Viramitrodaya 9.p74

9.p74

tato himāṃśo sā devī gaṇḍakī lokatāriṇī | prāñjaliḥ praṇatā bhūtvā madhuraṃ vākyamabravīt || yadi deva prasanno'si deyo māṃ vāñchito varaḥ | mama garbhagato bhūtvā viṣṇo matputratāṃ vraja || tataḥ prasanno bhagavān cintayāmāsa gopate | kiṃ yācitaṃ nimnagayā nityaṃ matsarulubdhayā || dāsyāmi yācitaṃ yena lokānāṃ bhavamokṣaṇam | ityevaṃ kṛpayā devo niścitya manasā svayam || gaṇḍakīmavadatprītaḥ śṛṇu devi vaco mama | śālagrāmaśilārūpī tava garbhagataḥ sadā || sthāsyāmi tava putratve bhaktānugrahakāraṇāt | matsāṃnidhyānnadīnāṃ tvamatiśreṣṭhā bhaviṣyasi || darśanātsparśanātsnānātpānāñcaivāvagāhanāt | hariṣyasi mahāpāpaṃ vāṅmanaḥkāyasambhavam || evaṃ dattvā varandevrya tatraivāntaradhīyata | tataḥ prabhṛti tiṣṭhāmaḥ kṣetre'smin śaśalāñchana || ahaṃ ca bhagavān viṣṇurbhaktecchopāttavigrahaḥ | iti | pādme kārtikamāhātmye tvanyathaivopākhyānaṃ śrūyate | tadyathā-kaścidvedaśirā nāma mahāmunirgaṅgātīre tīvraṃ tapaścakāra tatastattapasā bhītaḥ śakro mañjuvāgityābhidhānāṃ kāṃ ciddevakanyāṃ tattapovighnārthaṃ preṣitavān | tataḥ sā mahendrapreṣitā vedaśirasastapovighnaṃ kurvatī kruddhena tena muninā tvaṃ nadī bhaveti śaptā | tatastayā mahatā prayatnena vijñāpito munistāmityatrovac | tadovāca muniḥ śānto nadībhūtvā janārdanam | svodare tvaṃ dhārayantī kṛtakṛtyaṃ janaṃ kuru || śālagrāmaśilārūpī tvayi jāto janārdanaḥ | tvadyaśaḥ prasarelloke muktidātā nṛṇāmiha || saiṣā vai mañjuvākū devī gaṇḍakī saritāṃ varā | tasyāṃ viṣṇuḥ śilārūpī vṛndāśāpādabhūva ha || iti dhūmrakeśaṃ prati yamo vyājahāra | vṛndāśāpopākhyānaṃ tu tatraiva draṣṭavyamityāstāṃ tāvatprapañcena