Viramitrodaya 1.p95

1.p95

sāmudratilake, pāṇī nṛpateḥ ślakṣṇau niḥsvedau māṃsalāvapacchidrau | aruṇāvakarmakaṭhināvuṣṇau dīrghāṅgulī snigdhau || vistīrṇau tāmranakhau syātāṃ kapivatkarau dhanāḍhyasya | śārdūlavadvirukṣau vikṛtau niḥsvasya nirmāṃsau || iti | iti karalakṣaṇam | atha karapṛṣṭhalakṣaṇam | sāmudratilake, atha śastaṃ karapṛṣṭhaṃ vistīrṇaṃ pīnamunnataṃ snigdham | nirgūḍhaśiraṃ paritaḥ kṣoṇipateḥ phaṇiphaṇākāram || maṇibandhasamaṃ nimnaṃ nirmāṃsaṃ romasamvitaṃ saśiram | karapṛṣṭhaṃ niḥsvānāṃ rūkṣaṃ paruṣaṃ vivarṇaṃ syāt || iti | vivekavilāse'pi, karapṛṣṭhaṃ tu vistīrṇaṃ pīnaṃ snigdhaṃ samunnataṃ | ślāghyaṃ gūḍhaśiraṃ nṛṇāṃ phaṇabhṛtphaṇasannibham || vivarṇaṃ paruṣaṃ rūkṣaṃ romaśaṃ māṃsavarjitam | maṇibandhasamaṃ nimnaṃ na śreṣṭhaṃ karapṛṣṭhakam || iti | iti karapṛṣṭhalakṣaṇam | atha karatalalakṣaṇam | bhaviṣye, nimnaṃ karatalaṃ yasya pitṛvittaṃ ca tasya vai | sa bhaveddevaśārdūla tathā hīnaśca mānavaḥ || ativṛttena nimnena dhanī karatalena vai | uttānakatalo dātā bhavatīha na saṃśayaḥ || viṣamā bhavanti viṣamailaiṃḥsvāścāpi viśeṣataḥ | viṣamāḥ krūrāḥ | karatalairdevaśārdūla lākṣābhairīśvarāḥ smṛtāḥ || agamyāgāminaḥ pītai rūkṣairnirddhanatā smṛtā | apeyapānaṃ kurvanti nīlakṛṣṇaistathaiva ca || iti | sāmudratilake, bahurekhāparikalitaṃ pāṇitalaṃ bhavati yasya manujasya | yadi vā rekhāhīnaṃ so'lpāyurduḥkhito niḥsvaḥ || iti | vivekavilāse'pi, pāṇestalena śoṇena dhanī nīlena madyapaḥ | pītenāgamyanārīgaḥ kalmāṣeṇāvaropsitaḥ || dātonnate tale pāṇernimne pitṛdhanepsitaḥ | dhanī saṃvṛtanimne syādviṣame nirdhanaḥ punaḥ || iti | iti karatalalakṣaṇam | atha rekhālakṣaṇam | bhaviṣyapurāṇe, nimnasnigdhā bhavennṝṇāṃ rekhā karatale guha | dhanināṃ na daridrāṇāmityāha sa payonidhiḥ || yasya mīnasamā rekhā karmāsiddhistu dṛśyate | dhanavān sa tu vijñeyo bahuputraśca mānavaḥ || tulā yasya tu vai dīrghā karamadhye hi dṛśyate | vāṇijyaṃ sidhyate tasya puruṣasya na saṃśayaḥ || sūryyaḥ pāṇitale yasya dvijasya tu viśeṣataḥ