Divyavadana 6.2

6.2

āha ca--ārya tṛṣito 'smi, bubhukṣito 'smi/ sa taiḥ snāpito bhojitaḥ/ sa tasmin vimāne tāvat sthito yāvat sūryasyābhyudgamanakālasamayaḥ/ sa tenoktah--śroṇa avatarasva, ādīnavo 'tra bhaviṣyati/ so 'vatīrya ekānte vyavasthitaḥ/ tataḥ paścāt sūryasyābhyudgamanakālasamaye tadvimānamantarhitam/ tā api apsaraso 'ntarhitāśca/ catvāraḥ śyāmaśabalāḥ kurkurāḥ prādurbhūtāḥ/ taistaṃ puruṣamavamūrdhakaṃ pātayitvā tāvat pṛṣṭavaṃśānutpāṭyotpāṭya bhikṣito yāvat sūryasyāstagamanakālasamayaḥ/ tataḥ paścāt punarapi tadvimānaṃ prādurbhūtam, tā apsarasaḥ prādurbhūtāḥ/ sa ca puruṣastābhiḥ sārdhaṃ krīḍati ramate paricārayati/ sa teṣāṃ sakāśamupasaṃkramya kathayati--ke yūyam, kena ca karmaṇā ihopapannāh? te procuh--śroṇa duṣkuhakā jāmbudvīpakā manuṣyāḥ/ nābhiśraddadhāsyasi/ sa cāha--ahaṃ pratyakṣadarśī, kathaṃ nābhiśraddadhāsye? śroṇa, ahaṃ vāsavagrāmake aurabhraka āsīt/ urabhrān praghātya praghātya māṃsaṃ vikrīya jīvikāṃ kalpayāmi/ āryaśca mahākātyāyano mamānukampayā āgatya kathayati--bhadramukha, aniṣṭo 'sya karmaṇaḥ phalavipākaḥ/ virama tvamasmāt pāpakādasaddharmāt/ nāhaṃ tasya vacanena viramāmi/ bhūyo bhūyaḥ sa māṃ vicchandayati--bhadramukha, aniṣṭo 'sya karmaṇo phalavipākaḥ/ virama tvamasmāt pāpakādasaddharmāt/ tathāpi ahaṃ na prativiramāmi/ sa māṃ pṛcchati--bhadramukha, kiṃ tvametānurabhrān divā praghātayasi āhosvidū rātrau? mayoktah--ārya divā, praghātayāmīti/ sa kathayati--bhadramukha, rātrau śīlasamādānaṃ kiṃ na gṛhṇāsi/ mayā tasyāntikād rātrau śīlasamādānaṃ gṛhītam/ yattad rātrau śīlasamādānaṃ gṛhītam, tasya karmaṇo vipākena rātrāvevaṃvidhaṃ divyaṃ sukhaṃ pratyanubhavāmi/ yanmayā divā urabhrāḥ praghātitāḥ, tasya karmaṇo vipākena divā evaṃvidhaṃ duḥkhaṃ pratyanubhavāmi/ gāthāṃ ca bhāṣate-- divasaṃ paraprāṇapīḍako rātrau śīlaguṇaiḥ samanvitaḥ/ tasyaitatkarmaṇaḥ phalaṃ hyanubhavāmi kalyāṇapāpakam//3//