Kurmapurana 9.p3

9.p3

tatra nārāyaṇo devo nirjjane nirupaplave | āśritya śeṣaśayanaṃ suṣvāpa puruṣottamaḥ || sahasraśīrṣā bhūtvā sa sahasrākṣaḥ sahasrapāt | sahasrabāhuḥ sarvvajñaścintyamāno manīṣibhiḥ | pītavāsā viśālākṣo nīlajīmūtasannibhaḥ | tato† vibhūtiyogātmā yogināṃ tu dayāparaḥ‡ || kadācittasya suptasya līlārthaṃ divyamadbhutam§ | trailokyasāraṃ vimalaṃ nābhyāṃ paṅkajamudbabhau | śatayojanavistīrṇaṃ taruṇādityasannibham | divyagandhamayaṃ puṇyaṃ karṇikākesarānvitam || tasyaivaṃ suciraṃ kālaṃ varttamānasya śārṅgiṇaḥ | hiraṇyagarbho bhagavāṃstaṃ deśamupacakrame || sa taṃ kareṇa viśvātmā samutthāpya sanātanam | provāca madhuraṃ vākyaṃ māyayā tasya mohitaḥ || asminnekārṇave ghore nirjane tamasāvṛte | ekākī ko bhavāṃśchete brūhi me puruṣarṣabha