Garuda Upanishad 1

1

gāruḍabrahmavidyāṃ pravakṣyāmi yāṃ brahmā vidyāṃ nāradāya provāca nārado bṛhatsenāya bṛhatsena indrāya indro bharadvājāya bharadvājo jīvatkāmebhyaḥ śiṣyebhyaḥ prāyacchat |
asyāḥ śrīmahāgaruḍabrahmavidyāyā brahmā ṛṣiḥ | gāyatrī chandaḥ |
śrībhagavānmahāgaruḍo devatā | śrīmahāgaruḍaprītyarthe mama sakalaviṣavināśanārthe jape viniyogaḥ | oṃ namo bhagavate aṅguṣṭhābhyāṃ namaḥ | śrī mahāgaruḍāya tarjanībhyāṃ svāhā |
pakṣīndrāya madhyamābhyāṃ vaṣaṭ | śrīviṣṇuvallabhāya anāmikābhyāṃ hum | trailokya paripūjitāya kaniṣṭhikābhyāṃ vauṣaṭ |
ugrabhayaṅkarakālānalarūpāya karatalakarapṛṣṭhābhyāṃ phaṭ |
evaṃ hṛdayādinyāsaḥ | bhūrbhuvaḥ suvaromiti digbandhaḥ | dhyānam |
svastiko dakṣiṇaṃ pādaṃ vāmapādaṃ tu kuñcitam |
prāñjalīkṛtadoryugmaṃ garuḍaṃ harivallabham ||