Basavapuranam 20.2

20.2

agastya uvāca .. kumārāya namastubhyaṃ kumārācalavāsin ..
punaśca śrotumicchāmi bhaktamāhātmyamuttamam .. 1 ..
agastyavacanaṃ śrutvā tasmai skaṃdaḥ punastathā ..
mugdhabhaktakathāmanyāmūce sarvāghanāśinīm .. 2 ..
kumāra uvāca ..
tatastu basavaḥ śrīmān śrīcannabasaveśvaram ..
mugdhānāmeva māhātmyaṃ vaktuṃ samupacakrame .. 3 ..
śrīmatkāṃcīpure ramye nānāmunigaṇāvṛte ..
tatrābhūdbrāhmaṇaḥ kaścicchivabhakto dṛḍhavrataḥ .. 4 ..
namittaṃḍiriti khyāto mugdhabhaktisamāvṛtaḥ ..
so'pyekāmreśvaraṃ draṣṭuṃ gajāsuraniṣūdanam .. 5 ..
atyadbhutākāradharaṃ bāleṃdukṛtaśekharam ..
kālakaṃṭhaṃ virūpākṣaṃ tūrṇamabhyāyayau dvijaḥ .. 6 ..
ekaṃ śivārcakaṃ dṛṣṭvā samāhūyedamabravīt ..
śivasya madhyabhāgo'yaṃ kuṭilaṃ paridṛśyate .. 7 ..
vakrabhāvaṃ samāsādya hastau vā parameśituḥ ..
rogādinā vā tau pīnau kimetattiṣṭhate'dhunā .. 8 ..
tridhānanaṃ sadavanīṃ spṛṣṭamaspṛṣṭavattathā ..
vartate padayorekamanyaddūreca tiṣṭhati .. 9 ..