Pramāṇa · Search · About · API

Kaishitaki ? 6

Kaiṣītaki ? 6

Language
Sanskrit

6.1

†ityāraṇyake pañcamo'dhyāyaḥ
gārgyo ha vai bālākiranūcānaḥ saṃspṛṣṭa āsa so'vasaduśīnareṣu savasanmatsyeṣu kurupañcāleṣu kāśivideheṣviti sa hājātaśatruṃ kāśyametyovāca brahma te bravāṇīti taṃ hovācājātaśatruḥ sahasraṃ dadma ta etasyāṃ vāci janako janaka iti vā u
janā dhāvantīti

6.2

sa hovāca bālākirya evaiṣa āditye puruṣastamevāhamupāsa iti taṃ hovācājātaśatrurmā maitasmin saṃvadiṣṭhā
bṛhan pāṇḍaravāsā atiṣṭhāḥ sarveṣāṃ bhūtānāṃ mūrddheti vā ahametamupāsa iti sa yo haitamevamupāste'tiṣṭhāḥ sarveṣāṃ bhūtānāṃ
mūrddhā bhavati

6.3

sa hovāca bālākirya evaiṣa candramasi puruṣastamevāhamupāsa iti | taṃ hovācājātaśatrurmā maitasmin saṃvadiṣṭhāḥ
somo rājā'nnasyātmeti vā ahametamupāsa iti sa yo haitamevamupāste'nnasyātmā bhavati

6.4

sa hovāca bālākirya evaiṣa vidyuti puruṣastamevāhamūpāsa
iti | taṃ hovācājātaśatrurmā maitasmin saṃvadiṣṭhāstejasyātmeti vā ahametamupāsa iti sa yo haitamevamupāste
tejasyātmā bhavati

6.5

sa hovāca bālākirya evaiṣa stanayitnau puruṣastamevāhamupāsa iti | taṃ hovācājātaśatrurmā maitasmin saṃvadayiṣṭhāḥ śabdasyātmeti vā ahametamupāsa iti sa yo haitamevamupāste śabdasyātmā bhavati

6.6

sa hovāca bālākirya evaiṣa ākāśe puruṣastamevāhamupāsa
iti | taṃ hovācājātaśatrurmā maitasmin samavādayiṣṭhāḥ pūrṇṇamapravartti brahmeti vā ahametamupāsa iti sa yo haitamevamupāste
pūryyate prajayā paśubhirno eva svayaṃ nāsya prajā purā kālātpravarttate

6.7

sa hovāca bālākirya evaiṣa vāyau puruṣastamevāhamupāsa
iti | taṃ hovācājātaśatrurmā maitasmin samavādayiṣṭhā indro
vaikuṇṭho'parājitā seneti vā ahametamupāsa iti sa yo haitamevamupāste jiṣṇurhi vā'parājiṣṇuranyatastyajāyī bhavati

6.8

sa hovāca bālākirya evaiṣo'gnau puruṣastamevāhamupāsa iti
taṃ hovācājātaśatrurmā maitasmin samavādayiṣṭhā viṣāsahiriti
vā ahametamupāsa iti sa yo haitamevamupāste viṣāsahihaivānveṣa bhavati

6.9

sa hovāca bālākirya evaiṣo'psu puruṣastamevāhamupāsa iti
taṃ hovācājātaśatrurmā maitasmin samavādayiṣṭhā nāmnasyātmeti
vā ahametamupāsa iti sa yo haitamevamupāste nāmnasyātmā bhavatītyadhidaivatamathādhyātmaṃ

6.10

sa hovāca bālākirya evaiṣa ādarśe puruṣastamevāhamupāsa
iti | taṃ hovācājātaśatrurmā maitasmin samavādayiṣṭhāḥ pratirūpa iti vā ahametamupāsa iti sa yo haitamevamupāste pratirūpo haivāsya prajāyāṃ putra ājāyate nāpratirūpaḥ

6.11

sa hovāca bālākirya evaiṣa pratiśrutkāyāṃ puruṣastamevāhamupāsa iti | taṃ hovācājātaśatrurmā maitasmin saṃmavādayiṣṭhā dvitīyo'napaga iti vā ahametamupāsa iti sa yo
haitamevamupāste vindate dvitīyān dvitīyavān bhavati

6.12

sa hovāca bālākirya evaiṣa śabdaḥ puruṣamanveti tamevāhamupāsa iti | taṃ hovācājātaśatrurmā maitasmin saṃmavādayiṣṭhā asuriti vā ahametamupāsa iti sa yo haitamevamupāste
no eva svayaṃ nāsya prajā purā kālāt saṃmohameti

6.13

sa hovāca bālākirya evaiṣa chāyāpuruṣastamevāhamupāsa
iti | taṃ hovācājātaśatrurmā maitasmin saṃmavādayiṣṭhā mṛtyuriti vā ahametamupāsa iti sa yo haitamevamupāste no eva
svayaṃ nāsya prajā purā kālātpramīyate

6.14

sa hovāca bālākirya evaiṣa śārīraḥ puruṣastamevāhamupāsa
iti | taṃ hovācājātaśatrurmā maitasmin saṃmavādayiṣṭhāḥ prajāpatiriti vā ahametamupāsa iti sa yo haitamevamupāste
prajāyate prajayā paśubhiḥ

