Rasasudhakara 5.119

5.119

yathā prasannarāghave — ‘rāvaṇaḥ — kathaya kva tāvat
karṇāntaniveśanīyaguṇaṃ kanyāratnaṃ kārmukaṃ ca | mañjīrakaḥ —
idaṃ tāvat kārmukaṃ kanyā tu caramaṃ locanapathamavatariṣyati
rāvaṇaḥ — (sasaṃrambham |) dhiḍ mūrkha ! re ! re ! nakṣatrapāṭhakānāmapi
goṣṭhīmadṛṣṭavānasi | te'pi kanyāmeva prathamaṃ prakāśayanti, caramaṃ
dhanuḥ | mañjīrakaḥ — (svagatam) kathamayaṃ vācāṭatāmeva prakaṭayatī’tyatra rāvaṇena dhanuḥkanyayoḥ prakṛtamarthaṃ parityajya rāśilakṣaṇasyārthasya prasañjanādayaṃ bhraṃśaḥ
atha lekhaḥ —
lekhaḥ syādiṅgitākāravadviśeṣaṇakṛdvacaḥ
yathā mālatīmādhave —
‘asau vidvān dhīraḥ śiśurapi vinirgatya bhavanāddihāyātaḥ sampratyavikalaśaraccandramadhuraḥ
yadālokasthāne bhavati puramunmādataralaiḥ
kaṭākṣairnārīṇāṃ kuvalayitavātāyanamiva ||’
ityatra kāmandakyā mālatyanurāgajñānanivedanasyonmādataralairiti viśeṣaṇasya kathanāllekhaḥ
atha kṣobhaḥ —
kṣobhastvanyagate hetāvanyasmin kāryakalpanam