Rasasudhakara 5.34

5.34

yathā tatraiva—‘rākṣasaḥ—(puro'valokya) kathaṃ tāpasaḥ | (pratyabhijñāya) tatrāpi viśvāmitradharmaputraḥ śunaḥśephaḥ’ ityupakramya ‘sampratyeva rākṣasa(bhayāt) satre dīkṣiṣyamāṇaḥ sa bhagavān goptāraṃ rāmabhadraṃ varītumayodhyāṃ gataḥ | rākṣasaḥ—(satrāsaṃ svagataṃ) hanta kathametadapi niṣpannam | (prakāśaṃ) bhagavan ! mā kopīḥ’ i(tyantena?tyādinā) ‘(svagataṃ) kṛtaṃ yat kartavyam | samprati cārasañcārasyāyamavasara’ ityantena viśvāmitrānubhāvakathanād rākṣasatrāsakathanācca bījaniṣpatteḥ parinyāsaḥ
atha vilobhanaṃ—
nāyakādiguṇānāṃ yad varṇanaṃ tad vilobhanam
yathā tatraiva—‘rāvaṇaḥ—yasyāropaṇakarmaṇāpi bahavo vīravrataṃ tyājitā’ ityupakramya ‘rāvaṇaḥ—(sapratyāśaṃ) nirmālyaṃ nayanaśriyaḥ kuvalayaṃ vaktrasya dāsaḥ śaśī’ ityantena tadguṇavarṇanād vilobhanam
atha yuktiḥ—
samyak prayojanānāṃ hi nirṇayo yuktiriṣyate