Viramitrodaya 1.p4.2

1.p4.2

daśālakṣaṇamuktvā ca vayaso jñāpakaṃ smṛtam | dantasaṅkhyā vājiśālā tadadhyakṣāmca lakṣitāḥ || 46 || śālagrāmaśilācakramūrtīnāṃ lakṣaṇānyatha | atha dvāravatījātaśīlāmūrtinirūpaṇam || 47 || vistarācchivaliṅgānāṃ lakṣaṇāni tataḥ param | śivaliṅgārcchanaphalaṃ viśeṣeṇa nirūpitam || 48 || śivaliṅgasya naivedye bhakṣyābhakṣyavivecanam | atha prakīrṇake proktaṃ lakṣaṇaṃ guruśiṣyayoḥ || 49 || lakṣaṇaṃ yogapaṭṭasya kaupīnakaṭisūtrayoḥ | upavītottarīye ca lakṣite tadanantaram || 50 || rudrākṣalakṣaṇaṃ proktaṃ tanmāhātmyasamanvitam | āsanādivitānāntapūjopakaraṇānyatha || 51 || evaṃ krameṇa durlakṣyalakṣaṇānāṃ vicakṣaṇaiḥ | mitrāmiśraiḥ prakāśe'smin kṛtaṃ samyak parīkṣaṇam || 52 || nanu kimarthaṃ lakṣaṇaprakāśā''rambhaḥ lakṣaṇānāmanupayogāditi | ucyate | asti hi mahānupayogaḥ | tathāhi— atha vivāhaḥ | salakṣaṇo varo lakṣaṇavatīṃ kanyāmupayaṃccheteti | aviplutabrahmacaryo lakṣaṇyāṃ .striyamudvahet | etaireva guṇairyuktaḥ savarṇaḥ śrotriyo varaḥ || ityādivacanaiḥ strīpuṃsasāmudrikalakṣaṇānāṃ vivāhopayogāt| lāñchanairvividhākārairlāñchitaṃ yacca dṛśyate | cakrāṅkitaṃ hareścāpi śālagrāmasya lakṣaṇam || yathāyogyaṃ vicāryaiva grahītavyaṃ prayatnataḥ | ityādivacanaiḥ śālagrāmamūrttilakṣaṇānāṃ tatpūjādāvupayogāt| liṅgaṃ salakṣaṇaṃ pūjyaṃ tyajelliṅgamalakṣaṇam | tasmātsarvaprayatnena liṅgaṃ kuryātsalakṣaṇam || ityādivacanairliṅgalakṣaṇānāṃ tatpūjādāvupayogāt | ārādhanopakaraṇaṃ tasya lakṣaṇameva ca | ucyate samprati brahman śrūyatāṃ tadaśeṣataḥ ||