Paraskaragrihyasutra 32.10.2

32.10.2

eke ācāryāḥ lomanakhānāmanikṛntanaṃ prāgutsargāt utsargakarmataḥ, arvāk icchanti | utsargaśca ardhaṣaṣṭhānmāsānadhītyotsṛjeyurityevaṃ vakṣyamāṇa iti sūtrārthaḥ | atha paddhatiḥ | śrāvaṇyāṃ paurṇamāsyāṃ śravaṇayuktāyāmayuktāyāṃ vā śravaṇasya śuklapakṣasyām hastayuktāyāmayuktāyāṃ vā upākarma adhyāyopākarma bhavati | tacca adhyāpanaṃ kurvataḥ aupāsanikasya natvanyasya | tatra prathamaprayogavihitamātṛpūjāpūrvakaṃ śrāddham ācārya āvasathyāgnau brahmopaveśanādyājyabhāgānte viśeṣamanutiṣṭhet | taṇḍulasthāne akṣatadhānā āsādayet prokṣaṇakāle prokṣecca | tathopakalpayati | audumbarīḥ samidhaḥ dadhi ākarṣaphalakaṃ tilān bhakṣārthaṃ dhānāḥ | tata ājyabhāgānte vedāhutyādīnāmanumatyantānāṃ vedārambhavaddhomaṃ vidadhyāt | ekadā sarvavedopākaraṇe prativedaṃ svasvāhutidvayaṃ hutvā hutvā brahmaṇe chandobhya ityāhutidvayaṃ punaḥ punarjuhuyāt | prājāpatyādyā anumatyantāḥ saptāhutīretantreṇa | atha sadasaspatimityanayarcā tata āsāditābhirakṣatadhānābhiḥ sruveṇaikāmāhutimācāryo juhoti idaṃ sadasaspataye0 | śiṣyā api mantramanu paṭhanti | tata ācāryaḥ śiṣyāśca sarve audumbarīmārdrāṃ sapalāśāṃ ghṛtāktāṃ ekaikāṃ samidhaṃ tatsaviturityādikayā sāvitryā agnāvādadhyuḥ brahmacāriṇaśca śiṣyā agnikāryamantreṇa tathaiva samidhamādadhuḥ | evaṃ dviraparaṃ dhānāhomaṃ vidhāya ekaikāṃ samidhamādadhyuḥ | tata ācāryaḥ śiṣyāśca upakalpitadhānābhyastistisro'kṣatadhānā dantairanavakhaṇḍayanto bhakṣayeyuḥ śanno bhavantu vājina ityanayarcā | tata ācamya tato dadhikrāvṇo akāriṣamityanayarcā dadhi bhakṣayeyuḥ |