Rasasudhakara 5.274

5.274

yathā prahasane -
'priyāhaṃ sarvabhūtānāṃ nāmnā svacchandabhakṣiṇī
gṛhṇāmyenaṃ yadi trātuṃ kṛpā vaḥ śrūyatāmidam
surāghaṭānāṃ sāhasrasaptatyā dṛptagaḍḍuraiḥ
chāgaiśca daśabhiḥ kāryā ciraṇṭīrpaṇakriyā
adya kartumaśakyaṃ cet tatparyāptatamaṃ dhanam
āsthāpyamasyā yakṣiṇyā jaraṭhāyāḥ padāñcale
(iti punarapi vyāttavadanaṃ nṛtyati |) niṣkacchakīrtivratinau -
kimuta vidheyam | mithyātīrthaḥ - pratyāmnāyapakṣa eva yujyate | arūpāmbaraḥ - (ātmagatam) kiṃ karomi, na kimapi haste paṇādikam | (prakāśam) bhoḥ ! jīvahiṃsākṛte
pratyāmnāyakaraṇamapi na me saṃmmatam | mithyātīrthaḥ -
bhoḥ ahiṃsāvādin ! mriyamāṇaḥ prāṇī na rakṣaṇīya iti kiṃ
yuṣmaddharmaḥ | arūpāmbaraḥ - (sākṣepam) ekena sukhamupādeyam
anyena dhanaṃ pradeyamiti yuṣmaddharmaḥ | (niṣkakṣakīrtiḥ sāntarhāsaṃ
svadhanaṃ yatidhanaṃ ca jaraṭhāyāḥ padāñcale baddhvā sabalātkāraṃ jainasya kaṭakaṃ
tasyāḥ pādamūle'rpayati|) madhumallikā - (sāṅgabhaṅgaṃ prakṛtimupagamya
sasmaraṇabhayamiva) ajho devadā vippaḷambhaṇa kuppissadi | tā
ciraṇṭiātappaṇaṃ kātuṃ gacchemi| (iti kaṭakamādāya niṣkrāntā |)'
ityādau bhūtāveśakaitavena jainabauddhasaṃnyāsino vilobhya dhanaṃ
kayāpi gaṇikayā gṛhītamityayaṃ vipralambhaḥ
athopapattiḥ -
upapattistu sā proktā yat prasiddhasya vastunaḥ
lokaprasiddhayā yuktyā sādhanaṃ hāsyahetunā