pra muñcatām ..59..

14.2.60

yadīyaṃ duhitā tava vikeśyarudadgṛhe rodena kṛṇvatyagham .
agniṣṭvā tasmādenasaḥ savitā ca pra muñcatām ..60..

14.2.61

yajjāmayo yadyuvatayo gṛhe te samanartiṣū rodena kṛṇvatīragham .
agniṣṭvā tasmādenasaḥ savitā ca pra muñcatām ..61..

14.2.62

yatte prajāyāṃ paśuṣu yadvā gṛheṣu niṣṭhitamaghakṛdbhiraghaṃ kṛtam .
agniṣṭvā tasmādenasaḥ savitā ca pra muñcatām ..62..

14.2.63

iyaṃ nāryupa brūte pūlyānyāvapantikā .
dīrghāyurastu me patirjīvāti śaradaḥ śatam ..63..

14.2.64

ihemāvindra saṃ nuda cakravākeva daṃpatī .
prajayainau svastakau viśvamāyurvyaśnutām ..64..

14.2.65

yadāsandyāmupadhāne yadvopavāsane kṛtam .
vivāhe kṛtyāṃ yāṃ cakrurāsnāne tāṃ ni dadhmasi ..65..

14.2.66

yadduṣkṛtaṃ yacchamalaṃ vivāhe vahatau ca yat.
tatsaṃbhalasya kambale mṛjmahe duritaṃ vayam ..66..

14.2.67

saṃbhale malaṃ sādayitvā kambale duritaṃ vayam .
abhūma yajñiyāḥ śuddhāḥ pra ṇa āyūṃṣi tāriṣat..67..

14.2.68

kṛtrimaḥ kaṇṭakaḥ śatadan ya eṣaḥ .
apāsyāḥ keśyaṃ malamapa śīrṣaṇyaṃ likhāt..68..

14.2.69

aṅgādaṅgādvayamasyā apa yakṣmaṃ ni dadhmasi .
tan mā prāpatpṛthivīṃ mota devān divaṃ mā prāpadurvantarikṣam .
apo mā prāpan malametadagne yamaṃ mā prāpatpitṝṃśca sarvān ..69..

14.2.70

saṃ tvā nahyāmi payasā pṛthivyāḥ saṃ tvā nahyāmi payasauṣadhīnām .
saṃ tvā nahyāmi prajayā dhanena sā saṃnaddhā sanuhi vājamemam ..70..

14.2.71

amo'hamasmi sā tvaṃ sāmāhamasmyṛktvaṃ dyaurahaṃ pṛthivī tvam .
tāviha saṃ bhavāva prajāmā janayāvahai ..71..

14.2.72

janiyanti nāvagravaḥ putriyanti sudānavaḥ .
ariṣṭāsū sacevahi bṛhate vājasātaye ..72..

14.2.73

ye pitaro vadhūdarśā imaṃ vahatumāgaman .
te asyai vadhvai saṃpatnyai prajāvaccharma yacchantu ..73..

14.2.74

yedaṃ pūrvāgan raśanāyamānā prajāmasyai draviṇaṃ ceha dattvā .
tāṃ vahantvagatasyānu panthāṃ virāḍiyaṃ suprajā atyajaiṣīt..74..

14.2.75

pra budhyasva subudhā budhyamānā dīrghāyutvāya śataśāradāya .
gṛhān gaccha gṛhapatnī yathāso dīrghaṃ ta āyuḥ savitā kṛṇotu ..75..

Linked texts (6)