Viramitrodaya 1.p198

1.p198

atha jatrulakṣaṇam | skānde kāśīkhaṇḍe, pīvarābhyāṃ ca jatrubhyāṃ dhanadhānyanidhirvadhūḥ | ślathābhyāṃ ca nimagnābhyāṃ viṣamābhyāṃ daridriṇī || iti | iti jatrulakṣaṇam | atha skandhalakṣaṇam | skānde kāśīkhaṇḍe, unnatāvanatau skandhāvadīrghāvakṛśau śubhau | vakrau sthūlau ca romāḍhyau preṣyavaidhavyasūcakau || iti | bhaviṣyapurāṇe, unnatāvanataścaiva nātisthūlo na lomaśaḥ | suskandhastu sadā strīṇāṃ saubhāgyayogyavarddhanaḥ || sthūla skandhe vahedbhāraṃ romaśe vyādhinī bhavet | vakre skandhe bhavedvandhyā kulaṭā connate bhavet || iti skandhalakṣaṇam | athāṃsalakṣaṇam | skānde kāśīkhaṇḍe, nigūḍhasandhau srastāgrau śubhāvaṃsau susaṃhatau | vaidhavyadau samunnāgrau nirmāṃsāvatiduḥkhadau || iti | ityaṃsalakṣaṇam | atha kakṣālakṣaṇam | kakṣe susūkṣmaromāṇau tuṅge snigdhe ca māṃsale | śaste na śaste gambhīre śirāle svedamedure || iti | gargasaṃhitāyām, uttānarūpāstanu romayukta— varṇopapannāḥ parimaṇḍalāśca | pradakṣiṇāvarttasamanvitāśca kakṣāḥ praśaṃsanti viśālasūkṣmāḥ || iti | sāmudratilake, kakṣāyugaṃ sugandhi snigdhaṃ ca samunnataṃ piśitapūrṇam | praśastamiti, śeṣaḥ | iti kakṣālakṣaṇam | atha bāhulakṣaṇam | bhaviṣyapurāṇe, anunnataśirāsandhi pīnaṃ doṣavivarjitam | gopucchākṛti nārīṇāṃ bhujayoryugalaṃ śubham || nigūḍhagranthayo yāsāṃ kūrparā romavarjitāḥ | bāhavo lalitā yāsāṃ praśastā vṛttakomalāḥ || iti | skānde kāśikhaṇḍe, syātāṃ doṣau sunirdoṣau gūḍhāsthigranthikaumalau | viśirau ca viśomāṇau saralau hariṇīdṛśām || vaidhavyaṃ sthūlaromāṇau hrasvau daurbhāgyasūcakau | parikleśāya nārīṇāṃ paridṛśyaśirau bhujau || iti | gargaḥ, na cātilambā na kṛśā na hrasvā bhujaṅgavarṇāḥ pṛthulomavarjitāḥ | nirgranthilā vṛttanigūḍhalekhāḥ subāhavaḥ strīṣu bhavanti dhanyāḥ || iti | iti bāhulakṣaṇam | atha maṇibandhalakṣaṇam | bhaviṣyapurāṇe, maṇibandho'vyavacchinno rekhātrayavibhūṣitaḥ | dadāti na cirādeva maṇikāñcanamaṇḍanam || iti