Paraskaragrihyasutra 31.9.4

31.9.4

agnaye sviṣṭakṛta itisviṣṭakṛddhomānantaramudakasparśaḥ | bhūtayajñamāha 'bhūta...thibhyai' dadyāditi śeṣaḥ | parjanyādīnāṃ maṇikopalakṣitabhūpradeśādhāratokteragre ca prāgādau balidānasya vakṣyamāṇatvāttannirūpaṇāyāvapekṣāyāṃ prāgādinirūpakāvadhitvena madhye bhūtagṛhyebhyo balidānamityavasīyate | naca parjanyādīnāmeva bhūtagṛhyateti vācyam | parjanyapadārthāntargatatattaddigavasthitavāyvādīnāṃ ca pṛthagdevatātvānāpatteḥ | tathā ca yathādhikaraṇabhedādevatvaṃ bhidyate tathā nāmabhedādapi devatvabhedaḥ | naca parjanyādyudeśyakadravyatyāgenaiva bhūtagṛhyodeśyakadravyatyāgasya jātatvātikamarthaṃ pṛthak taddānamiti vācyam | bhavanmate parjanyāderbhūtagṛhyapadavācyatayā bhūtagṛhyodeśyakadānasyaiva parjanyodeśyakadānatayā kimarthaṃ parjanyādyudeśakānekabalidānaṃ gauravāt | brahmādīnāṃ bhūtagṛhyatāyāṃ niyāmakābhāvāceti na kiṃcidetat | maṇika iti sāmīpyasaptamī maṇikasamīpe prāksaṃsthaṃ balitrayaṃ dadyāt balidānaṃ cānne udakamāsicya sodakamardhāhutipramāṇam | tadyathā | gṛhamadhye bhūtagṛhyebhyo namaḥ idaṃ bhūtagṛhyebhyaḥ | maṇikasamīpe parjanyāya namaḥ idaṃ parjanyāya | aṅgo namaḥ idamaṅgaḥ | pṛthivyai namaḥ idaṃ pṛthivyai | etadbalitrayaṃ prāksaṃstham | 'dhātre...ryayoḥ' dvārye dvāraśākhe dakṣiṇottare yadi prāgdvāraṃ dakṣiṇadvāraṃ cetpratyakpūrve tayoḥ| tadyathā | dhātre namaḥ idaṃ dhātre vidhātre namaḥ idaṃ vidhātre | 'prati...śāṃ ca' madhye dattādbhūtagṛhyavaleḥ, diśaṃdiśaṃ prati iti pratidiśaṃ vāyave diśāṃ ca |