Rasasudhakara 3.311

3.311

‘tvāmālikhya praṇayakupitāṃ dhāturāgaiḥ śilāyāmātmānaṃ te caraṇapatitaṃ yāvadicchāmi kartum
asraistāvanmuhurupacitairdṛṣṭiralupyate me
krūrastasminnapi na sahate saṅgamaṃ nau kṛtāntaḥ ||’
‘kānte kṛtāgasi puraḥ parivartamāne
sakhyaṃ sarojaśaśinoḥ sahasā babhūva
roṣākṣaraṃ sudṛśi vaktumapārayantyāmindīvaradvayamavāpa tuṣāradhārām ||'
atra sāparādhapriyadarśanajanitena roṣeṇa mugdhāyā bāṣpodgamaḥ
santoṣeṇa yathā—
'ānandajaḥ śokajamaśru bāṣpastayoraśītaṃ śiśiro bibheda
gaṅgāsarayvorjalamuṣṇataptaṃ himādriniḥṣyanda ivāvatīrṇaḥ ||'
atra ciraproṣitapratyāgatarāmalakṣmaṇadarśanānandena kausalyāsumitrayorbāṣpaḥ
dhūmena yathā—
'asmin kṣaṇe kāntamalakṣayat sā dhūmāvilairudgatabāṣpaleśaiḥ
antardalairamburuhāmivādrairayatnakarṇābharaṇairapāṅgaiḥ ||'
atra vivāhadhūmena lakṣmyā bāṣpodgamaḥ
atha pralayaḥ—
pralayo duḥkhaghātādyaiśceṣṭā tatra visaṃjñatā
duḥkhena yathā—
'vapuṣā karaṇojjhitena sā nipatantī patimapyapātayat
nanu tailaniṣekabindunā saha dīpārcirupaiti medinīm ||'
atrendumatīvipattijanitena duḥkhenaujasya pralaya.
ghātena yathā—
'pūrva prahartā na jaghāna bhūyaḥ pratiprahārākṣamamaśvasādī
turaṅgamaskandhaniṣaṇṇadehaṃ pratyāśvasantaṃ ripumācakāṅkṣa ||'
atra pratibhaṭaprahāreṇāśvasādino mūrcchā
sarve'pi sattvamūlatvād bhāvā yadyapi sāttvikāḥ
tathāpyamīṣāṃ sattvaikamūlatvāt sāttvikaprathā
anubhāvāśca kathyante bhāvasaṃsūcanādamī