Pramāṇa · Search · About · API

Baudhayanagrihyasutra 1.23: atha prathamapraśne trayoviṃśo 'dhyāyaḥ

Baudhāyanagṛhyasūtra 1.23

Language
Sanskrit

atha prathamapraśne trayoviṃśo 'dhyāyaḥ

1.23.1

athāto rājābhiṣekaṃ vyākhyāsyāmaḥ \1\

1.23.2

pūrvapakṣasva pañcamyāṃ trayodaśyāṃ tiṣye śroṇāyāṃ vā yāni cānyāni śubhāni nakṣatrāṇi teṣu pūrvedyureva yugmān brāhmaṇān bhojayet \2\

1.23.3

āśiṣo vācayitvā yonigotraśrutavṛttasampannaṃ brāhmaṇaṃ purohitaṃ vṛṇīta ākūtyai tvā kāmāya tvā iti \3\

1.23.4

purohito japati ākūtimasyāvase \ kāmamasya samṛddhyai \ indrasya yuñjate dhiyaḥ iti \4\

1.23.5

svayaṃ japati ākūtiṃ devīṃ manasaḥ purodadhe yajñasya mātāṃ suhavā me astu \ yadicchāmi manasā sakāmo videyamenaddhṛdaye niviṣṭam iti \5\

1.23.6

athāstamita āditye padmākṛtiṃ maṇḍala kṛtvopakalpayate vrīhibhiryavaistilamāṣaiḥ pañcagavyaissāmudrāścāpo nadyāścaudumbaraṃ bhadrāsanaṃ vyāghracarma hemakalaśairgośṛṅgaiśca sambhṛtya saha sādayati yatsaha sarvāṇi mānuṣāṇi ityetasmāt brāhmaṇāt \6\

1.23.7

uttarapūrve deśe 'gārasya pākayajñavidhānena vrīhibhiryavaistilamāṣairvyāṃhṛtibhirmahāvyāhṛtibhissāvitryā ca triyambakenāṣṭasahasraṃ juhoti \7\

1.23.8

atha dakṣiṇārdhe śrīsuktavidhānena śrīdevīmārādhya makuṭaṃ prakṣāḷayati \8\

1.23.9

gāyatryā gṛhya gosūtraṃ gandhadvāreti gomayam \ āpyāyasveti ca kṣīraṃ dadhikrāvṇeti vai dadhi \ śukramasītyājyaṃ devasya tveti kuśodakam \ iti \9\

1.23.10

makuṭaṃ prakṣāḷya pratisaraṃ badhnāti pratatte adya śipiviṣṭa iti \10\

1.23.11

rājānaṃ rājavāhanaṃ cāgre 'bhiṣiñcet \11\

1.23.12

athaitāṃ rātrimupaviśet saṃviśedvā \12\

1.23.13

athodita āditye bhadrāsanaṃ nidhāya tatmin vyāghracarmāstīryaṃ tasmin prāṅmukha upaviśya hemakalaśānādāya āpo hiṣṭhā mayobhuvaḥ iti tisṛbhiḥ hiraṇyavarṇāśśucayaḥ pāvakāḥ iti catasṛbhirgṛhṇāti \13\

1.23.14

ava te heḍaḥ uduttamam iti dvābhyām āpo bhadrāḥ āditpaśyāmi iti cābhiṣicya abliṅgābhirvāruṇībhirhiraṇyavarṇābhiḥ pāvamānībhiranyaiśca pavitramantrairatha śṛṅgodakaiścābhiṣiñcati \14\

1.23.15

apāṃ yo dravaṇe rasastamahamasmā āmuṣyāyaṇāya tejase śriyai yaśase brahmavarcasāyānnādyāyābhiṣiñcāmi iti sammṛṣṭe samutkrośantīti samānamāmukhasya vimārjanāt \15\

1.23.16

etasmin kāle rājavāhanaṃ cābhiṣiñcet \16\

1.23.17

snāpayitvā brāhmaṇebhyo niṣkasahasraṃ dāsīśataṃ dadāti \17\

1.23.18

svastyayanaṃ vācayityā makuṭaṃ vā paṭṭaṃ vā karoti agne yaśasvin yaśasemamarpaya iti \18\

1.23.19

atha dundubhiśabdaṃ karoti dundubhīn samāghnanti iti brāhmaṇam \19\

1.23.20

pradakṣiṇīkṛtya svarāṣṭramanupālayatītyāha bhagavān bodhāyanaḥ \20\
iti bodhāyanagṛhyaśeṣe prathamapraśne trayoviṃśo 'dhyāyaḥ

Linked texts (2)