Viramitrodaya 1.p162

1.p162

tatra tāvatkanyālakṣaṇanirīkṣaṇakāla ukto— bhaviṣyapurāṇe, muhūrtte tithisampanne nakṣatre cābhipūjite | dvijaiśca saha saṅgamya kanyāṃ paśyeta kālavit || iti | jaganmohane samudro'pi, mūhūrte tithisampanne grahe saumye balānvite | brāhmaṇaiḥ saha saṅgamya kanyāṃ paśyeta śāstravit || iti | āśvalāyanagṛhye, buddhirūpalakṣaṇaśīlasampannāmarogāmupayaccheta | iti | śāstrāviruddhadṛṣṭādṛṣṭasādhanohāpohakuśalā dhīrbuddhiḥ | yatra varasya mano ramate tadrūpam | tadāha— āpastambaḥ, yasyāṃ manaścakṣuṣornibandhastasyāmṛddhiriti | manuḥ, udvaheta dvijo bhāryyāṃ savarṇāṃ lakṣaṇānvitām | iti | dakṣaḥ, samāvarttanapūrvaṃ tu lakṣaṇyāṃ striyamudvahet | iti | yājñavalkyaḥ, aviplutabrahmacaryyo lakṣaṇyāṃ striyamudvahet | iti | lakṣaṇāni dvividhāni bāhyānyābhyantarāṇi ca | atha tāvat bāhyānyāha— manuḥ, avyaṅgāṅgīṃ saumyanāmnīṃ haṃsavāraṇagāminīm | tanulomakeśadaśanāṃ mṛdvaṅgīmudvahetstriyam || iti | pṛthvīcandrodaye śātātapaḥ, haṃsasvanāṃ meghavarṇāṃ madhupiṅgalalocanām | tādṛśīṃ varayetkanyāṃ gṛhasthaḥ sukhamedhate || iti