Kathakagrihyasutra 81: atha ṣaṣṭitamī kāṇḍikā

Kāṭhakagṛhyasūtrabhāṣya 81

Language: Sanskrit

81.11 — 4 parts

atha ṣaṣṭitamī kāṇḍikā

agre hāyanasya āgrahāyaṇī, agre vā hāyano asyā āgrahāyaṇī| hāyanaḥ saṃvatsaraḥ, tasyāgre ārambhe vā, yasyā vā agre puro hāyanaḥ, sā āgrahāyaṇī| sā tu mārgaśīrṣasya paurṇamāsī| saiva saṃvatsarasyāgre, tasyā vā saṃvatsaro'gre caitrāmāvasyāyā hi ārabhya tadanta eva jyotiḥśāstre saṃvatsaraḥ prasiddhaścaitrādimāsayuktaḥ iti| ādivyavahārādṛḍhatve adūraviprakarṣeṇa yogo'pyastīti nirvacanam| paurṇamāsyaścatasraḥ svastyayanasyoktāḥ - śrāvaṇyāśvayujyāgrahāyaṇī caitrī ceti| tatrāgrahāyaṇyā caitrādisaṃvatsaraḥ puraḥ, sā vā tasya pūrvā| tatra tānyeva catvāri havīṃṣyāsādayet, yāni śrāvaṇyāmuktāni||

81.2

apūpo'tra yavamayaḥ| sthālīpākastu vrīhimaya iti śeṣaḥ| evaṃ cātra trayo yavamayāḥ sampannāḥ - apūpā dhānāḥ saktava iti|

81.3

evā vandasvetyādinā mantreṇa apūpasyāvadānadvayaṃ juhoti|

81.4

gatārtham|

81.5

dhānāsaktūnāṃ yat karma, taduktameva śrāvaṇyāṃ tathaiva kartavyaṃ, nāsti tatra viśeṣaḥ|

81.6

vyākhyāsyamānā vāruṇyaḥ|

81.7

juhuyādityanuṣaṅgaḥ | etā api iha gāva ityādyāstisro vyākhyātāḥ | sarvatra māntravarṇikyo devatāḥ |

81.8

nityābhirhutvā, tvāmagne iti dvābhyāṃ juhoti | tata udīcyāṃ diśi daśā yasya bhavanti tādṛśamāstaraṇaṃ prastaraṇapaṭādikamāstīrya bhūmiśayyāyāṃ pratistīrya, yatra śirastatrodakaṃ nidhāya, tatra ca vrīhiyavān prakṣipya, śayyāmāpohiṣṭhīyābhistisṛbhirabhyukṣya trātāramindramiti śamīśākhayā śayyāṃ nimārṣṭi śodhayati |

81.9

aindrāgnaṃ varmetyādinā mantreṇānupabhuktaṃ hemantayogyaṃ vāsaḥ paridhāya, syonā pṛthivītyādinā jyotiṣmatītyantena saṃviśati śayyāṃ dakṣiṇena pārśvena | sarvānuvākanivṛttyarthaṃ jyotiṣmatyantagrahaṇam |

81.10

uttaraṃ dviḥ karma kartavyam | kiṃ tat | abhyukṣaṇādisaṃviśatyevam, evaśabdo'ntavacanaḥ, saṃveśanamityarthaḥ |

81.11.1

evaṃśabdaḥ sambandhanīyaḥ | evameva caitryāṃ paurṇamāsyāṃ karma kartavyaṃ, yathā āgrahāyaṇyāmuktam | etavāṃstu viśeṣaḥ - atropariśayyā, abhūmau khadvāyāmityarthaḥ | asmādeva āgrahāyaṇyāṃ bhūmau śayyā gamyate | ata evātrodrohaṇam ūrdhvaṃ rohaṇamārohaṇam| ata evodrohaṇamityanvartha nāmāsya karmaṇa iṣṭam | ayamaparo viśeṣaḥ - nātra sthālīpākaḥ, nāpi śamīśākhayā nimārjanam | pariśiṣṭaṃ tu sakalamāgrahāyaṇyā tulyam | vāruṇī| triṣṭup| aśvinorārṣam| ātmanā ātmocyate| varuṇameva vandasva| kīdṛśam| vṛhantaṃ mahāntam| na kevalaṃ taṃ stuhi, yāvatā namasyā namaskuru ca| dhīraṃ, dhīrvidyate yasya sa dhīraḥ, matvarthīyo raḥ, tam| amṛtasya gopām, amṛtamudakaṃ tasya goptāraṃ rakṣakampatitvāt| sa naḥ śarma trivarūthaṃ viya̍sat, sa stuto namaskṛtaśca san asmabhyaṃ śarma sukhaṃ śaraṇaṃ vā gṛhaṃ viśeṣeṇa yacchatu dadātu| viyaṃsaditi liṅarthe leṭ| kīdṛśaṃ śarma| trivarūthaṃ tribhirdharmārthakāmairniyataṃ, ṛgyajusāmabhirvā dhriyamāṇatvāt trivarūthaṃ, tribhiloṃkairvā| pātaṃ no dyāvāpṛthivī upasthe, he dyāvāpṛthivyau asmān pātaṃ rakṣataṃ upasthe utsaṅge kṛtvā māteva putram|

81.11.2

81.11.3

81.11.4

iyaṃ vāk mantrātmikā tvāṃ samudre upadadhātu, samyak mudaṃ sukhaṃ nityānandaṃ rātīti samudraḥ, brahmaṇi pāramārthike advitīye sthāpayatvityarthaḥ| athavā jaladhimāśritā pṛth‍vī, sā gurutvātiśayayoginī satī mantrabalena samudre tiṣṭhatu plavamānā amagnā| kīdṛśīṃ tvām| suprajāvaniṃ śobhanāṃ prajāṃ vanati vibhajate suprajāvanistām| evaṃ rāyaspoṣavanim| kimartham| mahyaṃ madartham| kīdṛśāya| vājināya vājena annena yuktāya| mahī mahatī, dhruvā sthirā, salilayuktā asi bhavasi, (jyotiṣmatī jyotiṣā yuktā'si) he pṛthivi| atra ṛtudvayasthāpanārthaṃ śayyāprokṣaṇādisaṃskāraṃ kṛtvā ṛtutithyādi kartavyam|

Linked texts (1)

Kāṭhakagṛhyasūtra — Laugākṣi, Sanskrit