Ekagnikanda 2.21801

2.21801

pa̱ra̱me̱ṣṭhyasi̍ para̱māṃ mā̱m̱̐ śriya̍ṃ gamaya | pra̱tyava̍rūḍho no hema̱ntaḥ | prati̍kṣa̱tre prati̍tiṣṭhāmi
rā̱ṣṭre | pratyaśve̍ṣu̱ prati̍tiṣṭhāmi̱
goṣu̍ | prati̍pra̱jāyā̱ṃ prati̍tiṣṭhāmi̱ bhavye̎ | i̱ha dhṛti̍ri̱ha vidhṛ̍tiḥ | i̱ha ranti̍ri̱ha
rama̍tiḥ | syo̱nā pṛ̍thivi̱ baḍi̱tthā parva̍tānā̱miti̱ dve |
ā tvā̍ vahantu̱ hara̍ya̱ssace̍tasaśśve̱tairaśvai̎ssa̱ha ke̍tu̱mi̍ḥ | vātā̍jirai̱rmama̍ ha̱vyāya̍
śarva | upa̍spṛśatu mīā̱nmī̱ḍhuṣe̱ svāhopa̍spṛśatu mī̱ḍhuṣī̍
mī̱ḍhuṣyai̱ svāhā̎ | ja̱ya̱ntopa̍spṛśa jaya̱ntāya̱ svāhā̎ | bha̱vāya̍ de̱vāya̱ svāhā̍ śa̱rvāya̍
de̱vāya̱ svāheśā̍nāya de̱vāya̱ svāhā̍ paśu̱pata̍ye de̱vāya̱
svāhā̍ ru̱drāya̍ de̱vāya̱ svāho̱grāya̍ de̱vāya̱ svāhā̍ bhī̱māya̍ de̱vāya̱ svāhā̍ maha̱te
de̱vāya̱ svāhā̎ | bha̱vasya̍ de̱vasya̱ pa̱tnyai svāhā̍ śa̱rvasya̍ de̱vasya̱
patnyai̱ svāheśā̍nasya de̱vasya̱ patnyai̱ svāhā̍ paśu̱pate̎rde̱vasya̱ patnyai̱ svāhā̍ ru̱drasya̍
de̱vasya̱ patnyai̱ svāho̱grasya̍ de̱vasya̱ patnyai̱ svāhā̍ bhī̱masya̍ de̱vasya̱
patnyai̱ svāhā̍ maha̱to de̱vasya̱ patnyai̱ svāhā̎ | ja̱ya̱ntāya̱ svāhā̎ | a̱graye̎ sviṣṭa̱kṛte̱
suhu̍tahuta̱ āhu̍tīnā̱ṃ kāmā̍nām̐ samarddhayi̱tre svāhā̎ | sva̱sti
na̍ḥ pūrṇa̱mukha̱ḥ pari̍krāmatu | gṛ̱ha̱popa̍spṛśa gṛha̱pāya̱ svāhā̎ | gṛ̱ha̱pyupa̍spṛśa gṛha̱pyai
svāhā̎ | gho̱ṣiṇa̱ upa̱spṛśata gho̱ṣibhya̱ḥ svāhā̎ | śvā̱sina̱
upa̍spṛśata śvā̱sibhya̱ḥ svāhā̎ | vi̱ci̱nvanta̱ upa̍spṛśata vici̱nva̱ḥ svāhā̎ | pra̱pu̱nvanta̱
upa̍spṛśata prapu̱nva̱ḥ svāhā̎ | sa̱mā̱nta̱ upa̍spṛśata
samā̱̱ḥ svāhā̎ | de̱va̱se̱nā upa̍spṛśata devase̱nābhya̱ḥ svāhā̎ | yā ākhyā̍tā̱ yāścānā̎khyātā
devase̱nā upa̍spṛśata devase̱nābhya̱ḥ svāhā̎ |
dvā̱rā̱popa̍spṛśa dvārā̱pāya̱ svāhā̎ | dvā̱rā̱pyupa̍spṛśa dvārā̱pyai svāhā̎ | a̱nvā̱sā̱riṇa̱
upa̍spṛśatānvāsā̱ribhya̱ssvāhā̎ | ni̱ṣa̱nniupa̍spṛśa niṣa̱ṇie̱
svāhā̎ | namo̍ niṣa̱ṇi̍ iṣudhi̱mate̱ kṣetra̍sya̱ pati̍nā va̱yamiti̱ dve || (18)