Ekagnikanda 2.20901

2.20901

iti dvitīyapro aṣṭamaḥ khaṇḍaḥ ||
mayi̍ parvatapūru̱ṣam | mayi̍ parvatavarca̱sam | mayi̍ parvatabheṣa̱jam | mayi̍ parvatāyu̱ṣam | yanme̱ varca̍ḥ
pa̱rāga̍tamā̱tmāna̍mupa̱tiṣṭha̍ti | i̱dantatpuna̱rāda̍de
dīrghāyu̱tvāya̱ varca̍se | pra̱ti̱ṣṭhe stho̍ de̱vatā̍nā̱ṃ mā mā̱ santā̎ptam | pra̱jāpa̍te̱śśara̍ṇamasi̱
brahma̍ṇaścha̱dirvi̍śvaja̱nasya̍ chā̱yā'si̍ sa̱rvato̍ mā pāhi |
de̱vasya̍ tvā savi̱tuḥ pra̍sa̱ve̎'śvino̎rbā̱hubhyā̎ṃ pū̱ṣṇo hastā̎bhyā̱mā da̍de dviṣa̱to
va̱dhāyendra̍sya̱ vajro̍'si̱ vārtrā̱̍śśarma̍ me bhava̱ yatpā̱pantannivā̍raya |
devī̎ṣṣaḍurvī̱ritye̱ṣā | rā̱ṣṭra̱bhṛda̍syācāryāsa̱ndī mā tvadyo̍ṣam̐ rāṣṭra̱bhṛda̍si samrāḍāsa̱ndī
mā tvadyo̍ṣam̐ rāṣṭra̱bhṛda̍syadhipatnyāsa̱ndī mā tvadyo̍ṣam |
āpa̍ḥ pādāva̱neja̍nīrdvi̱ṣanta̍ṃ nāśayantu me | a̱sminkule̎ brahmavarca̱sya̍sāni | mayi̱ maho̱
mayi̱ yaśo̱ mayī̎ndri̱yaṃ vī̱rya̎m | āmā̍'ga̱ṉ yaśa̍sā̱
varca̍sā̱ sam̐sṛ̍ja̱ paya̍sā̱ teja̍sā ca | taṃ mā̎ pri̱yaṃ pra̱jānā̎ṃ ku̱rvadhi̍patiṃ paśū̱nām |
vi̱rājo̱ doho̍'si vi̱rājo̱ doha̍maśīya̱ mama̱ padyā̍ya̱ virā̍ja |
sa̱mu̱draṃ va̱ḥ prahi̍ṇomi̱ svāṃ yoni̱mapi̍ gacchata | acchi̍draḥ pra̱jayā̍ bhūyāsa̱ṃ mā parā̍ seci̱ matpaya̍ḥ || (9)