Rasasudhakara 2.187

2.187

yathā—
āmodamāmodanamādadhānaṃ nilīnanīlālakacañcarīkam
padmālayāyā mukhapadmamasyā nirūḍharāgaṃ kṛtamātapena
tacceṣṭā līlāvilāsādyaḥ | te'pyanubhāvaprakaraṇe
vakṣyante | athālaṅkṛtiḥ—
caturdhālaṅkṛtirvāsobhūṣāmālyānulepanaiḥ
tatra vastrālaṅkāro yathā—
kṣīrodveleva saphenapuñjā paryāptacandreva śarattriyāmā
navaṃ navakṣaumanivāsinī sā bhūyo babhau darpaṇamādadhānā
bhūṣālaṅkāro yathā—
sā sambhavadbhiḥ kusumairlateva jyotirbhirudyadbhiriva triyāmā
saridvihaṅgairiva līyamānairromucyamānābharaṇā cakāśe
mālyānulepanālaṅkāro yathā—
ālolairanumīyate madhukaraiḥ keśeṣu mālyagrahaḥ
kāntiḥ kāpi kapolayoḥ prathayate tāmbūlamantargatam
aṅgānāmavagamyate parimalairālepanaprakriyā
veṣaḥ ko'pi vidagdha eṣa sudṛśaḥ sūte sukhaṃ cakṣuṣoḥ
atha taṭasthāḥ -
taṭasthāścandrikā dhārāgṛhacandrodayāvapi