Basavapuranam 20.5

20.5

p. 163) nāṭyasyābhimukhaścāhaṃ ḍhakkāṃ saṃtāḍayāmi cet .. 30 ..
sarvaṃ vilayamāpnoti jagadetaccarācaram ..
nṛttārthaṃ calite pāde tārā bhuvi pataṃti hi .. 31 ..
nirīkṣaṇena mahatā brahmaviṣṇvādayaḥ surāḥ ..
līyante kutraciddeśe bhayabhrāntavilocanāḥ .. 32 ..
kiṃkiṇīnādasaṃbhrāntā devī girivarātmajā ..
mama vāmāṃgabhāgasthā vepamānā bhayārtitaḥ .. 33 ..
niśvāsaiśca tathocchvāsairjvalite vaḍavānale ..
samudrāḥ śuṣkatāmāpurnadībhiśca samākulāḥ .. 34 ..
matpādaghaṭṭanairbhūmī rajorāśistathā'bhavat ..
bhrāntāśca diggajāḥ sarve ninadurmayi saṃsthite .. 35 ..
bhraśyatkuṭhārapātena girayaścūrṇatāṃ yayuḥ ..
pādāgratāḍanātkūrmamukhātsasrāva śoṇitam .. 36 ..
jaṭāchaṭābhighātena bhinno brahmāṃḍakharparaḥ ..
utpāṭitāni bhūtāni kirīṭāgrasya ghaṭṭanāt .. 37 ..
śeṣo bhugnaphaṇo jātastāṇḍavoddhatavegataḥ ..