Viramitrodaya 1.p158

1.p158

daṃṣṭrāścatasraścandrābhā daśanebhyaḥ samunnatāḥ | kiñcidyasya sa dharmajña caturdaṃṣṭraḥ prakīrtitaḥ || netratārau bhruvau śmaśru kṛṣṇāḥ keśāstathaiva ca | yasyeha sa catuṣkṛṣṇaḥ procyate manujottama || nāsāyāṃ vadane svede kakṣāsu ca narottama | gandhastu surabhiryasya caturgandhaḥ sa kīrtitaḥ || hrasvaṃ liṅgaṃ tathā grīvājaṅghe hrasve tathaiva ca | yasya bhārgavaśārdūla caturhrasvaḥ prakīrtitaḥ || aṅgulīnāṃ tu parvāṇi nakhakeśadvijatvacaḥ | sūkṣmāṇi yasya taṃ rāma pañcasūkṣmaṃ pracakṣate || hanunetre lalāṭaṃ ca nāsā caiva stanāntaram | dīrghāṇi yasya taṃ rāma pañcadīrghaṃ vidurbudhāḥ || vakṣaḥ kakṣau nakhā nāsā mukhaṃ caiva kṛkāṭikā | ṣaḍunnatāni yasyeha taṃ vadanti ṣaḍunnatam || tvakkeśalomadantāśca dṛṣṭirvāṇī nakhāstathā | snigdhā yasyeha taṃ prāhuḥ saptasnigdhaṃ bahuśrutāḥ || jānuvaṃśāvatho rāma bhujavaṃśau tathā parau | ūruvaṃśadvayaṃ caiva pṛṣṭhavaṃśaṃ ca bhārgava || nāsāvaṃśaṃ samaṃ yasya so'ṣṭavaṃśaḥ prakīrtitaḥ | netre nāsāpuṭe karṇau meḍhraṃ pāyurmukhaṃ tathā || chidrā navaite vimalā yasya taṃ tu navāmalam | jihvoṣṭhatālunetrāntahastapādanakhāḥ stanau || śiśnāgravaktre śasyante padmābhā daśa dehinām || pāṇī pādau mukhaṃ grīvā śravaṇe hṛdayaṃ śiraḥ| lalāṭamudaraṃ pṛṣṭhaṃ bṛhantaḥ pūjitā daśa || prasāritabhujasyeha madhyamāgradvayāntaram | ucchrāyeṇa samaṃ yasya nyagrodhaparimaṇḍalaḥ || kathitaḥ sa nṛṇāṃ śreṣṭhaḥ sarvalakṣaṇapūjitaḥ | pādau gulphau sphicau pārśvau vṛṣaṇāvīkṣaṇe kucau || karṇauṣṭhau sakthinī jaṅghe hastau bāhū tathā bhruvau