Pramāṇa · Search · About · API

Vaidikasangraha 12

Vaidikasaṅgraha 12

Language
Sanskrit

12.1

satyaṃ bṛhadṛtamugraṃ dīkṣā tapo brahma yajñaḥ pṛthivīṃ dhārayanti
sā no bhūtasya bhavyasya patnyuruṃ lokaṃ pṛthivī naḥ kṛṇotu

12.2

asambādhaṃ madhyato mānavānāṃ yasyā udvataḥ pravataḥ samaṃ bahu
nānāvīryā oṣadhīryā bibharti pṛthivī naḥ prathatāṃ rādhyatāṃ naḥ

12.3

yasyāṃ samudra uta sindharāpo yasyāmannaṃ kṛṣṭayaḥ sambabhūvuḥ
yasyāmidaṃ jinvati prāṇadejatsā no bhūmiḥ pūrvapeye dadhātu

12.4

yasyāścatasraḥ pradiśaḥ pṛthivyā yasyāmannaṃ kṛṣṭayaḥ sambabhūvuḥ
yā bibharti bahudhā prāṇadejatsā no bhūmirgoṣvapsu anne dadhātu

12.5

yasyāṃ pūrve pūrvajanā vicakrire yasyāṃ devā asurānabhyavartayan
gavāmaśvānāṃ vayasaśca viṣṭhā bhagaṃ varcaḥ pṛthivī no dadhātu

12.6

viśvambharā vasudhānīṃ pratiṣṭhā hiraṇyavakṣā jagato niveśanī
vaiśvānaraṃ bibhratī bhūmiragnimindraṛṣabhā draviṇe no dadhātu

12.7

yāṃ rakṣantyasvapnā viśvadānīṃ devā bhūmiṃ pṛthivīmapramādam
sā no madhu priyaṃ duhāmatho ukṣatu varcasā

12.8

yārṇave'dhi salilamagra āsodyāṃ māyābhiranvacaranmanīṣiṇaḥ
yasyā hṛdayaṃ parame vyomantsatyenāvṛtamamṛtaṃ pṛthivyāḥ
sā no bhūmistviṣiṃ balaṃ rāṣṭre dadhātūttame

12.9

yasyāmāpaḥ paricarāḥ samānīrahorātre apramādaṃ kṣaranti
sā no bhūmirbhūridhārā payo duhāmatho ukṣatu varcasā

12.10

yāmaśvināvamimātā viṣṇuryasyāṃ vicakrame
indro yāṃ cakra ātmane 'namitrāṃ śacīpatiḥ|³
sā no bhūmirvi sṛjatāṃ mātā putrāya me payaḥ

12.11

girayaste parvatā himavanto'raṇyaṃ te pṛthivi syonamastu
vabhruṃ kṛṣṇāṃ rohiṇīṃ viśvarūpāṃ dhruvāṃ bhūmiṃ pṛthivīmindraguptām
ajīto'hato akṣato'dhyaṣṭhāṃ pṛthivīmaham

12.12

yatte madhyaṃ pṛthivi yacca nabhyaṃ yāsta ūrjastanvaḥ sambabhūvuḥ
tāsu no dhehyabhi naḥ pavasva mātā bhūmiḥ putro ahaṃ pṛthivyāḥ
parjanyaḥ pitā sa u naḥ pipartu

12.13

yasyāṃ vediṃ parigṛhṇanti bhūmyāṃ yasyāṃ yajñaṃ tanvate viśvakarmāṇaḥ
yasyāṃ sīyante svaravaḥ pṛthivyāmūrdhvāḥ śukrā āhutyāḥ purastāt
sā no bhūmirvardhayadvardhamānā

12.14

yo no dveṣṭi pṛthivi yaḥ pṛtanyādyo'bhidāsānmanasā yo vadhena
taṃ no bhūmi randhaya pūrvakṛtvari

Linked texts (9)