Rasasudhakara 2.190

2.190

tatra candrikāyā uddīpanatvaṃ yathā -
durāsade candrikayā sakhījanairlatānikuñje lalanā nigūhitā
cakoracañcucyutacandrikākaṇaṃ
kuto'pi dṛṣṭvā bhajati sma mūrchanām
dhārāgṛhasya yathā -
sā candrakāntāmapi candrakāntavedīmadhiṣṭhātumapārayantī
dhārāgṛhaṃ prāpya tadapyanaṅgaghorāsidhārāgṛha manvamaṃsta
candrodayasya yathā -
candravimbamudayādrimāgataṃ vañcakena sakhi ! vañcitā vayam
atra kiṃ nijagṛhaṃ nayasva māṃ tatra vā kimiti vivyathe vadhūḥ
kokilālāpasya yathā —
cūtāṅkurāsvādakaṣāyakaṇṭhaḥ puṃskokilo yanmadhuraṃ cukūja
manasvinīmānavighātadakṣaṃ tadeva jātaṃ vacanaṃ smarasya
mākandasya yathā —
ciralālita eṣa bālacūtaḥ svakarāvarjitakumbhavārisekaiḥ
kusumāyudhasāyakān prasūte payasā pannagavardhanaṃ tadetat
mākanda ityaśokānāmapyupalakṣaṇam
mandamārutasya yathā —
bhṛśaṃ nipīto bhujagāṅganābhirvinirgatastadgaralena sākam
tadanyathā cet kathamakṣiṇot tāmadakṣiṇo dakṣiṇamātariśvā
ṣaṭpadasvarūpasya yathā —
madhuvratānāṃ madaimantharāṇāṃ mantrairapūrvairiva mañjunādaiḥ
madhuśriyo mānavatījanānāṃ mānagrahoccāṭanamācaranti
latāmaṇḍapasya yathā —
eṣā pūgavatī praphullaikuṭajaiḥ paryantacūtadrumā
tanmadhye'pi sarovaraṃ nidhuvanāntānandamandānilam
tattīre kadalīgṛhaṃ vilasitaṃ tasyāntare mallikāvallīmaṇḍapamatra sā sunayanā tvanmārgamevekṣate
bhūgehasya yathā—
kālāgarūdgārasugandhigandhadhūpādhivāsāśrayabhūgṛheṣu
na tatrasurmāghasamīraṇebhyaḥ śyāmākucopmāśrayiṇaḥ pumāṃsaḥ
dīrghikāyā yathā —
etasmin maṭkalamallikākṣapakṣavyādhūtasphuradurudaṇḍapuṇḍarīkāḥ
bāṣpāmbhaḥpariptanodgamantarāle
sandṛṣṭāḥ kuvalayino mayā vibhāgāḥ
jaladāravasya yathā —
manasvinīnāṃ manaso'pi mānastathāpanīto ghanagarjitena
yathopagūḍhāḥ prathitāgaso'pi kṣaṇaṃ vidagdhāḥ kupitā ivāsan
atra jaladāravagrahaṇaṃ vidyudādīnāmapyupalakṣaṇam | vidyuto yathā —
varṣāsu tāsu kṣaṇarukprakāśāt
trastā ramā śārṅgiṇamāliliṅga
vidyucca sā vīkṣya tadaṅgaśobhāṃ
hrīṇeva tūrṇaṃ jaladaṃ jagāhe
prāsādagarbhasya yathā —
gopānasīsaṃśritabarhiṇeṣu kapotaśiñjānakapotakeṣu
prāsādagarbheṣu ramādvitīyo reme payodāniladurgameṣu
saṅgītasya yathā —
mādhavo madhuramādhavīlatāmaṇḍape paṭuraṭanmadhuvrate
sañjagau śravaṇacāru gopikāmānamīnabaliśena veṇunā
krīḍādreryathā —
nīcairākhyaṃ girimadhivasestatra viśrāmahetostvatsamparkāt pulakitamiva prauḍhapuṣpaiḥ kadambaiḥ
yaḥ paṇyastrīratiparimalodgāribhirnāgarāṇāmuddāmāni prathayati śilāveśmabhiryauvanāni
sarito yathā —
athormimālonmadarājahaṃse rodholatāpuṣpavahe sarayvāḥ
vihartumicchā vanitāsakhasya tasyāmbhasi grīṣmasukhe babhūva
athānubhāvāḥ—
bhāvaṃ manogataṃ sākṣāt svahetuṃ vyañjayanti ye
te'nubhāvā iti khyātā bhrūvikṣepasmitādayaḥ