Viramitrodaya 7.p69

7.p69

athāśvānāṃ naravāhanatvasambhavaḥ| nakulakṛte aśvaśāstre, sapakṣā vājinaḥ pūrve sañjātā vyomacāriṇaḥ| gandharvebhyo yathākāmaṃ gacchanti ca samantataḥ|| tān dṛṣṭvā javasampannān balaughān vāhanocittāna| śakraḥ provāca pārśvasthaṃ śālihotraṃ munīśvaram|| nāsādhyaṃ ca mune kiñcittavāsti bhuvanatraye| tasmātkuru rathāvāhe yogyānetān hyottamān|| yathā me yudhyataḥ sainye pravahanti rathaṃ sadā| aśakyā dānavendrasya nityaṃ ca balagarvitāḥ|| iṣīkāstraṃ samutsṛjya pakṣacchedaṃ vyadhatta saḥ| vājināṃ śakravākyena śālihotro munīśvaraḥ|| chinnapakṣāśca te sarve gatvā tamṛṣimabruvan| dīnā duḥkhasamopetā rudhireṇa pariplutāḥ|| bhagavan kinnimittena pakṣacchedaḥ kṛtastvayā| aparādhavihīnānāṃ na ca hiṃsanti paṇḍitāḥ|| tasmādgatirbhava prājña sarveṣāmiha vājinām| yathā syātsarvadā saukhyaṃ tuṣṭiśca munisattama|| ato'sau kṛpayāviṣṭastānuvāca suduḥkhitān| indrādeśātkṛtaṃ sarvaṃ bhavatāṃ pakṣabhedanam|| tasmādvaḥ prakariṣyāmi bhaviṣyati yathā sukham| puṣṭiragyā yathā dehe gauravaṃ ca jagattraye || yūyaṃ śakrādidevānāṃ vāhanatvaṃ kariṣyatha | tathā bhūmipatīnāṃ ca gauraveṇa samanvitam || yo rājā bhavatāṃ puṣṭiṃ khānapānādibhiḥ sadā | kariṣyati na sandeho bhaviṣyati sudurjjayaḥ || na ca tyajati taṃ lakṣmīḥ kadācijjayalakṣaṇā | api sarvaguṇairhīnaṃ bahuśatrubhirāhṛtam || tathā caivaṃ vidhāsyāmi paramaṃ ca cikitsitam | tuṣṭyarthaṃ roganāśārthaṃ narāṇāṃ vihitaṃ yathā || tasmādgacchata bhūloke pātāle ca tathāpare | svarge cānye madādeśādyena śāntiḥ parā bhavet || evaṃ visṛjya tān sarvān śālihotrasturaṅgamān | cakre dvādaśasāhasrīṃ vadārūyāṃ saṃhitāṃ tadā || tataḥ prabhṛti loke'smin vāhyā jātāsturaṅgamāḥ | tataścikitsitaṃ teṣāṃ śālihotraprakāśitam || iti