Rasasudhakara 5.275

5.275

yathā tatraiva prahasane - 'mithyātīrthaḥ - (puro'valokya) aye upasarittīraṃ pippalanāmā vanaspatiḥ, yaśca gītāsu bhagavatā nijavibhūtitayā nirdiṣṭaḥ | (vicintya) kathamasya taroriyamātamahimasambhāvanā | (vimṛśya) - upapadyata eva,
tatpadaṃ tanumadhyāyā yenāśvatthadalopamam
tadaśvattho'smi vṛkṣāṇāmityūce bhagavān hariḥ ||'
atra lokaprasiddhenāśvatthadalorumūlayoḥ sāmyena hetunā lokaprasiddhasyaiva bhagavadaśvatthayoraikyasya sādhanaṃ hāsyakaraṇamupapattiḥ
atha bhayaṃ -
smṛtaṃ bhayaṃ tu nagaraśodhakādikṛto daraḥ
yathā tatraiva prahasane — 'jainaḥ — aho sarājako'yaṃ
viṣayaḥ, yannagaraparisarāśritatapasvināṃ dhanaṃ coryate | (ityudgāhurākrośati |) aye kimapahṛtaṃ dhanaṃ kiyad | (iti nagararakṣakāstaṃ paritaḥ
praviśya parisarpanti |) arūpāmbaraḥ — dhik kaṣṭaṃ nagaraśodhakāḥ
samāyānti | (ityūrdhvabāhuroṣṭhaspandanaṃ karoti |) (mithyātīrtho gaṇikāmapakṣipya samādhiṃ nāṭayati |) (niṣkacchakīrtirekapādenāvatiṣṭhamānaḥ karāṅgulīrgaṇayati |)' ityā(di ? dau) jainādīnāṃ bhayakathanād bhayam
athānṛtam —
anṛtaṃ tu bhaved vākyamasatyastutigumphitam