Viramitrodaya 9.p79

9.p79

cakrāṅkapūjanātsamyak labhecchāstroditaṃ phalam || cakrāṅkitaśilāgre tu kuryājjāgaraṇaṃ hi yaḥ | ekādaśyāṃ naraśreṣṭha devāstasya varapradāḥ || yatra tiṣṭhati cakrāṅko devo dvārāvatībhavaḥ | tīrthakoṭisahasrāṇi tatra sannihitāni vai || yatra yatra nṛpaśreṣṭha devaścakrāṅkacihnitaḥ | tatra gaccha mahābhāga saṃsārābdhiṃ tariṣyasi || kalikālakṛtāntasya ko bibheti narādhipa | cakrāṅkitaśilā yasya hṛdayānnāpasarpati || sālagrāmodbhavaṃ dṛṣṭvā nyastaṃ hṛdi janādhipa | nāvekṣituṃ śaknuvanti sarve te yamakiṅkarāḥ || sālagrāmodbhavaṃ śailaṃ dvārakāyāṃ samudbhavam | kalikālè'pi rājendra na jahāti janārddanaḥ || yadīcchasi hi duṣpāraṃ tarttuṃ saṃsārasāgaram | sālagrāmamayaṃ śailaṃ bhaktyārcaya mahīpate || arcitaḥ pūjito dhyātaḥ saṃstutaḥ śailanāyakaḥ | pāpināmupakārāya kiṃ punardharmaśālinām || janmaprabhṛti yasyāpi duṣkṛtāni tvanekaṃśaḥ | imāṃ mudrāṃ samabhyarcya mucyate so'pi tatkṣaṇāt || svamantreṇa budhaiḥ pūjyaḥ svakairardhyānnaiḥ svamudrayā | haristatra samāviṣṭaḥ sarvadā nātra saṃśayaḥ || lakṣmīrmedhā svadhā kāntiḥ puṣṭiḥ śraddhā sarasvatī | siddhirṛddhistathā sarvā mudrāyāṃ nityasaṃsthitāḥ || satataṃ caiva yatkṛtyaṃ harerdeśaṃ samāśritaḥ | dhyānaṃ pūjāṃ tathā dānamagnikāryaṃ japādikam || tasyāgratastu yaḥ kuryāttatsarvamakṣayaṃ bhavet | iti | tathā, davadāho viṣaṃ caiva vahnicaurabhayaṃ tathā| sarvāṇi praśamaṃ yānti yatra cakrāṅkito bhavet || dvāravatyāḥ śilā devi mudrayā mama mudritā | yatrāpi nīyate tatsyāttīrthaṃ dvādaśayojanam || śālagrāmaśilā yatra tatra sannihito hariḥ| tatsannidhau tyajetprāṇān viṣṇuloke mahīyate || iti | purāṇasaṅgrahe'pi, sālagrāmasamīpe tu krośamātraṃ samantataḥ | kīkaṭe'pi mṛto yāti vaikuṇṭhabhavanaṃ naraḥ || iti | iti sālagrāmaśilāmāhātmyam