Viramitrodaya 1.p291

1.p291

atha dharmādhikārilakṣaṇam | viṣṇudharmottare, samaḥ śatrau ca mitre ca dharmaśāstraviśāradaḥ | vipramukhyaḥ kulīnaśca dharmādhikaraṇo bhavet || kāryāstathāvidhāstatra dvijamukhyāḥ sabhāsadaḥ | iti | iti dharmādhikārilakṣaṇam | atha dharmādhikaraṇalakṣaṇam | madanaratne bṛhaspatiḥ, durgamadhye gṛhaṃ kuryājjalavṛkṣāśritaṃ pṛthak | prāgdiśi prāṅmukhīṃ tasya lakṣaṇyāṃ lakṣayetsabhām || mālyadhūpāsanopetāṃ bījaratnasamanvitām | pratimālekhyadevaiśca yuktāmagnyambunā tathā || iti | saiva dharmādhikaraṇamityāha mādhavīye kalpatarau ca— kātyāyanaḥ, dharmaśāstrānusāreṇa mūlaśāstravivecanam | yatrādhikriyate sthāne dharmādhikaraṇaṃ hi tat || iti | mūlaṃ vyavahāraḥ | śāstraṃ tatpratipādakaṃ smṛtyādi | iti dharmādhikaraṇalakṣaṇam | atha lekhakalakṣaṇam | viṣṇudharmottare, sarvadeśākṣarābhijñaḥ sarvaśāstraviśāradaḥ | lekhakaḥ kathito rāma sarvādhikaraṇeṣu vai || śīrṣopetān susampūrṇān samaśreṇigatān samān | akṣarān vilikhedyastu sa lekhakavaraḥ smṛtaḥ || upāyavākye kuśalaḥ sarvaśāstraviśāradaḥ | bahvarthavaktā cālpena lekhakaḥ syādbhṛgūttama || vākyābhiprāyatattvajño deśakālavibhāgavit | anāhāryaḥ samarthaśca lekhakaḥ syādbhṛgūttama || iti