Viramitrodaya 1.p75

1.p75

garuḍapurāṇe, dhanvantariruvāca | pramehāṇāṃ nidānaṃ te vakṣye'haṃ śṛṇu suśruta | pramehā viṃśatistatra śleṣmaṇo daśa pittataḥ || ṣaṭ catvāro'nilātteṣāṃ kramādvakṣyāmi lakṣaṇam | acchaṃ bahusitaṃ śītaṃ nirgandhamudakopamam || mehatyudakamehena kiñcidāvilapicchilam | āvilaṃ kaluṣam | ikṣo rasamivātyarthaṃ madhuraṃ cekṣurohataḥ || sāndrībhavetparyuṣitaṃ sāndramehena mehati | surāmehī surātulyamuparyacchamadhoyatam || saṃhṛṣṭaromā piṣṭena piṣṭavad bahalaṃ sitam | piṣṭena piṣṭamehena | śukrābhaṃ śukramiśraṃ vā śukramehī pramehati || mūtrayetsikatāmehī sikatārūpiṇotpalam | śītamehī subahuśo madhuraṃ bhṛśaśītalam || śanaiḥ śanaiḥ śanairmehī mandaṃ mandaṃ pramehati | lālātantuyutaṃ mūtraṃ lālāmehena picchilam || gandhavarṇarasasparśaiḥ kṣāreṇa kṣāratoyavat | nīlamehena nīlābhaṃ kālamehī maṣīnibham || hāridramehī kaṭukaṃ haridrāsannibhaṃ dahat | viśraṃ māñjiṣṭhamehena mañjiṣṭhāsalilopamam || viśramuṣṇaṃ salavaṇaṃ raktābhaṃ raktamehataḥ | vasāmehī vasāmiśraṃ vasābhaṃ mūtrayanmuhuḥ || majjābhaṃ majjamiśraṃ vā majjamehī muhurmuhuḥ | kaṣāyaṃ madhuraṃ rūkṣaṃ kṣaudramehe vadedbudhaḥ || hastimastadgavāsaṅgamūtraṃ vegavivarjitam | salasīkaṃ vibaddhaṃ ca hastimehī pramehati | iti