Pramāṇa · Search · About · API

Gaudapadiya 4

Gauḍapādīya 4

Language
Sanskrit

Contents

4.1

upāsanāśritodharmo jāte brahmaṇi varttate
prāgutpatterajaṃ sarvvaṃ tenāsau kṛpaṇaḥ smṛtaḥ

4.2

ato vakṣyāmyakārpaṇyamajāti samatāṅgatam
yathā na jāyate kiñcijjāyamānaṃ samaṃ tataḥ

4.3

ātmā hyākāśavajjīvairghaṭākāśairivoditaḥ
ghaṭādivacca saṅghātairjātāve̍tannidarśanam

4.4

ghaṭādiṣu pralīneṣu ghaṭākāśādayo yathā
ākāśe sampralīyante tadvajjīva ihātmani

4.5

yathaikasmin ghaṭākāśe rajodhūmādibhiryute
na sarve samprayujyante tadvajjīvā sukhādibhiḥ

4.6

rūpakāryyasamākhyāśca bhidyante tatra tatra vai
ākāśasya na bhedo'sti tadvajjīveṣu nirṇayaḥ

4.7

nākāśasya ghaṭākāśo vikārāvayavau yathā
naivātmanaḥ sadā jīvo vikārāvayavau tathā

4.8

yathā bhavati bālānāṃ gaganaṃ malinaṃ malaiḥ
tathā bhavatyabuddhānāmātmā'pi malino malaiḥ

4.6-2

maraṇe sambhave caiva gatyāgamanayorapi
sthitau sarvvaśarīreṣu ākāśenāvilakṣaṇaḥ

4.10

saṅghātāḥ svapnavatsarvve ātmamāyāvisarjjitāḥ
ādhikye sarvvasāmye vānopapattirhi vidyate

4.11

rasādayo hi ye kośā vyākhyātāstaittirīyake
teṣāmātmā paro jīvaḥ khaṃ yathā saṃprakāśitaḥ

4.12

dvayordvayormadhujñāne paraṃ brahma prakāśitam
pṛthivyāmudare caiva yathā''kāśaḥ prakāśitaḥ

4.13

jīvātmanorananyatvamabhedena praśasyate
nānātvaṃ nindyate yacca tadevaṃ hi samañjasam

4.14

jīvātmanoḥ pṛthaktvaṃ yatprāgutpatteḥ prakīrttitaṃ
bhaviṣyadvṛttyā gauṇaṃ tan mukhyatvaṃ hina yujyate

4.15

mṛllohavisphuliṅgādyaiḥ sṛṣṭiryā coditā'nyathā
upāyaḥ so'vatārāya nāsti bhedaḥ kathañcana

4.16

āśramāstrividhā hīnamadhyamotkṛṣṭadṛṣṭayaḥ
upāsanopadiṣṭeyaṃ tadarthamanukampayā

4.17

svasiddhāntavyavasthāsu dvaitino niścitā dṛḍham
parasparaṃ virudhyante tairayaṃ na virudhyate

4.18

advaitaṃ paramārtho hi dvaitaṃ tadbheda ucyate
teṣāmubhayathā dvaitaṃ tenāyaṃ na virudhyate

4.19

māyayā bhidyate hyetannānyathājaṃ kathañcana
tattvato bhidyamāne hi martyatāmamṛtaṃ vrajet

4.20

ajātasyaiva bhāvasya jātimanticchanti vādinaḥ
ajāto hyamṭato bhāvo martyatāṃ kathameṣyati

4.21

na bhavatyamṭataṃ martyaṃ na martyamamṭatantathā
prakṛteranyathābhāvo na kathañcidbhaviṣyati

4.22

svabhāvenāmṭato yasya bhāvo gacchati martyatāṃ
kṛtakenāmṛtastasya kathaṃ sthāsyati niścalaḥ

4.23

bhūtato'bhūtato vāpi sṛjyamāne samā śrutiḥ
niścitaṃ yuktiyuktañca yattadbhavati netarat

