Hiranyakeshishrautasutra 7.3.1.p1.7

7.3.1.p1.7

somayāgo lakṣyate | vicchidyete iti dvivacanaṃ vedavedyabhiprāyeṇa | vicchidyeteti pāṭha ṛjureva | vediśabdo dīrghaikārāntaḥ | yasya vedaśca vediśceti pāṭhaḥ sarala eva | aindrāgnaḥ paśuḥ
punarutsṛṣṭa aindrāgnaṃ punarutsṛṣṭamālabheteti śruteḥ | vāhotsṛṣṭaḥ punarvāhanapunarutsṛṣṭaḥ | liṅgaṃ
cātra bhavati punarutsṛṣṭa iva hyetasya somapītha iti | sa ca cchāgaḥ | tathā ca bhāradvājaḥ—
chāgaḥ punarutsṛṣṭa iti | punarutsṛṣṭo'naḍvāniti sūtrāntare | gopaśuḥ punarutsṛṣṭo'gnīṣomīyo bhavatīti śākhāntare | asyāṃ śrutau punarutsṛṣṭaśabdārthasya gośabde viśeṣaṇādgo vyatirikte chāge'pi punarutsṛṣṭabhāktvamastīti gamyate | chāge vahanakartṛtvaṃ himācale prasiddham | baudhāyanastu aindrāgnamanusṛṣṭamālabhetetyāha | etallakṣaṇamapyāha sa eva
yamayoryaḥ paro jātaḥ so'nusṛṣṭa iti | atrāpi cchāga eva | kalau goyāgasya
niṣedhācchāga eva grāhyaḥ | tatra somātpūrvabhāvinoḥ parvaṇorupādānapṛthaktvātkrameṇaitau
kartavyau | tatra prathamaparvaṇyaindrāgnaḥ paśuḥ, tadanantaraparvaṇyāśvinaḥ, asaṃbhave somātpūrvabhāvinyekasminneva parvaṇi samānatantrāvetau kartavyau | atrāpi pāṭhakramātpūrva aindrāgno'nantara āśvinaḥ | pañcapaśuprakṛtitvādaindrāgnavikārau | pakṣe'gnīṣomīyavikāratvamapi
atra jñāpakamagre vakṣyate | samānatantratve dvivacanānta ūhaḥ | tantrāntaḥpātitvātṣaḍḍhotṛpaśviṣṭī vidyete eva | evaṃ dakṣiṇā'pi | samānatantratve'pyeka eva ṣaḍḍhotā, ekaiva