Kathakagrihyasutra 79.3

79.3

raudryaḥ, jagatyaḥ, asitasya devalasyārṣam| gavāṃ rogaśamanamādyayā| he rudra, no'smān mṛḍa sukhaya, uta api ca no'smākaṃ mayaḥ sukhaṃ kṛdhi kuru| te tubhyaṃ namaskāreṇānnena vā vidhema paricarāmaḥ, tubhyamannaṃ dadma iti vā vyatyayena yojanā| kīdṛśāya te| kṣayadvīrāya kṣīyamāṇā vīrā vikrāntāḥ śatravo yasya saṃnidhau, sa kṣaya-
dvīrastasmai| kiñca, he rudra tadaśyāma vyāpyāma vayaṃtava praṇītibhiḥ praṇayaiḥ praṇayanairvā arcanaiḥ| kiṃ tat| yat śaṃ ca sukhaṃ ca, yośca subvyatyayena yuṃ ca, ‘yu pṛthagbhāve’ rogasya pṛthagbhāvaṃ manuḥ prajāpatirāyeje, dānārtho'tra yajiḥ, dadau prajābhyo yatsukhaṃ nīrogatvaṃ ca, tadaśyāma| pitā prajānā janakaḥ|
he rudra mīḍhvaḥ sektaḥ mādhyamikarūpeṇa anayā devayajyayā devayāgena tava sumatiṃ śobhanabuddhimaśyāma| kiñca asmākamasmān adviṣaḥ śatrurahitān kuru sumnāyan sukhayan| riṣṭavīrā juhavāma te haviḥ, evaṃ sati tava haviḥ juhumo riṣṭavīrāḥ hataśatravaḥ santa iti tavāpyupacayo bhavati|
vayaṃ rudraṃ nihvayāmahe āhvayāmaḥ, sumatiṃ ca vṛṇīmahe yācāmahe asmāt| iditi pādapūraṇe| kiñca āhūto'bhyarthitaśca rudraḥ asmat asmattaḥ heḍaḥ krodhamamatiṃ kumatimāre dūre asyatu| kīdṛśaṃ rudram| tveṣaṃ dīptam| yajñasya sādhanabhūtaṃ tasyoddeśyatvāt tatra, vaṅkuṃ, gatyartho vañciḥ, gantāram| gatirahito hyāhūtaḥ kiṃ kuryāt| kaviṃ krāntadarśanam| kimarthamāhvayāmaḥ| avase rakṣaṇāya annāya ca|
iha gāvaḥ, ayaṃ yajñaḥ, ā naḥ prajāmiti nityā vyākhyātā dadhikrāvṇa iti ca||