Storia do Mogor 362.1.1706

362.1.1706

A quodam decreto, seu declaratória lata ab Illustrissimo et Reverendíssimo D.°, D.° Alphonso Meliapurensi Episcopo contra Patrem Spiritum Turonensem Capucinum Missionis Pudicheriensis, nec non ejusdem Ordinis Religiosorum Missionariorum in ea commorantium Superiorem, in qua ipsum declarat incidisse in excommunicationem Bullae 'In Caena Domini,' privatque communione fidelium, et timens dictus Pater magis aggravari in posterum, judicem superiorem, cui de jure competit, in his scriptis [273] provocat, et appellat, et de nullitate dicit, petens Apóstolos saepè saepius, saepissime, instanter, instantius, instantissime; salva semper et intacta reverentiâ debita Praelato Illustrissimo et Reverendíssimo Meliapurensi Episcopo quam vel minimum laedere nullo modo intendit appellans, sed solummodo se ipsum à gravamine liberare: tenebatur namque Illustrissimus ac Reverendissimus Meliapurensi Episcopus contra dictum appellantem procedere juxta formam juris praescriptam in Capite 'Qualiter et quando de accusatione et denunciatione' in 'Decretalium' et observare sacras sanctiones in dicto capite expressas, quibus non servatis quidquid contra dictum appellantem intentatum fuit absque forma ibidem praescriptâ cassum et irritum debet reputari. Et ideo ab iis omnibus provocat et appellat, et de nullitate dicit, ut supra, et à non admissione praesentis appellationis, vel à denegatione Apostolorum, aut à quocumque actu alio in spretum hujus appellationis in posterum forsan facienda (quod non credit) iterum provocat et appellat et de nullitate dicit non solum semel, sed bis, et ter, et toties quoties opus fuerit, ita ut sit semper ultimus in appellatione et in appellando et protestando de attentatis et attentandis non solum isto, sed, omne alio meliori modo.
Datum Madraspatam sub die 23 mensis Decembris, 1706.