Kaushikasutra 13.2

13.2

[94].1) atha yatra_etāni varṣāṇi varṣanti ghṛtaṃ māṃsaṃ madhu ca yad dhiraṇyaṃ yāni cāpi_anyāni ghorāṇi varṣāṇi varṣanti tat parābhavati kulaṃ vā grāmo vā janapado vā
[94].2) tatra rājā bhūmipatir vidvāṃsaṃ brahmāṇam ichet
[94].3) eṣa ha vai vidvān yad bhṛgvaṅgirovit
[94].4) ete ha vā asya sarvasya śamayitāraḥ pālayitāro yad bhṛgvaṅgirasaḥ
[94].5) sa āha_upakalpayadhvam iti
[94].6) tad upakalpayante kaṃsamahate vasane śuddham ājyaṃ śāntā oṣadhīr navam udakumbham
[94].7) trīṇi parvāṇi karmaṇaḥ paurṇamāsyamāvāsye puṇyaṃ nakṣatram
[94].8) api ced eva yadā kadā ārtāya kuryāt
[94].9) snāto_ahatavasanaḥ surabhir vratavān karmaṇya upavasati_ekarātraṃ trirātraṃ ṣaḍrātraṃ dvādaśarātraṃ vā
[94].10) dvādaśyāḥ prātar yatra_evādaḥ patitaṃ bhavati tata uttaram agnim upasamādhāya
[94].11) parisamuhya paryukṣya paristīrya barhir udapātram upasādya paricaraṇenājyaṃ paricarya
[94].12) nityān purastāddhomān hutvājyabhāgau ca
[94].13) atha juhoti
[94].14) <ghṛtasya dhārā iha yā varṣanti pakvaṃ māṃsaṃ madhu ca yad dhiraṇyam | dviṣantam etā anu yantu vṛṣṭayo 'pāṃ vṛṣṭayo bahulāḥ santu mahyam || lohitavarṣaṃ madhupāṃsuvarṣaṃ yad vā varṣaṃ ghoram aniṣṭam anyat | dviṣantam ete anu yantu sarve parāñco yantu nirvartamānāḥ || agnaye svāhā [-]>_iti hutvā
[94].15) <divyo gandharvo [2.2.1]>_iti mātṛnāmabhir juhuyāt
[94].16) varam anaḍvāham brāhmaṇaḥ kartre dadyāt
[94].17) sīraṃ vaiśyo_aśvaṃ prādeśiko grāmavaraṃ rājā
[94].18) sā tatra prāyaścittiḥ