6.15

sa hovāca bālākirya evaiṣa prājña ātmā yenaitatsuptaṃ
svapnayā carati tamevāhamupāsa iti | taṃ hovācājātaśatrurmā
maitasmin saṃmavādayiṣṭhā yamo rājeti vā ahametamupāsa
iti sa yo haitamevamupāste sarvvaṃ haivāsmā idaṃ śreṣṭhayāya
yamyate

6.16

sa hovāca bālākiryya eṣaiṣa dakṣiṇe'kṣan puruṣastamevāhamupāsa iti | taṃ hovācājātaśatrurmā maitasmin samavādayiṣṭhā
nāmna ātmā agnerātmā jyotiṣa ātmeti vā ahametamupāsa iti sa yo haitamevamupāsta eteṣāṃ sarveṣāmātmā bhavati

6.17

sa hovāca bālākiryya eṣaiṣa savye'kṣan puruṣastamevāhamupāsa iti | taṃ hovācājātaśatrurmā maitasmin samavādayiṣṭhāḥ satyasyātmā vidyuta ātmā tejasa ātmeti vā ahametamupāsa iti sa yo haitamevamupāsta eteṣāmātmā bhavati

6.18

āditye bṛhan pāṇḍaravāsāścandramasi somo rājā vidyuti tejaso stanayitnau śabdasyākāśe pūrṇaṃ vāvāvindro'gnau
viṣāsahirapsu nāmnasyādarśa pratirūpaḥ pratiśrutkāyāṃ dvitīyaḥ
śabdo'suśchāyāyāṃ mṛtyuḥ śārīraḥ prajāpatiḥ prājño yamo
rājā dakṣiṇe'kṣannāmnaḥ savye'kṣan satyasya | tata u ha bālākistūṣṇīmāsa taṃ hovācājātaśatruretāvannu bālākā3
ityetāvaddhīti hovāca bālākistaṃ hovācājātaśatrurmṛṣā vai
kila mā samavādayiṣṭhā brahma te bravāṇīti sa hovāca
yo vai bālākā eteṣāṃ puruṣāṇāṃ karttā yasya vai tatkarma
sa vai veditavya iti tata u ha bālākiḥ samitpāṇiḥ praticakrama upāyānīti taṃ hovācājātaśatruḥ pratilomarūpameva syāt
yat kṣatriyo brāhmaṇamupanayedehi yeva tvā jñapayiṣyāmīti taṃ
ha . pāṇāvabhipadya pravavrāja tau ha suptaṃ puruṣaṃ kañcidīyatustaṃ
hājātaśatrurāmantrayāñcakre bṛhan pāṇḍaravāsaḥ soma rājanniti sa u ha tūṣṇīmeva śiśye tata u haina yaṣṭyā vivikṣepa sa tata
eva samuttasthau taṃ hovācājātaśatruḥ kaiṣa etadvālāke puruṣo'śayiṣṭa kaitadabhūtkuta etadāgāditi tadu ha bālākirna vijajñau

6.16-2

taṃ hovācājātaśatruryatraiṣa etadvālāke puruṣo'śayiṣṭa yacaitadbhūdyata etadāgāddhitā nāma hṛdayasya nāḍyo hṛdayātpurītatamabhipatanvanti yathā sahasradhā keśo vipatitastāvadaṇvyaḥ
piṅgalasyāṇimnā tiṣṭhanti śuklasya kṛṣṇasya pītasya lohitasyeti tāsu tadā bhavati yadā suptaḥ svapnaṃ na kañcana paśyati
athāsminprāṇa evaikadhā bhavati tadenaṃ vāk sarvairnāmabhiḥ sahāpyeti cakṣuḥ sarvaiḥ rūpaiḥ sahāpyeti śrotraṃ sarvaiḥ śabdaiḥ sahāpyeti manaḥ sarvairdhyānaiḥ sahāpyeti sa yadā pratibudhyate yathāgnervisphuliṅgā vipratiṣṭherannevamevaitasmādātmanaḥ prāṇā yathāyatanaṃ
vipratiṣṭhante prāṇebhyo devā devebhyo lokāstadyathā kṣuraḥ kṣuradhāne'vahitaḥ syādviśvambharo vā viśvambharakulāya evamevaiṣa prājña
ātmedaṃ śarīramātmānamanupraviṣṭa ālomabhya ānakhebhyastametamātmānameta ātmāno'nvavasyanti yathā śreṣṭhinaṃ svāstadyathā
śreṣṭhī svairbhuṅkte yathā vā śreṣṭhinaṃ svā bhuñjata evamevaiṣa prājña
ātmaitairātmabhirbhuṅkte yathā śreṣṭhī svairevaṃ vai tamātmānameta ātmāno'nvavasyanti yathā śreṣṭhinaṃ svāḥ sa yāvaddha vā indra etamātmānaṃ na vijajñau tāvadenamasurā abhibabhūvuḥ sa yadā vijajñāvatha hatvāsurānvijitya sarveṣāṃ devānāṃ śraiṣṭhyaṃ svārājyamādhipatyaṃ parīyāya tatho evaivaṃ †vidvānsarveṣāṃ bhūtānāṃ śraiṣṭhyaṃ
svārājyamādhipatyaṃ paryeti ya evaṃ veda ya evaṃ veda

Linked texts (6)