Rasasudhakara 4.102

4.102

dīrghaiḥ śvāsabharaiḥ saphūtkṛtiśatairāsphoṭitoṣṭhadvayaṃ
tatpūrvaṃ kṛṣikarmaṇi śramavatā kṣudreṇanidrāyate ||'
atra nīcagatā nidrā bhāvakebhyo nātisvadate
yathā -
'evaṃvādini devarṣī pārśve pituradhomukhī
līlākamalapatrāṇi gaṇayāmāsa pārvatī ||'
sarūpayoḥ sandhiryathā -
'aribrajānāmanapotaśiṅgakhaṅgaprahārairavaniṃ gatānām
priyājanāṅkaprahitāṅgakānāṃ bhavanti netrāntanimīlanāni ||'
asarūpayoḥ sandhiryathā -
'śrīśiṅgabhūpapratināyakānāṃ svidyanti gātrāṇyativepitāni
tattūryasaṃvādiṣu garjiteṣu priyābhirālambitakandharāṇām ||'
atra garjiteṣu nāyakasannāhanissāṇaśaṅkayāṅkuritasya
pratināyakānāṃ trāsasya priyāliṅganataraṅgitasya harṣasya ca svadavepathusādṛśyakalpitasaṃśleṣaḥ sandhiḥ
atyārūḍhasya bhāvasya vilayaḥ śāntirucyate
yathā —
‘śuddhāntasya nivārito'pyanutayairniśśaṅkamaṅkūrito
vṛddhāmātyahitopadeśavacanai ruddho'pi vṛddhiṃ gataḥ
mānodrekataruḥ pratikṣitibhujāmāmūlamunmūlyate
vāhinyāmanapotaśiṅganṛpaterālokitāyāmapi||’
atra hitopadeśānādarādhirūḍhasya pratināyakagatasya
garvasya śāntirāmūlamunmūlyata iti vāgārambhena vyajyate
śabalatvaṃ tu bhāvānāṃ saṃmardaḥ syāt parasparam