Rasasudhakara 3.276

3.276

mukhyaṃ bhayahāsyajaṃ yathā -
'kṣetrādhīśaśunā navena vikṛtākārairvidveṣiṇā
ghorārāvamabhidrutasya vikaṭaiḥ paścāt padairgacchataḥ
pā pā pāhi hi hīti satvarataraṃ vyastākṣaraṃ jalpato
dṛṣṭvā bhṛṅgiriṭerdaśāṃ paśupatiḥ smerānanaḥ pātu vaḥ ||'
vācānyarasāngaṃ bhayahāsyajaṃ yathā ratnāvalyāṃ—
'vidūṣakaḥ -- kahaṃ ṇa kido pasādo devīe, jaṃ
ajja vi akkhadasarorā ciṭṭhaha
rājā— (sasmitam) mūrkha ! kiṃ parihasasi | tvatkṛta
evāpatito'yamasmākaṃ mahānanarthaḥ |'
ityādau vidūṣakavākyajanitasya bhayahāsyasya śṛṅgārāṅgatayā kathitatvādikṣamaṅgaṃ bhayahāsyajam
veṣeṇa yathā -'kalyāṇadāyi bhavato'stu pinākapāṇipāṇigrahe bhujagakaṅkaṇabhīṣitāyāḥ
sambhrāntadṛṣṭi sahasaiva namaḥ śivāyetyarthoktisammitanataṃ mukhamambikāyāḥ ||'
atra bhujagakaṅkaṇalakṣaṇena veṣeṇa janitasya pārvatībhayahāsyasya śṛṅgārāṅgatayā kathanāt tadidamaṅgaṃ bhayahāsyajam
ceṣṭayā yathā—
'prahlādavatsala ! vayaṃ bibhimo vihārādasmāditi dhvanitanarmasu gopikāsu
līlāmṛdu stanataṭeṣu nakhāṅkurāṇi
vyāpārayannavatu mammanṛpaṃ mukundaḥ ||'
agrāmyanarmanirmāṇavedinā śiṅgabhūbhujā
narmāṣṭādaśadhā bhinnamevaṃ sphuṭamudāhṛtam