Kalasara 14.p19

14.p19

baudhāyanaḥ,mādiśet prathame piṇḍe mātaraṃ putrikāsutaḥ | dvitīye pitaraṃ tasyāstṛtīye ca pitāmahaṃ || iti lopākṣiḥ,mātāmahasya gotreṇa mātuḥ piṇḍodakakriyā | kurvīta putrikāputra evamāha prajāpatiḥ || evaṃ sati vyavasthā kriyate | putrikāputro dvividhaḥ | mātāmahenaiva sambandho mātāmahena svapitrā ca sambandhaśveti | krameṇa tallakṣaṇaṃ, tatra vaśiṣṭhaḥ,abhrātṛkāṃ pradāsyāmi tubhyaṃ kanyāmalaṃkṛtāṃ | asyāṃ yo jāyate putraḥ sa me putro bhaviṣyati || manurapi,- yadapatyaṃ bhavettasyāṃ(1) tanmama syāt svadhākaraṃ | ityādyaḥ | kātyāyanaḥ,aputro'haṃ pradāsyāmi tubhyaṃ kanyāṃ bhavānapi | putrārthī cedihotpannaḥ sa nau putro bhaviṣyati || iti dvitīyaḥ | tatra mātuḥ prathamataḥ piṇḍaṃ ityādividhirmātāmahenaiva sambandhasya | ubhayasambandhasya tu uśanāḥ,mātāmahaṃ tu mātrādi paitṛkaṃ pitṛpūrvakam | mātṛtaḥ pitṛto yasmādadhikāro'sti dharmataḥ