Viramitrodaya 1.p205

1.p205

viroma viśiraṃ śastaṃ pāṇipṛṣṭhaṃ samunnatam | vaidhavyahetu romāḍhyaṃ nirmāṃsaṃ snāyumattyajet || iti | sāmudratilake, romaśirāparihīnaṃ ghanamāṃsaṃ pāṇipṛṣṭhamavahastam | snigdhaṃ samamabalānāṃ samunnataṃ śasyate prāyaḥ || iti | iti pāṇipṛṣṭhalakṣaṇam | atha pāṇitalalakṣaṇam | bhaviṣyapurāṇe, mṛdu madhyonnataṃ raktaṃ talaṃ pāṇyorarandhrakam | praśastaṃ śastarekhāḍhyamalparekhaṃ śubhaśriyām || vidhavā bahurekheṇāpyalparekhena daridriṇī | bhikṣukī suṣirāḍhyena nārī karatalena ca || iti | gāruḍe, na nimnaṃ nonnataṃ strīṇāṃ bhavetkaratalaṃ śubham | rekhānvitaṃ ca vividhaṃ kuryātsambhoginīṃ striyam || iti | varāhasaṃhitāyām, na nimnamatinonnataṃ karatalaṃ surekhānvitaṃ karotyavidhavāṃ ciraṃ sutasukhārthasambhoginīm || iti | iti pāṇitalalakṣaṇam | atha kararekhālakṣaṇam | bhaviṣyapurāṇe, catasro raktagambhīrā rekhāḥ snigdhāḥ kare striyāḥ | yadi syuḥ sukhamāpnoti vicchinnābhiranīśatā || samarekhā yavā yāsāmaṅguṣṭhāṅguliparvasu | tāsāṃ hi vipulaṃ saukhyaṃ dhanaṃ dhānyaṃ tathā'kṣayam || śrīvatsadhvajaśaṅkhābjagajavājiviniveśanaiḥ | cakrasvastikavajrāsipūrṇakumbhai rathāṅkuśaiḥ