Varahagrihyasutra 1

1

vārāhagṛhyasūtram|
prāṅmukhamudaṅmukhaṃ vā sūtikālayaṃ kalpayitvā dhruvaṃ prapadye śubhaṃ prapadye iti kāle prapādayet| reto mūtramiti cyāvanībhyāṃ dakṣiṇakukṣimabhimṛśet| śrāvayadvā putraṃ jātamanvakṣaṃ snātaṃ na mātopahanyāt āmantraprayogāt| agnerabhyāhitasya parisamūḍhasya paristīrṇasya paścādahate vāsasi kumāraṃ prākśirasamuttānaṃ saṃveśya pālāśasya madhyamaparṇaṃ praveṣṭya tenāsya karṇāvājapet| bhūstvayi dadhāmīti dakṣiṇe bhurbhuvaḥsvastvayi dadhāmīti savye | athainamabhimantrayet-aśmā bhava paraśurbhava hiraṇyamastṛtaṃ bhava| vedo vai putranāmāsi sa jīva śaradaḥ śataṃ| aṅkādaṅāgātsaṃbhavasi hṛdayādadhijāyase| ātmā vai putranāmāsi sa jīva śaradaḥ śatamiti yatra śete tadabhimṛśet| vedaṃ te bhūmirhṛdayaṃ divi candramasi śritaṃ| vedāmṛtasya devānahaṃ putramahaṃ hṛdamityājyaṃ saṃskṛtya brāhmaṇamāmantrya samidhamādhāyādhārāvādhāryājyabhāgau hutvā vyāhṛtibhiścatasra ājyāhutīrjuhuyāt| jāyābhyātanānāṃ rāṣṭrabhṛtaścaike| kāṃsye camase vāhutisaṃpātānavanīya tasminsuvarṇaṃ saṃnighṛṣya vyāhṛtibhiḥ kumāraṃ catuḥ prāśayedatyantameke suvarṇaprāśanamudake nigṛṣya ādvādaśavarṣatayā iṣaṃ pinvorjaṃ pinveti stanau pradāpayet| dakṣiṇaṃ pūrvaṃ savyaṃ paśacāt sviṣṭakṛtaṃ hutvā prāyaścittāhutīśca samidhamādhāya paryukṣati| eṣa karmānto barhidvāre'gnirnityaḥ| karṇasarṣapayavānāṃ homaḥ| vyāhṛtibhirjuhuyāt| apratirathaṃ japet| indro bhūtasyeti ṣaḍarcaṃ ca sūtikālayaṃ yathākālaṃ samantādudakena pariṣiṃcet||