4.24

neha nāneti cāmnāyādindro māyābhirityapi
ajāyamāno bahudhā māyayā jāyate tu saḥ

4.25

sambhūterapavādācca sambhavaḥ pratiṣidhyate
konvenaṃ janayediti kāraṇaṃ pratiṣidhyate

4.26

sa eṣa neti netīti vyākhyātaṃ nihute yataḥ
sarvvamagrāhyabhāvena hetunā'jaṃ prakāśate

4.27

sato hi māyayā janma yujyate na tu tattvataḥ
tattvato jāyate yasya jātaṃ tasya hi jāyate

4.28

asato māyayā janma tattvato naiva yujyate
bandhyāputro na tattvena māyayā vāpi jāyate

4.29

yathā svapne dvayābhāsaṃ spandate māyayā manaḥ
tathā jāgraddvayābhāsaṃ spandate māyayāmanaḥ

4.30

advayañca dvayābhāsaṃ manaḥ svapne na saṃśayaḥ
advayañca dvayābhāsaṃ tathā jāgranna saṃśayaḥ

4.31

manodṛśyamidaṃ dvaitaṃ yat kiñcit sacarācaram
manaso hyamanībhāve dvaitaṃ naivopalabhyate

4.32

ātmasatyānubodhena na saṅkalpayate yadā
amanastāṃ tadā yāti grāhyābhāve tadagrahaṃ

4.33

akalpakamajaṃ jñānaṃ jñeyābhinnaṃ pracakṣate
brahma jñeyajaṃ nityamajenājaṃ vibudhyate

4.34

nigṛhītasya manaso nirvvikalpasya dhīmataḥ
pracāraḥ sa tu vijñeyaḥ suṣupte'nyo na tatsamaḥ

4.35

līyate hi suṣupte tannigṛhītaṃ na līyate
tadeva nirbhayaṃ brahma jñānālokaṃ samantataḥ

4.36

ajamanidramasvapnamanāmaka marūpakam
sakṛdvibhātaṃ sarvvajñaṃ nopacāraḥ kathañcana

4.37

sarvābhilāpavigataḥ sarvvacintāsamutthitaḥ
supraśāntaḥsakṛjjyotiḥsamādhiracalo'bhayaḥ

4.38

graho na tatra notsargaścintā yatra na vidyate
ātmasaṃsthantadā jñānamajāti samatāṃ gatam

4.39

asparśayogo vai nāma durddaśaḥ sarvvayogibhiḥ
yogino bibhyati hyasmādabhaye bhayadarśinaḥ

4.40

manaso nigrahāyattamabhayaṃ sarvvayoginām
duḥkhakṣayaḥ prabodhaścāpyakṣayā śāntireva ca

4.41

utseka udadheryadvat kuśāgreṇaikabindunā
manaso nigrahastadvadbhavedaparikhedataḥ

4.42

upāyena nigṛhṇīyādvikṣiptaṃ kāmabhogayoḥ
suprasannaṃ laye caiva yathā kāmo layastathā

4.42-2

duḥkhaṃ sarvvamanusmṛtya kāmabhogānnivarttayet
ajaṃ sarvvamanusmṛtya jātaṃ naiva tu paśyati

4.44

laye saṃbodhayeccittaṃ vikṣiptaṃ śamayetpunaḥ
sakaṣāyaṃ vijānīyāt samaprāptaṃ na cālayet

4.45

nāsvādayet sukhaṃ tatra niḥsaṅgaḥ prajñayā bhavet
niścalaṃ niścaraccittaṃ ekīkuryātprayatnataḥ

4.46

yadā na līyate cittaṃ na ca vikṣipyate punaḥ
aniṅganamanābhāsaṃ niṣpannaṃ brahma tattathā

4.47

svasthaṃ śāntaṃ nirvvāṇaṃ akathyaṃ sukhamuttamam
ajamajena jñeyena sarvvajñaṃ paricakṣate

4.48

na kaścijjāyate jīvaḥ sambhavo'sya na vidyate
etattaduttamaṃ satyaṃ yatna kiñcinna jāyate

4.48.p1

iti gauḍapādīyakārikāyāmadvaitākhyaṃ tṛtīyaṃ prakaraṇam

Linked texts (5)