Kalasara 20.p34

20.p34

mahāmāghī prayāgeṣu naimiṣe phālgunī tathā | • śālagrāme mahācaitrī kṛtāḥ puṇyasya hetavaḥ || gaṅgādvāre ca vaiśākhī jyeṣṭhī ca puruṣottame | āṣāḍhī vai kanakhale kedāre śrāvaṇī tathā || vadaryyāṃ ca prauṣṭhapadī kubjādrau ca mahāśvinī | puṣkare kārttiko kānyakubje mārgaśīrṣī tathā || ayodhyāyāṃ mahāpauṣī kṛtā ca sumahāphalā | viśeṣato mahāvaiśākhī, skānde,– meṣe'rke kārmuke jīve makarasthe'thavā dvija | pūrṇimā ravibāreṇa tulāsthe ca śanaiścare || varīyoyogayukte ca viśākharce yadā śaśī | mahāśabdā tadā jñeyā koṭisūryyagrahādhikā || koṭijanmakṛtaṃ pāpaṃ dṛṣṭvā śrīpuruṣottamam | mahāvaiśākhyāṃ muñcanti snānaṃ kṛtvā mahodadhau || mahājyeṣṭhī, kaurme,– aindre guruḥ śaśī caiva prājāpatyagate ravau | paurṇamāsī gurau jyeṣṭhī mahājyaiṣṭhīti sā smṛtā || mahājyaiṣṭhyāṃ ca yo gacchet kṣetraṃ śrīpuruṣottamam | brajet padāni yāvanti kratutulyāni tāni tu || tatra gatvā harerdhāmni gatvā śrīpuruṣottamam | viśramya vidhivat snāyāt pratitīrtheṣu vai kramāt