Kurmapurana 4.p7

4.p7

puruṣādhiṣṭhitatvācca avyaktānugraheṇa ca | mahadādayo viśeṣāttā hyaṇḍamutpādayanti te || ekakālasamutpannaṃ jalabudbudavacca tat | viśeṣebhyo'ṇḍamabhavadvṛhattadudakeśayam || tasmin kāryyasya karaṇaṃ saṃsiddhaṃ parameṣṭhinaḥ | prākṛte'ṇḍe vivṛtte tu kṣetrajño brahmasaṃśritaḥ || sa vai śarīrī prathamaḥ sa vai puruṣa ucyate | ādikarttā sa bhūtānāṃ brahmāye samavarttata || yamāhuḥ puruṣaṃ haṃsaṃ pradhānātparataḥ sthitam | hiraṇyagarbhaṃ kapilaṃ chandomūrttiṃ sanātanam || merurulbamabhūttasya jarāyuścāpi parvatāḥ‡ | garbhodakaṃ samudrāśca tasyāsanparamātmanaḥ || tasminnaṇḍe'bhavadviśvaṃ sadevāsuramānuṣam | candrādityau sanakṣatrau sagraho saha vāyunā | adbhirdaśaguṇābhiśca bāhyato'ṇḍaṃ samāvṛtam | āpo daśaguṇenaiva tejasā bāhyato vṛtāḥ