Rasasudhakara 5.49

5.49

yathā tatraiva — ‘mātaliḥ — ayaṃ hi pitṛbhaktyatiśayaḥ
paraśurāmasya, yaduta reṇukāśiraścheda’ ityupakramya ‘yadvā te
guravo'vicintyacaritāstebhyo'yamastvañjaliḥ’ ityantena tattadupapattibhiḥ piturnideśakaraṇādapi mātṛvadhakaraṇasyaiva pratipādanādvā gurūṇāmavicintyacaritatvopanyāsena sarvopapannatatpratipādanādvā upanyāsaḥ
atha varṇasaṃhāraḥ —
sarvavarṇopagamako varṇasaṃhāra ucyate
yathā tatraiva – 'jāmadagnyaḥ – (karṇaṃ dattvā ākāśe) kiṃ
brūtha – kena na varṇitaṃ dāśaratheḥ śaṅkarakārmukāropaṇam' ityupakramya 'svayaṃ guhasahādhyāyī samanviṣyati' ityantena haracāpadalanaviṣayatayā kartṛtayā'numantṛtayā stotṛtayā ca rāghavaviśvāmitrapaurādiparāmarśena brāhmaṇakṣatriyādivarṇānāṃ saṅgrahaṇād
varṇasaṃhāraḥ
atha garbhasandhiḥ—
dṛṣṭādṛṣṭasya bījasya garbhastvanveṣaṇaṃ muhuḥ