Vaiyakaranasiddhantakaumudi 21.1.p19

21.1.p19

tadāha--prasaktasyeti | tatra śravaṇā'bhāvātmake lope vihite śravaṇārthamuccāraṇamapi nāstītyarthāllabhyate | prasaktasya kim? dadhītyādau kvipo'śravaṇātmakalopasya pratyayalakṣaṇamāśritya hrasvasya piti kṛtīti tugmā bhūt | saṃyogāntasya lopaḥ | padasyetyadhikṛtam | saṃyogo'nto yasyeti vigrahaḥ | saṃyogāntasya padasya lopa ityanvayaḥ | na ca kṛtsnapadasya lopaḥ kintvalo'ntyasyeti paribhāṣayā tadantasyaiva | tadāha--saṃyogāntamityādinā | atra antagrahaṇaṃ spaṣṭārthameva | saṃyogasya padaviśeṣaṇatayā yena vidhirityeva tadantalābhāt | yattu saṃyogāvantau yasyeti vigrahalābhārthamantagrahaṇam | anyathā sudṛṣatprāsāda ityatra pakārāt pūrvasyatakārasya lopaḥ syāditi, tanna, saṃyogasaṃjñāyā vyāsajyavṛttitvāt, pratyekavṛttitvamabyupagamyā|ñantagrahaṇaprayojanavarṇanasya vyarthatvāditi śabdaratne vistaraḥ |