Rasasudhakara 5.18

5.18

phalaṃ kāryamidaṃ śuddhaṃ miśraṃ vā kalpayet sudhīḥ
śuddhaṃ yathā mālatīmādhave — 'kāmandakī —
yat prāgeva manorathairvṛtamabhūt kalyāṇamāyuṣmatostat puṇyairmadupakramaiśca phalitaṃ kleśo'pi macchiṣyayoḥ
niṣṇātaśca samāgamo'pi vihitastvatpreyasaḥ kāntayā
samprītau nṛpanandanau yadaparaṃ preyastadapyucyatām ||'
ityatra kāvyopasaṃhāraślokena tṛtīyapuruṣārthasyaiva phalatvakathanāt śuddhaṃ kāryamidam
miśraṃ yathā bālarāmāyaṇe —
'rugṇaṃ cājagavaṃ na cāttikupito bhargaḥ suragrāmaṇīḥ
setuśca grathitaḥ prasannamadhuro dṛṣṭaśca vārāṃnidhiḥ
paulastyaścaramasthitaśca bhagavān prītaḥ śrutīnāṃ kaviḥ
prāptaṃ yānamidaṃ ca yācitavate dattaṃ kuberāya ca ||'
ityanenopasaṃhāraślokena miśrasya trivargaphalasya kathanād miśramidam
pradhānamaṅgamirita ca tad vastu dvividhaṃ punaḥ